2015 جىلى مامىر ايىندا  youtube.com الەۋمەتتىك جەلىسىندە ءاتى-جونى بەلگىسىز اۆتور سولتۇستىك اۆستراليادا ورنالاسقان ورمانداردىڭ بىرىندە ءۇي سالىپ، جابايى تابيعاتتا ءومر ءسۇرۋدىڭ العى شارتتارىن ءوزىنىڭ كورەرمەندەرىنە ءتۇسىرىپ كورسەتە باستاعان بولاتىن. ەكى جىل بويى ونىڭ العاشقى  ۆيدەوسىن 18،7 ميلليون ادام كورىپ تاستاعان.  بۇل تۋرالى «قامشى» پورتالى lenta.ru-عا سىلتەمە جاساپ حابارلايدى.

ال بۇگىن ءاتى-جونى بەلگىسىز بلوگەردىڭ كورەرمەندەرى ءوسىپ، كوپتەگەن ۆيدەوجازبالار ءتۇسىرىلىپ ۇلگەرگەن. 

Primitive Technology كانالىنىڭ ۆيدەولارىن ءبىرىنشى رەت كورگەن كورەرمەنگە جابايى تابيعاتتا ءتىرى قالۋدىڭ امالدارىن جاساپ جۇرگەن ادام بولىپ كورىنۋى مۇمكىن. الايدا بۇل بلوگەر ءوزىنىڭ شىن ەسىمىن جاسىرىپ، تىلدەسۋ، سۇحباتتاردان قاشادى ەكەن.

اۆتوردىڭ ايتۋىنشا ول ورماندا تۇرمايدى، تەك ءوزىنىڭ جۇمىستارىن جاساۋ ءۇشىن سوندا بارىپ تىنىشتىقتا وتىرعاندى جاقسى كورەدى ەكەن.

بلوگەر تۇسىرەتىن ۆيدەولاردىڭ ەرەكشەلىگى – ءسوزسىز جازبالار جاساۋى. ياعني، اۆتور ۆيدەودا مۇلدەم سويلەمەيدى.

ۆيدەو استىندا تولىق تۇسىندىرمە جازباسىن قالدىرادى. وندا جابايى تابيعاتتا قالاي ءومىر سۇرۋگە بولاتىن، ءۇيدى قالاي سالۋعا بولاتىنىن، تاماقتانۋعا، بەلگىلى-بىر قۇرالدىردى جاساۋعا ۇيرەتەدى.

قارۋ-جاراق جاساۋدى ۇناتاتىن بلوگەردىڭ قانجىعاسىندا تازا تابيعي قولدان جاسالعان ساداق، ساداق وقتارى جانە ت.ب بار.

ۆيدەوجازبالارىنىڭ بىرىندە اۆستراليالىق بلوگەر جابايى تابيعاتتا تاماقتانۋ جايىندا: سۋدان بالىق، سۋشاياندى قالاي اۋلاۋ كەرەكتىگىن تۇسىندىرەدى.

بۇل ۆيدەوجازبالاردىڭ استىنا كوپ قولدانۋشىلار وزدەرىنىڭ جاقسى پىكىرلەرىن قالدىرىپ، اۆتورعا تاڭقالىستارىن جاسىرمايدى. قازىرگى كەزدە ەلەكت ەنەرگياسىنا، ينتەرنەتكە تاۋەلدى ادامدار قاراپايىم وت جاعۋدىڭ ءوزىن بىلمەيدى دەيدى قولدانۋشىلار.

Primitive Technology  YouTube جەلىسىندەگى تانىمدىق ءارى پايدالى كانالداردىڭ ءبىرى رەتىندە باعالانىپ، قولدانۋشىلاردىڭ كوڭىلىنەن شىعىپ وتىر.

قولدانۋشىلار تاراپىنان «ەندى مەن ورماندا جالعىز قالىپ ءۇي سالۋدى، كارتوپ ءوسىرۋدى دە ءبىلىپ الدىم. راقمەت ساعان ءۇنسىز بلوگەر» دەگەن سەكىلدى پىكىرلەر كوپ كەزدەسەدى.