استانا بانكى وتاندىق بانك قىزمەتتەرى نارىعى ءۇشىن بىرەگەي بولىپ تابىلاتىن «قىزعىلت جاعا» اتتى الەۋمەتكە باعدارلانعان جوبانى دايىنداپ وتىر. بۇل جونىندە قازاقستاندا ايەلدەر كاسىپكەرلىگىن دامىتۋ جانە قولداۋعا ارنالعان باسپا ءسوز ءماجىلىسى كەزىندە استانا بانكى باسقارماسىنىڭ ءتوراعاسى ەسكەندىر مايلىبايەۆ مالىمدەدى دەپ حابارلايدى qamshy.kz.
وسىعان وراي ءىس-شاراعا «ايەلدەر كوشباسشىلىعى قورى» قق جوبا جونىندەگى ديرەكتورى سۆەتلانا بوگاتىريەۆا، ورتالىق ازياداعى «بۇۇ – ايەلدەر» قۇرىلىمىنىڭ وكىلى يلەين م.كونكييەۆيچ، دامۋ قورى باسقارماسى ءتوراعاسىنىڭ ورىنباسارى نۇرلان اقشانوۆ قاتىستى.
«ايەلدەر كاسىپكەرلىگىنىڭ بۇكىل ماڭىزدىلىعى مەن وزەكتىلىگىن تۇسىنە وتىرىپ، ءبىزدىڭ نارىقتا تەڭدەسى جوق «قىزعىلت جاعا» اتتى جوبامىزدىڭ ىسكە قوسىلعانىن قۋانىشپەن حابارلايمىز. وسىدان ءبىر جىل بۇرىن ءبىز تاماشا جاعدايلاردى ۇسىناتىن ايەلدەرگە ارنالعان تۇڭعىش كارتالاردى ىسكە قوسقان بولاتىنبىز جانە دە ول ءبىزدىڭ كليەنتتەرىمىز اراسىندا ۇلكەن سۇرانىسقا يە بولدى. ەندى بيىلعى جىلدىڭ ءساۋىر ايىنان باستاپ ايەلدەرگە تيەسىلى كارتالار ارقىلى تاۋارلار مەن قىزمەتتەر قولما-قول اقشاسىز تولەنگەن جاعدايدا بانك ايەلدەر اراسىنداعى كاسىپكەرلىكتى دامىتۋ جانە قولداۋ ءۇشىن كليەنتتىڭ جۇمساعان سوماسىنىڭ 0،7 پايىزىن ايەلدەر كوشباسشىلىعى قورىنا اۋدارىپ وتىراتىن بولادى. بۇل سومانى بانك تولىعىمەن ءوز قارجىسى ەسەبىنەن تولەمەك. ناتيجەسىندە كليەنت تولەم جاساۋ ارقىلى ايەلدەر بيزنەسىن دامىتۋعا ءوز ۇلەسىن قوسادى، سونداي-اق، وعان ادەتكى مولشەردە كەشبەك سوماسى قايتارىلادى. قورعا كومەك كورسەتۋ ءۇشىن ەڭ باستىسى تولەم ايەلدەرگە تيەسىلى كارتادان جاسالۋ كەرەكتىگىن ەسكەرۋ قاجەت. وسىلايشا يگى ىسكە كليەنت تە، بانك تە اتسالىسپاق»، - دەپ اتاپ ءوتتى مايلىبايەۆ مىرزا.
سونداي-اق، قوسىمشا حابارلانىپ وتىرعانداي، ايەلدەرگە بيزنەس جۇرگىزۋگە قاتىستى پايدالى اقپاراتتى ۇسىنۋ ءۇشىن ءساۋىردىڭ ءبىرىنشى كۇنى www.pinkproject.kz اتتى بىرەگەي ۆەب-الاڭ ىسكە قوسىلماق. سايتتا ايەلدەر كاسىپكەرلىگىن قارجىلاندىرۋ باعدارلامالارىنا قاتىستى بۇكىل اقپارات قامتىلاتىن بولادى. سونداي-اق، وسىندا ايەلدەرگە ارنالعان سۇيىكتى سايتتاردى توپتاستىرىپ، جاڭالىقتاردى قاداعالاۋعا مۇمكىندىك بەرەتىن جاڭالىقتار اگرەگاتورى دا قىزمەت جاساماق. كاسىپكەر ايەلدەر جەكە بلوگتارىن جۇرگىزىپ، تاجىريبەسىمەن، يدەيالارىمەن بولىسۋگە، سەرىكتەستەردى تاۋىپ، قاجەتتى بايلانىستاردى ورناتۋعا مۇمكىندىك الاتىن بولادى. سونىمەن قاتار، سايت ارقىلى قارجىلىق جانە زاڭگەرلىك ماسەلەلەرگە قاتىستى كەڭەس الۋعا دا بولادى. جەكە كاسىپكەرلىكتى، جاۋاپكەرشىلىگى شەكتەۋلى سەرىكتەستىكتى نەمەسە بانكتە شوتتى قالاي اشۋعا بولادى؟ ەلەكتروندىق ساندىق قولتاڭبانى قالاي الۋعا بولادى نەمەسە سالىق سالۋ ۇلگىسى قالاي تولتىرىلادى؟ وسى جانە باسقا دا كوپتەگەن ساۋالداردى ونلاين-مەنەدجەرلەردەن سۇراپ بىلۋگە بولادى.
