قازاقستان حالقىنىڭ دوستىعى مەن بىرلىگى مەيرامىنىڭ قارساڭىندا 1 جانە 2 مامىر كۇندەرى العاش رەت ءى حالىقارالىق «باۋىرجان FEST» ءازىل فەستيۆالى وتەدى دەپ حابارلايدى qamshy.kz.

فەستيۆال اياسىندا 1 مامىر كۇنى استانا قالاسىنداعى «قازاقستان» ورتالىق كونسەرت زالىندا جانە 2 مامىر كۇنى الماتىدا رەسپۋبليكا سارايىندا ەكى كونسەرت بەرىلەدى.

فەستيۆال رەسەيلىك ايگىلى «كريۆوە زەركالو» شوۋىنىڭ جۇلدىزدارى كارەن اۆانەسيان مەن ابيت اسوموۆ، «جووشباي» ءازىل-ساتيرا تاندەمى (قىرعىزستان)، «ميرزو» ءازىل تەاترى (وزبەكستان)، تانىمال «باۋىرجان شوۋ»، «شانشار»، «الداراسپان»، «ەكى ەزۋ» ءازىل تەاترلارىنىڭ جۇلدىزدارى، «نۇر-مۇقاسان»، «مۋزارت» تريوسى، مارجان اراپبايەۆا جانە وزگە دە تانىمال ارتىستەردىڭ قاتىسۋىمەن وتەدى.

سونداي-اق، فەستيۆال اياسىندا قايىرىمدىلىق اكسيالارى، باسپا ءسوز كونفەرەنسيالارى، شىعارماشىلىق ماماندىقتار ستۋدەنتتەرىنە ارنالعان اشىق لەكسيالار، ترەنينگتەر مەن ۆەبينارلار وتكىزىلەتىنى حابارلاندى.

جوبا اۆتورى حالىق ءارتىسى باۋىرجان يبراگيموۆتىڭ ايتۋىنشا، «فەستيۆالدىڭ نەگىزگى ماقساتى – حالىقتى بىرىكتىرىپ، ءبىرتۇتاس ەتەتىن قۇندىلىقتاردى ءازىل ارقىلى كورسەتە وتىرىپ، دوستىق پەن بەرەكە-بىرلىك يدەيالارىن ناسيحاتتاۋ» بولىپ تابىلادى.

«فەستيۆال الىس جانە جاقىن شەتەلدىڭ ايگىلى ارتىستەرىنىڭ قاتىسۋىمەن جىل سايىن وتكىزىلەدى دەپ جوسپارلاپ وتىرمىز»، – دەدى ب. يبراگيموۆ.

شوۋ ءتۇرلى ءازىل جانرلارىنان قۇرالعان قازاق جانە ورىس تىلدەرىندەگى قويىلىمداردان تۇراتىن بولادى. كورەرمەن قاۋىم مۋزىكالىق جانە پاروديالىق ساحنالاردى، مينياتيۋرالار مەن قويىلىمداردى تاماشالاي الادى. ءازىل-سىقاق سالاسىنىڭ تانىمال ارتىستەرى كونسەرت قوناقتارىن جاڭا قويىلىمدارىمەن قۋانتارى انىق.

ءى حالىقارالىق «باۋىرجان FEST» ءازىل فەستيۆالى قازاقستان حالقىنىڭ دوستىعى مەن بىرلىگى مەيرامىنىڭ ەستە قالارلىق ءبىر كورىنىسى بولادى.

ەستەرىڭىزگە سالا كەتەيىك، قازاقستان رەسپۋبليكاسىنىڭ حالىق ءارتىسى باۋىرجان يبراگيموۆ تاۋەلسىز قازاقستانداعى ەسترادالىق ءازىل-سىقاق جانرىنىڭ نەگىزىن قالاۋشىلاردىڭ ءبىرى رەتىندە تانىمال.

باۋىرجان يبراگيموۆ – بيىل 25-جىلدىعىن اتاپ وتكەلى وتىرعان تانىمال «باۋىرجان-شوۋ» ءازىل-سىقاق شوۋى ارقىلى حالىقتىڭ ىستىق ىقىلاسىنا بولەنگەن ءارتىس.