وسكەمەندەگى شەشەك اسۋىندا بولعان اتىستا قازا تاپقان ەكى ەر ادامنىڭ دەنەلەرى تابىلدى. كۇدىكتىلەر ولاردىڭ دەنەلەرىن دارەتحاناعا ارنالعان شۇڭقىرعا تىعىپ قويعان، - دەپ حابارلايدى «قامشى» اقپاراتتىق اگەنتتىگى Tengrinews.kz تىلشىسىنە سىلتەمە جاساي وتىرىپ. "قازا تاپقانداردىڭ دەنەلەرى قالا ماڭىنداعى اۋىل جاقتان تابىلدى. الدىن-الا مالىمەت بويىنشا، كۇدىكتىلەر ەر ادامداردىڭ دەنەلەرىن دارەتحانا ءۇشىن سالىنىپ جاتقان شۇڭقىرعا تىعىپ كەتكەن. ءقازىر قاجەتتى ساراپتامالار تاعايىندالدى. بۇگىن پروكۋرور باعبان تايىمبەتوۆ كوڭىل ايتۋ ءۇشىن قازا تاپقانداردىڭ تۋىستارىمەن كەزدەسىپ، جانتۇرشىگەرلىك قىلمىسقا قاتىستى تەرگەۋدىڭ قالاي جۇرگىزىلىپ جاتقانىن ايتىپ بەرەدى"، - دەدى شقو پروكۋراتۋراسىنىڭ باسپا ءسوز قىزمەتىندەگىلەر. ەسكە سالا كەتەيىك، وسىعان دەيىن وسكەمەندەگى اعايىندى جىگىتتەردىڭ ولىمىنە جوعارعى سوت پەن ءىىد قىزمەتكەرلەرىنىڭ قاتىستى بولۋى مۇمكىن ەكەنى ايتىلعان بولاتىن. "2017 جىلدىڭ 31 ناۋرىزىندا شىعىس قازاقستان وبلىسى تەرگەۋ باسقارماسى وسكەمەننىڭ ەكى تۇرعىنىنىڭ ولىمىنە قاتىستى تەرگەۋ باستادى. الدىن-الا مالىمەت بويىنشا، قازا بولعانداردىڭ ءبىرى بۇرىن س. ەسىمدى قارجى پوليسياسى مەن جوعارعى سوتتىڭ قاۋىپسىزدىك قىزمەتىندە ىستەگەن استانا تۇرعىنىمەن جانجالداسىپ قالعان. جانجال كەزىندە استانالىق ولاردى اتىپ تاستاعان. اسا اۋىر قىلمىسقا قاتىسى بار كۇدىكتى قاماۋعا الىندى"، - دەلىنگەن ەدى پروكۋراتۋرا حابارلاماسىندا.