ايەلدەر كوشباسشىلىعى قورىنىڭ جوبا جونىندەگى ديرەكتورى سۆەتلانا بوگاتىريەۆا كاسىپكەر ايەلدەردى وقىتۋعا انالعان الەۋمەتتىك جوباعا قولداۋ كورسەتىپ وتىرعانى ءۇشىن استانا بانكىنە زور العىسىن ءبىلدىردى. «وسى جوبانىڭ ارقاسىندا قازاقستاننىڭ الماتى، استانا، قاراعاندى، ورال جانە شىمكەنت سەكىلدى 5 قالاسىندا وقىتۋ كونفەرنسيالارى وتكىزىلمەك. ءبىز الماتى قالاسىندا 3 جىل ىشىندە جيناقتالعان تاجىريبە نەگىزىندە يگەرىلىپ، كاسىپكەر ايەلدەردىڭ قاجەتتىلىكتەرى مەن ۇمىتتەرىن زەرتتەۋگە نەگىزدەلگەن تاسىلدەمەنى قولدانباقپىز. وسى فورمات اياسىندا كاسىبي سپيكەرلەر جانە كاسىپكەر ايەلدەر ءبىزدىڭ ەلىمىزدە جيناقتاعان تاجىريبەسىمەن ءبولىسىپ، ءبىر-بىرىن وقىتاتىن بولادى. بۇل تاسىلدەمە ءوزىنىڭ ناتيجەلىگىن كورسەتتى، ال ەندى استانا بانكىنىڭ قولداۋى ارقاسىندا قازاقستان وڭىرلەرىندەگى ايەلدەر دە كاسىپكەرلەر قاۋىمداستىعىنا قوسىلىپ، ايەلدەر بيزنەسى ءۇشىن اسا ماڭىزدى ءارى وزەكتى اقپاراتتار مەن بىلىمدەردى الۋعا مۇمكىندىگى بار»، - دەدى بوگاتىريەۆا حانىم.
وسىعان دەيىن ءبىزدىڭ ەلىمىزدە «ايەلدەر كاسىپكەرلىگى» دەگەن ۇعىمنىڭ وزىنە كۇمانمەن قارايتىن، ال بۇگىندە ايەلدەردىڭ ىسكەرلىك كەڭەستەرى قۇرىلىپ، ايەلدەر توبىنا ارنالعان ارنايى بانك ونىمدەرى مەن باعدارلامالارى پايدا بولۋدا. وسى تۇستاستا ايەلدەردىڭ كاسىپكەرلىگىن قولدايتىن قۇرالداردى دايىنداۋ كەزىندە ايەلدەردىڭ بارلىق قاجەتتىلىكتەرى مەن ولاردىڭ جۇرگىزەتىن بيزنەسىنىڭ ەرەكشەلىكتەرىن ەسكەرەتىن گەندەرلىك تاسىلدەمە تولىعىمەن قولدانىلماي كەلەدى. شىنتۋايتىندا، ايەلدەر كاسىپكەرلىگى – قازاقستاننىڭ ەكونوميكالىق ءوسۋى ءۇشىن وراسان زور الەۋەتكە يە سالا. وتكەن جىلى بۇكىل الەمدە ايەلدەر اراسىنداعى كاسىپكەرلىكتىڭ قارقىندى تۇردە وسكەنى اتاپ وتىلگەن بولاتىن. ءدال وسىنداي بەتالىس قازاقستاندا دا بايقالىپ وتىر. قازاقستان رەسپۋبليكاسى ۇلتتىق ەكونوميكا مينيسترلىگىنىڭ مالىمەتتەرى بويىنشا ايەلدەردىڭ باسقارۋىنداعى ورتا جانە شاعىن كاسىپكەرلىك سانى 2016 جىلدىڭ 1 قاڭتارىندا 647،082 ادامدى قۇراعان، ال جالپى ەلىمىز بويىنشا 1،530،258 شاعىن جانە ورتا بيزنەس سۋبەكتىسى قىزمەت ەتەدى. الەمنىڭ 20 ەلىندە وتكىزىلگەن 87 زەرتتەۋ ناتيجەلەرىنە سايكەس ايەلدەر باسقاراتىن كاسىپورىندار ەڭ تابىستى بولاتىنى انىقتالعان. زەرتتەۋشىلەر بيزنەسپەن اينالىساتىن ايەلدەر قولاستىنداعى قىزمەتكەرلەرى، قوعام جانە قورشاعان ورتانىڭ قامىن كوبىرەك ويلايتىنىن مويىنداۋدا.
«ايەلدەر كوشباسشىلىعى قورىمەن بىرگە وسى جوبانى جۇزەگە اسىرۋ كەزىندە ءبىز مەگاپوليستەردەگى ايەلدەردى عانا ەمەس، سونداي-اق، ەلىمىزدىڭ وڭىرلەرىندەگى ىسكەر حانىمداردى بارىنشا قامتىپ، وسى ىسكە تارتۋدى كوزدەدىك. 5 قالادا كونفەرەنسيالاردى وتكىزۋ ارقىلى ءبىز بۇكىل قازاقستاننان ەڭ كەم دەگەندە 500 ايەلدى وقىتۋدى جوسپارلاپ وتىرمىز. وسى جوبانى جۇزەگە اسىرۋ ەلىمىزدە ايەلدەر اراسىنداعى كاسىپكەرلىكتىڭ دامۋىنا جاڭا قوزعاۋ سالاتىنىنا سەنىمدىمىز»، - دەپ ءسوزىن قورىتىندىلادى مايلىبايەۆ مىرزا.
پىكىر قالدىرۋ