№1 «ساحناگەر» ۇلتتىق تەاتر پرەمياسى 200-دەن اسا وبرازدى سومداعان قازاقستاننىڭ حالىق ءارتىسى ايشا ابدۋلليناعا تاپسىرىلدى. «تەاتر ونەرىن دامىتۋعا قوسقان وراسان زور ەڭبەگى ءۇشىن» نوميناسياسىنداعى ۇلتتىق سىيلىقتى مەملەكەتتىك حاتشى گۇلشارا ءابدىقالىقوۆا تاپسىردى. وتكەن جىلى ءومىرىنىڭ 80 جىلىن تەاترعا ارناعان حالىق ءارتىسى 100-جىلدىق مەرەيتويىن اتاپ وتكەن بولاتىن.

«تەاتر ونەرىن دامىتۋعا قوسقان وراسان زور ەڭبەگى ءۇشىن» نوميناسياسىن العان ايشا ابدۋللينا كورەرمەندەر مەن لاۋرەاتتارعا كوڭىل جاستىعىن تىلەپ، جاس ارتىستەرگە ەڭبەك ەتۋگە، ءوز ىسىنە دەگەن سۇيسپەنشىلىككە شاقىردى.

قازاقستاننىڭ ءبىرتۋار ءارتىسى، قازاقستان ساحناسىنىڭ «العاشقى دەزدەموناسى» ايشا ابدۋللينا 100 جاسىندا دا ءوز كورەرمەندەرىن قۋانتىپ كەلەدى، كەرەمەت ءان سالىپ، ازىل-قالجىڭدارىمەن ءسۇيسىنتتى.

ايشا ابدۋللينا ءتۇرلى جانرلاردا جۇزدەن اسا رولدەردى ويناپ، جەتىستىكتەرگە جەتتى. 26 جاسىندا قازاق ءسسر-نىڭ ەڭبەك سىڭىرگەن ءارتىسى اتاعى بەرىلسە، 1958 جىلى قازاق سسر حالىق ءارتىسى اتاندى.

مەكتەپ بىتىرگەننەن كەيىن، اعاسى پىرمۇحامەد پيانينو مەن سكريپكاعا باۋليدى. اعاسى م.اۋەزوۆ اتىنداعى اكادەميالىق دراما تەاترعا ەرتىپ اكەلەدى دە، ەمتيحاندى ءساتتى تاپسىرتىپ، تەاتر جانىنداعى ەكى جىلدىق ستۋدياعا وقۋعا تۇسىرەدى. ونىڭ ەمتيحان قابىلداۋشىلار - ميحايل گريگوريەۆيچ ناسونوۆ، تەاتر ديرەكتورى بەكوۆ، مۇحتار اۋەزوۆ، ەلۋباي ءومىزاقوۆ تابيعي دارىنىن بىردەن بايقاپ، وقۋعا قابىلدايدى. وسىندا ءامينا ءومىرزاقوۆا، حاديشا بوكەيەۆا، اعايىندى ابدۋلليندەرمەن بىرگە ءبىلىم الادى. 1935-47 جىلدارى اتالعان تەاترعا اكتريسا بولىپ قابىلدانادى. بۇل جەردە «ەڭلىك-كەبەكتە» ەڭلىك، «اقان سەرى-اقتوتىدا» ءمارزيا، ن. ۆ. گوگولدىڭ «ريەۆيزورىندا» ماريا انتونوۆنانىڭ،  ۋ.شەكسپيردىڭ «وتەللوسىندا» دەزدەمونا وبرازدارىن سومدادى.  1947 جىلى م.اۋەزوۆ تەاترىنان وڭتۇستىك قازاقستان وبلىستىق ج.شانين اتىنداعى قازاق دراما تەاترىنا اۋىسىپ. ساحنادا 200-دەن اسا سۇبەلى رولدەر سومدادى. ك.گالدوني «ەكى مىرزاعا ءبىر قىزمەتشى» - بياتريچە، و.بالزاك «وگەي شەشە» - گەرترۋدا، ا.وستروۆسكيي «جازىقسىز ايىپتىلار»- گولچيحا، شەكسپير «رومەو-دجۋلەتتا» - لەدي كاپۋلەتتي، م.اۋەزوۆ «قوبىلاندى»- قۇرتقا سەكىلدى تاريحي تۇلعالارمەن قوسا زاماناۋي رولدەرىمەن كورەرمەن جادىندا ساقتالىپ قالعان ەرەن اكتريسا. ساحنا ساڭلاعى، قازاقستاننىڭ حالىق ءارتىسى، «قۇرمەت بەلگىسى»، «پاراسات» وردەندەرىمەن ماراپاتتالعان.

وسى جىلى قازاقستاندا حالىقارالىق  تەاتر  كۇنى تەاتر ونەرى سالاسىنداعى ەلەۋلى وقيعا – «ساحناگەر-2017» ۇلتتىق تەاتر سىيلىعىن تاپسىرۋ سالتاناتىمەن ەرەكشەلەندى.   قازاقستاندىق «ساحناگەر-2017» ۇلتتىق تەاتر سىيلىعى «سامۇرىق-قازىنا» ۇلتتىق ءال-اۋقات قورى» اق قولداۋىمەن 2017 جىلى   قازاقستان  تەاترلارى  اسسوسياسياسىنىڭ باستاماسىمەن تاعايىندالىپ وتىر. ۇلتتىق سىيلىق تەاتر ءداستۇرىن ساقتاۋ مەن نىعايتۋعا باعىتتالعان.