وپپوزيسيالىق «ساياسي كالام. تريبۋنا» گازەتىنىڭ باس رەداكتورى بولعان جانبولات ماماي وليگارح مۇحتار ءابىلازوۆتىڭ قۇپيا تۇردە قارجىلىق قولداۋىنا يە بولدى دەپ ايىپتالىپ، اباقتىعا توعىتىلعان ەدى. الايدا، جۋرناليست وزىنە تاعىلعان ايىپتى مويىندامادى. مۇحتار ءابىلازوۆتىڭ ءوزى دە 2009 جىلدان بەرى ەۋروپادا بولعاندىقتان، جانبولات مامايمەن ەشقاشان كەزدەسپەگەنىن ايتقان.

وي-پىكىر ەركىندىگى قۇقىعىن قورعاۋ ۇيىمدارىنىڭ حالىقارالىق جەلىسى (IFEX) قازاقستاندىق جۋرناليست جانبولات مامايدىڭ قامالىپ، قۋعىندالىپ جاتقانىنا الاڭداۋشىلىق تانىتتى، دەپ حابارلايدى ازاتتىق. IFEX قازاقستان پرەزيدەنتى نۇرسۇلتان نازاربايەۆتىڭ اتىنا جازعان ۇندەۋىندە مامايدى الماتىداعى تەرگەۋ اباقتىسىندا قىسىم كورگەنى تۋرالى مالىمدەمەنى تەرگەپ، ونى قۋدالاۋدى توقتاتۋعا جانە وعان قاتىستى سوت پروسەسىن ءادىل وتكىزۋگە شاقىردى. IFEX سونىمەن قاتار مالىمدەمەسىندە مامايدىڭ جۇبايىنا دوق كورسەتىلگەنىن تەرگەپ، جۋرناليست پەن ونىڭ وتباسىنىڭ بولاشاقتاعى قاۋىپسىزدىگىنە كەپىلدىك بەرۋگە شاقىردى.

مالىمدەمەگە 29 قۇقىق قورعاۋ ۇيىمى، ونىڭ ىشىندە الماتىداعى «ءادىل ءسوز» ءسوز بوستاندىعىن قورعاۋ ۇيىمى، «ارتيكل 19»، «جۋرناليستەردى قورعاۋ كوميتەتى»، «سەنزۋرا يندەكسى» جانە باسقا دا ۇيىمدار قول قويعان.

اقپاننىڭ سوڭىندا ماماي ادۆوكاتى جانار بالعابايەۆا ارقىلى الماتىداعى تەرگەۋ اباقتىسىندا «باسقا تۇتقىندار تاراپىنان سوققى جەپ، مورالدىق قىسىم كورگەنىن» جەتكىزگەن. مامايعا كىرىپ شىققان ۇلتتىق پريەۆەنتيۆتىك مەحانيزم وكىلدەرى بيلىكتەن ونىڭ قاۋىپسىزدىگىن قامتاماسىز ەتۋدى تالاپ ەتكەن. قۇرامىنا قازاقستاندىق جۋرناليستەر مەن قۇقىق قورعاۋشىلار كىرەتىن مامايدى قورعاۋ كوميتەتى دە ونىڭ قاۋىپسىزدىگىن قامتاماسىز ەتۋدى تالاپ ەتكەن.