وتاندىق كينولار سانىن تولىقتىراتىن «سوقىر ماحاببات» اتتى مەلودرامانىڭ شىعۋىنا بايلانىستى بۇگىن، الماتىداعى ورتالىق ستاديون الدىندا ءباسپاسسوز كونفەرەنسياسى ءوتتى دەپ حابارلايدى Qamshy.kz ءتىلشىسى.
6-شى ساۋىردەن باستاپ قازاقستاننىڭ بارلىق كينوتەاترلارىنان "سوقىر ماحاببات" اتتى فيلم كورسەتىلەتىنى تۋرالى حابارلاعان ەدىك.
اشىق اسپان استىندا وتكەن باسپا ءسوز كونفەرەنسياسىنا ءفيلمدى جاساۋشىلار مەن اكتەرلەر قاتىسىپ، فيلم ءتۇسىرىلىمى تۋرالى تانىستىردى، ءوز كەزەگىندە جۋرناليستەر سۇراعىنا جاۋاپ بەردى. اشىق الاڭدا وتكەن كونفەرەنسياعا مەلودرامانىڭ باس پروديۋسەرى ءارى باستى ءرولىن سومداعان سيۆي ماحمۋدي مەن رەنات باسيت، سونداي-اق اكىمشىلىك پروديۋسەر ايدار باتالوۆ، اكتەرلەر سەرىكبول سايلاۋبەك، جان بايجانبايەۆ، نۇرتاس ايداربەكوۆ پەن ونىڭ جارى پروديۋسەر گۇلزيرا ايداربەكوۆ، اكتريسا مارينا سۇلەيمەنوۆالار بولدى.
فيلم سيۋجەتى ارلان اتتى جىگىت (رەنات باسيتوۆ)، تاعدىردىڭ تالكەگىندە ابدەن تەربەلىپ، بارشا قايعى-مۇڭدى باسىنان كەشىرىپ،كورۋ مۇمكىندىگىنەن ايىرىلعان انەلگە (سيۆي ماحمۋدي) عاشىق بولىپ قالادى. الايدا ءبىرىن ءبىرى قۇلاي سۇيگەن ەكى عاشىققا تاعدىر توسقاۋىل ەتكەن تالاي سىناققا دۋشار بولادى. فيلم نەگىزىنەن الماتىدا تۇسىرىلگەن. ءتۇسىرىلىم جۇمىستارى وتكەن جىلى 6 ساۋىردە باستالعان. باستى وقيعاسى قىز بەن جىگىتتىڭ اراسىنداعى اينىماس ماحاباتتى كورسەتەدى. ءفيلمدى جاساۋشىلار وسى ارقىلى ماحابباتتىڭ ءبارىن دە جەڭەتىنىن كورسەتكىسى كەلگەن.
«سوقىر ماحاببات» اتتى سوقىر قىز بەن جىگىت اراسىنداعى سەزىم جايلى فيلم تۋرالى ۇسىنىستى رەنات باسيت جاساعان. «ەكى جارىم جىل بۇرىن كولىك اپاتىنا ءتۇسىپ قالدىم، وزىمە كەلگەنشە ءبىر جارىم جىلداي قينالىپ جاتتىم، سول ۋاقىتتا وسىنداي مەلودرامالىق كينو ءتۇسىرۋ تۋرالى وي تۋدى. تاعدىر تالكەگىن كورگەن جاننىڭ ءومىردى جەڭە الاتىنىن كورسەتەتىن فيلم تۋرالى ويىمدى سيۆي حانىم مەن دوستارىم قولدادى. ءسويتىپ بىرىگىپ، شامامىزدىڭ كەلگەنىنشە وسى كينونى تۇسىردىك. ءبىزدى حالىق قاتتى سىنامايدى دەپ ويلايمىن»، - دەدى رەنات باسيت فيلمگە تۇرتكى ويدىڭ كىمنەن تۋعانى تۋرالى. سيۆي ماحمۋدي ەكەۋىنىڭ العاشقى پروديۋسەرلىك جۇمىسى ەكەنىن ايتقان ول، پروديۋسەرلىك جۇمىستىڭ ەشقانداي قيىندىق تۋدىرماعانىن، ءرول سومداعان ءوز پەرسوناجى دا قاراپايىم ەكەنىن جەتكىزدى. ءفيلمنىڭ ساۋندترەگىنە «ارمانىم-اي» اتتى ءان تاڭدالعان. ءان ءسوزى رينات زايتوۆتىكى، ءانى رەنات ءباسيتتىڭ وزىنىكى.
باستى ايتا كەتەرلىگى، «سوقىر ماحاببات» قازاق تىلىندە تۇسىرىلگەن. ءبىرلى جارىم ورىسشا سوزدەر كەتكەنىمەن فيلم ءتىلى قازاق ءتىلى. ءفيلمدى تۇسىرۋشىلەر «قازاق كينوسى قازاق ەلىندە تۇسكەن اقشاسىن شىعارا المايدى، قازاق كينوسىن ەشكىم كورمەيدى» دەگەندى تەرىسكە شىعارۋ ءۇشىن فيلم قازاق تىلىندە سويلەتكەن.
