قازىرگى تاڭدا وزگە ۇلت وكىلدەرىنىڭ بىر-بىرىمەن نەكە قۇرعانىنا تاڭىرقاپ قارامايمىز، ادەتتەگى جاعداي سەكىلدى بولىپ كەتكەن. الايدا، ءبىزدىڭ قاراكوزدەرىمىزدىڭ قىتايلىق ازاماتتارعا تۇرمىسقا شىعۋى ەلدىڭ اشۋىن كەلتىرىپ، شامىنا ءتيىپ جاتىر. جۇڭگو ازاماتىنا كۇيەۋگە شىققان ايجان رايمبەكوۆا ەسىمدى قازاق قىزى كوپشىلىكتىڭ پىكىرىمەن كەلىسپەي، قازىرگى تاڭدا ءوز جارىمەن باقىتتى ءومىر ءسۇرىپ جاتقاندىعىن ايتادى، دەپ حابارلايدى pandaland.kz، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.

«مەن الماتى قالاسىندا تۋعانمىن. №73 ورتا مەكتەپتى ءبىتىرىپ، ءال-فارابي اتىنداعى قازۇۋ-دىڭ شىعىستانۋ فاكۋلتەتىندە وقىدىم.

2007 جىلى ەڭ العاش رەت شەتەلگە شىعىپ، پەكين قالاسىنا باردىم. سول قالادان ءدال قازىرگى جارىمدى كەزدەستىردىم. ول قىتايداعى ستۋدەنتتەر كەڭەسىنىڭ نەگىزىن قالاعان ادام بولدى. باستاپقى كەزدە ءجاي دوس بولىپ جۇردىك، ءبىز ۇيىمداستىرعان ءتۇرلى ءىس-شارالارعا كەلىپ تۇراتىن. پەكين ۋنيۆەرسيتەتىندە قازاق بالارىمەن كوپ دوس بولعاندىقتان، ءبىزدىڭ مادەنيەتىمىز ونىڭ جانىنا جاقىن بولدى. ماگيستراتۋرانى ءتامامداپ، پەكين قالاسىنا جۇمىس جاساۋعا كەلگەننەن سوڭ ءبىر-بىرىمىزدى ۇناتا باستادىق»، - دەيدى ءوز جايىندا ايجان رايمبەكوۆا.

قىزىنىڭ وزگە ۇلت وكىلىمەن تۇرمىس قۇرۋىنا اتا-اناسى قالاي قارادى؟

«باسىندا، ارينە، قورىقتىم، قوبالجىدىم. ءبىر تۇسىنبەيتىنىم، قازاقتار قانشالىقتى قوناقجاي، اشىق-جارقىن حالىق بولعانىمەن، قىتايلىقتاردى سۋ قاندارى سۇيمەيدى. الايدا، مەنىڭ اتا-انام جارىمدى جىلى جۇزبەن قابىل الدى. جۇبايىم ولاردى ادامگەرشىلىگىمەن، ءبىزدىڭ مادەنيەتىمىز بەن داستۇرىمىزگە دەگەن سىيلاستىعىمەن جانە دە قاراپايىمدىلىعىمەن باۋراپ الدى. بىزگە كەدەرگى بولعان ءبىر عانا نارسە – قازاقستاننىڭ بيۋروكراتيالىق اپپاراتى. جۇبايىمنىڭ ۆيزاسىن ۋايىمدايمىن دەپ، بىرنەشە ءتۇن ۇيىقتاي الماي ءجۇردىم»، - دەپ مالىمدەدى ءوزىنىڭ ارالاس نەكەسىنە قاتىستى اتا-اناسىنىڭ كوز قاراسىن.

«قازىرگى تاڭدا ەكى بالام بار: ارسلان مەن تامەرلان. ەكەۋى دە قازاقستان ازاماتتىعىن الىپ، قۇجاتتا ۇلتى قازاق دەپ جازىلعان. جۇبايىم بۇل شەشىمدى قۇپ كورىپ، قولداۋ ءبىلدىردى. بالالارىم جۇڭگو، ورىس جانە اعىلشىن تىلدەرىندە ەركىن سويلەي الادى، ال قازاق ءتىلىنىڭ وڭاي سوزدەرىن تۇسىنەدى. ءوزىم ءبىلىمدى ورىس تىلىندە العان بولسام دا، قازاق تىلىندە اۋى ەكى سويلەۋگە شامام كەلەدى»، - دەپ ءوزىنىڭ بالالارى جايلى دا اڭگىمە قوزعاپ ءوتتى ايجان.

اۋدارعان: نازەركە لابيحان