30 ناۋرىزدا مۇحتار اۋەزوۆ اتىنداعى تەاتردىڭ «سىرلاسۋ» زالىندا جاس اقىن ءمولدىر ايتبايدىڭ «سىيلىق» اتتى كىتابىنىڭ تۇساۋكەسەرى ءوتتى. كەش جۇرگىزۋشىسى باقىت بەدەلحان، ال كىتاپتىڭ تۇساۋىن كەسكەن يران-عايىپ.
سونداي-اق، ادەبي كەشكە مۇحتار اۋەزوۆ تەاترىنىڭ بەلىگىلى اكتەرى بەكجان تۇرىس قاتىستى. اقىنعا جىلى لەبىزىن ءبىلدىرىپ، اق باتاسىن بەردى.
ودان بولەك، قالانىڭ جاس اقىندارى، انشىلەرى كەلىپ، ءبىرى ءمولدىر ايتبايدىڭ ولەڭدەرىن وقىپ تەبىرەنتسە، ەندى ءبىرى ولەڭدەرىنە جازىلعان اندەرىن ورىنداپ، حالىقتىڭ كوڭىلىن مارقايتتى.
جاستاردىڭ بۇل ارەكەتىنە اقىن باقىت بەدەلحان ريزا بولدى.
«اقىن، ءانشى، كومپوزيتور، اكتەر – تورتەۋى بىر-بىرىمەن بايلانىسىپ، ءبىر تۋدىڭ استىندا بولۋى كەرەك.وسى ءتورت جۇلدىز بىر-بىرىنە قولداۋ كورسەتسە، سول ىنتىماعىنىڭ ارقاسىندا ءبىرتالاي جەرگە جەتەتىن ەدى» دەپ اقىلىن ايتتى.
كەش بارىسىندا، اقىن ءوزىنىڭ جىرلارىن وقىدى.
«ولەڭ جازسام، وشىرگەنىم وتىمدى،
ءۇنسىز قالسام، قورقىڭدار...»، دەيدى اقىن ءبىر ولەڭىندە. ءيا، بار اقىنعا ءتان قاسيەت – نازىكتىك پەن مىقتىلىق. وسى ەكەۋىن ۇشتاستىرا بىلگەن اقىن عانا كوپتىڭ كوڭىلىنەن شىعىپ، ۇلكەننىڭ باتاسىن الماق. ءمولدىردىڭ جىر-جيناقتارىنان دا وسى قاسيەتتەردى بايقاۋعا بولادى.
ايتا كەتەيىك، ءمولدىر ايتباي ءابدۋماناپ قىزى 1991 جىلى 26 قاراشادا قىزىلوردا قالاسىندا دۇنيەگە كەلگەن. اقىندىق ونەر مولدىرگە اناسىنان دارىعان. ءار انا ءۇشىن باقىتتىڭ، قۋانىشتىڭ ەڭ بيىگى – بالاسىنىڭ جەتكەن جەتىستىگى. كىتاپتىڭ تۇساۋكەسەرىنە ءمولدىردىڭ اناسى قازىنا اپاي دا قاتىسىپ، قىزىنىڭ قۋانىشىمەن ءبولىستى. جىلى لەبىزىن ارناپ، قۋانىشتان كوزىنە جاس الدى.
انادان دارىعان اقىندىق ونەردىڭ بيىگىنە تالپىنىپ كەلە جاتقان ءمولدىر بىرنەشە وبلىستىق، رەسپۋبليكالىق، حالىقارالىق جىر ءمۇشايرالارى مەن اقىندار ايتىسىنىڭ جۇلدەگەرى. بۇعان دەيىن «ءمولدىر ولەڭ» اتتى پوەزيا جيناعى جارىق كورگەن. ەندى، مىنە «سىيلىق» اتتى جيناعىنىڭ تۇساۋى كەسىلدى.
جاس اقىنعا شابىتىڭىز تاۋسىلماسىن، وقىرماندارىڭىزدىڭ سانى ارتسىن دەگەن ىستىق لەبىزمىزدى بىلدىرەمىز.
قامشىگەر: گۇلىم جاقان
