اتا-انا ءۇشىن ەڭ باستىسى – بالاسىنا تاربيە بەرىپ قانا قويماي، ونىمەن جاقىن دوس بولا ءبىلۋ. كانزاستىق كىشكەنتاي گابريەل ەسىمدى بالاقايدىڭ اكەسىنىڭ ىستەگەنى ناعىز ازاماتقا ءتان قاسيەت. 2015 جىلدىڭ ناۋرىزىندا سەگىز جاستاعى بالانىڭ ميىندا ىسىك بار دەگەن دياگنوز قويىلدى. قۋانىشقا وراي، بالاعا وتا جاسالىپ، ميىنداعى ىسىكتى الىپ تاستايدى. الايدا دەرتى تارقاي قويماعان.

وتادان كەيىن حيميوتەراپيا جاساتىپ، گابريەلدىڭ شاشىن تاقىرلاپ الىپ تاستايدى. ال، قۇلاعىنىڭ تۇبىندەگى تىرتىق سىرت كوزگە قاتتى كورىنىپ تۇراتىن. سول ءۇشىن گابريەل مەكتەپتە ىڭعايسىزدانىپ جۇرەتىن. ءوزىنىڭ دوستارىنان الشقاتاپ، ەشكىممەن ارالاسپايتىن بولىپ كەتەدى. سەبەبى، ءبارى ونىڭ تىرتىعىنا قاراپ، مازاقتاعانداي كورىنەتىن.

ءسويتىپ، بالانىڭ اكەسى دجاش مارشال ءدال بالاسىنىڭ تىرتىعىنداي تاتۋ باسىنا تاتۋ جاساتادى.

«مەنىڭ ۇلىم وتادان كەيىن تىم ۇياڭ بولىپ كەتتى. ءوزىن قۇددى ءبىر قۇبىجىقتاي سەزىنەتىن. سودان مەن دە ءدال بالام سەكىلدى تىرتىق جاساپ الۋعا بەل بايلادىم. جۇرتتىڭ ۇرەيلى نازارى بالامدا عانا ەمەس، ەكەۋمىزگە بىردەي اۋسىن» دەيدى اكەسى.

اكە مەن بالانىڭ باسىندا بىردەي تىرتىعى بار سۋرەتى عالامتور بەتىندە كەڭىنەن جايىلدى. بۇنى كورگەن جۇرت اكەنىڭ ىستەگەنىنە سۇيسىنە قارادى.

اكەنىڭ بۇل ارەكەتى – جاي عانا ءسوز قىلاتىن دۇنيە ەمەس، باعا جەتپەس ءىس. ءتىپتى، الەۋمەتتىك جەلى قولدانۋشىلارى ونى «جىل اكەسى» دەپ اتاپ كەتكەن ەكەن.