قايرات نۇرتاستىڭ اكەسى نۇرتاس ايداربەكوۆ فيلمدە باس كەيىپكەر ارلاننىڭ وكىل اكەسى ءارى باپكەرى ءرولىن سومدايدى. ول وسىمەن ءۇشىنشى فيلمدە ءرول الىپ وتىر، قايرات نۇرتاستىڭ «وكىنىش» اتتى فيلمىندە، «اۋىل اكىمى» اتتى فيلمدە ءرول سومداعان. ونەرلى وتباسىنان شىققان نۇرتاس ايداربەكوۆ وتباسىندا ءوزى عانا ونەردى قۋماعانىمەن، كىشكەنتايىنان ونەردەن الىس بولماعانىن ايتادى. نۇرتاس ايداربەكوۆ بالا كەزىندە ورازبەك بودىقوۆتىڭ «قانجار مەن دومبىرا» اتتى 3 اكتىلى سپەكتاكلىندە ءرول سومداعان. ول «سوقىر ماحابباتتىڭ» كوپتىڭ كوڭىلىنەن شىعاتىن كينو بولاتىنىن ايتادى.
ال، باسپا ءسوز ۇستەلىندە نۇرتاس ايداربەكوۆتىڭ جارى پروديۋسەر گۇلزيرا ايداربەكوۆانىڭ الدىنداعى كۋۆەرتكيدە «ءتىل جاناشىرى» دەگەن ءسوز جازىلىپ تۇردى. تانىمال پروديۋسەر ءوزى دە، قايرات نۇرتاس تا مۇمكىندىگىنشە قازاق تىلىندە سۇحبات بەرىپ جۇرگەنىن ايتادى. «ويىمىز ءوسىپ كەلە جاتقان ۇرپاقتارىمىز قايراتقا قاراپ ونەگە السا، ءوز تىلىندە سويلەسە» دەيدى.
مارينا سۇلەيمەنوۆا فيلمدە باستى كەيىپكەر انەلدىڭ قۇربىسى نازىمنىڭ ءرولىن سومدايدى.
باستى ءرولدى سومداعان سيۆي ماحمۋدي سوقىر قىزدىڭ وبرازىن ءساتتى سومداي ءبىلۋ ءۇشىن ەرەكشە دايىندالعان. ءتۇرلى كينولار كورىپ، مامانداردىڭ پىكىرىنە جۇگىنگەن. ءتىپتى زاعيپ قىزدارمەن دە سويلەسكەن.
ءفيلمنىڭ بيۋدجەتى قانشاعا توقتاعانىن جاساۋشىلار جاسىرىپ قالدى. الايدا، اكىمشىلىك پروديۋسەر ايدار باتالوۆ: «ادامدار ءارقاشاندا اقشامەن داۋىس بەرەدى» دەيدى عوي. پروكاتتاعى العاشقى اپتادا ءفيلمنىڭ باعاسى بىلىنەدى. دەگەنمەن، ءفيلمدى اقشا تابۋ ءۇشىن تۇسىرمەدىك» دەپ اتاپ ءوتتى.
باسپا ءسوز كونفەرەنسياسى سوڭىندا رەنات باسيت: «ءبىز اقشانى ويلاپ وتىرعان جوقپىز، قولىمىزدان كەلگەنشە قازاق كينوسىن دامىتۋعا ۇلەس قوسساق دەپ كينونى شىعاردىق. مەنىڭ تاڭعالعانىم، كەيبىر قالالار «ءبىز قازاقشا كينو المايمىز» دەپ تىكەلەي بىزدەن باس تارتتى. مەن قازاق ەلىندە تۇرىپ جاتىرمىز با؟ باسقا جەردە تۇرىپ جاتىرمىز با ءوزىم تۇسىنبەي قالدىم...»، - دەيدى كينوپروكاتى تۋراسىندا.
ال، فيلمدە ارلاننىڭ تەنتەك دوسى بولىپ ءرول سومدايتىن سەرىكبول سايلاۋبەك قازاقشا كينو المايمىز دەگەندەرگە قاراتا:
«دۇنيەدە رۋحى ۇرلانعان،
جىلتىرعا جانى بىلعانعان،
قۇنسىزدار كەتتى كوبەيىپ،
قارىنى ءۇشىن قۇل بولعان» دەيدى عوي. ءبىز قارىنىمىز ءۇشىن جاساپ جاتقان جوقپىز، قازاق كينو يندۋسترياسىن دامىتۋعا كوتەرۋدى ماقسات ەتتىك. قازاق كينوسىن كورمەيمىز دەگەندەرگە تىكەلەي قارسى بولامىز، سولارعا ەرەگەسكەندە تەك قازاق ءتىلدى كينولارعا بارامىز، سىزدەر دە قازاق تىلىنە جاندارىڭىز اشىسا تەك قازاق ءتىلدى كينولاردى كورۋگە بارىڭىزدار!»، - دەپ وتاندىق كينولاردى قولداۋعا شاقىردى. ال، پروديۋسەر گۇلزيرا ايداربەكوۆا «ءبىر-بىرىمىزدىڭ قۋانىشىمىزعا قۋانا بىلەيىك، بار اقشامىزدى جيناپ گولليۆۋدكە بەرگەنشە قازاقشا كينو ءتۇسىرىپ جۇرگەندەردىڭ كينوسىنا بارىپ ولارعا قولداۋ جاسايىق»، - دەدى ءسوز سوڭىندا.
ايتا كەتەر بولساق، «سوقىر ماحاببات» ءفيلمى 6-ساۋىردە قالىڭ كورەرمەنگە جول تارتادى. ءقازىر ونەر يەلەرى تۋىندىنىڭ پرەمەراسىنا قىزۋ دايىندىق جۇرگىزىپ جاتىر.
، ،
