ارىستانبەك مۇحامەدي ۇلىنىڭ ايتۋىنشا، قازاقستاندىقتارعا شەتەلدىك ءانشى رياننانىڭ ەش قاجەتى جوق، دەپ حابارلايدى ينفورمبيۋرو، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.
مادەنيەت ءمينيسترى ارىستانبەك مۇحامەدي ۇلى ەكسپو قارساڭىندا استانا قالاسىندا رياننانىڭ ءوتۋى مۇمكىن كونسەرتىنە قاتىستى مالىمدەمە جاسادى.
«رياننانىڭ ەشقانداي دا كونسەرتىن ءبىز ۇيىمداستىرىپ جاتقان جوقپىز. ءبىز ديماش قۇدايبەرگەنوۆتى، قانات يسلامدى، La Scala، پلاسيدو دومينگو جانە باسقالارىن ۇيىمداستىرىپ جاتىرمىز»، - دەپ مالىمدەدى ول.
ب ا ق وكىلدەرى مينيسترلىكتىڭ سايتىندا جاريالانعان رياننانىڭ كونسەرتىنە قاتىستى اقپاراتتى تەكسەرىپ كوردى. ءمينيستردىڭ ويىنشا، تەحنيكالىق قاتەلىكتەر جىبەرىلگەن بولۋى مۇمكىن.
«بۇل – تەحنيكالىق قاتەلىكتەر شىعار، بۇلاي بولۋى مۇمكىن ەمەس. بالكىم، بىرەۋ مۇنداي اقپاراتتى ادەيى جۇكتەپ قويعان. شىنىمدى ايتسام، بارلىق ۇيىمداستىرۋ شارالارىمەن ءوزىم اينالىسىپ جاتىرمىن. رياننانىڭ بىزگە نە قاجەتى بار؟ مينيسترلىككە جۇكتەلگەن مىندەت – ەكسپو-نىڭ ۇيىمداستىرىپ جاتقان بارلىق شارالارى، بۇل ىسكە بارلىق قالا جانە ءبىز بىرلەسىپ جۇمىس اتقارىپ جاتىرمىز»، - دەپ تۇسىندىرە كەتتى ارىستانبەك مۇحامەدي ۇلى.
بارلىق باعدارلامالاردىڭ جيىنتىعىنا «استانا ەكسپو-22017» اق جاۋاپتى ەكەنىن ايتىپ ءوتتى.
«مۇمكىن بۇل جيناقتا رياننانىڭ كونسەرتى تۇرعان بولار. بۇل – جالپى باعدارلامالاردىڭ جيىنتىعى»، - دەدى مادەنيەت ءمينيسترى.
سونىمەن قاتار، ول باسشىلىق ەتىپ وتىرعان ءبولىم رياننانىڭ كونسەرتىن ۇيىمداستىرۋشىلار ەمەس ەكەنىن قوسا ايتتى.
«ونى مادەنيەت مينيسترلىگى وتكىزبەيدى»، - دەدى مينيستر.
ەستەرىڭىزگە سالا كەتسەك، مادەنيەت جانە سپورت مينيسترلىگىنىڭ سايتىندا 6 شىلدە كۇنى رياننانىڭ كونسەرتى وتەدى دەگەن اقپارات جارىق كورگەن بولاتىن.
بىرنەشە ۋاقىتتان سوڭ سايت بەتىندەگى اقپارات جوعالىپ كەتتى، ال مادەنيەت مينيسترلىگى استانا قالاسىندا رياننانىڭ كونسەرتى وتپەيتىندىگىن حابارلادى.
اۋدارعان: نازەركە لابيحان
