قىتايدىڭ «Singer 2017» انشىلەر باسەكەسىنىڭ اقتىق سىنىندا ديماش قۇدايبەرگەن شاڭ ۆەنجەمەن (尚雯婕) بىرگە ءان شىرقايدى، دەپ حابارلايدى «قامشى» اقپاراتتىق اگەنتتىنى قازاقپارات تىلشىسىنە سىلتەمە جاساي وتىرىپ.

بۇعان دەيىن حابارلاعانىمىزداي، ديماش بايقاۋدىڭ جارتىلاي فينالىندا يتاليالىق ءانشى ادريانو چەلەنتانونىڭ «Confessa» ءانىن جانە «5-ەلەمەنتتەگى» اريانى قوسا شىرقاپ، اقتىق باسەكەگە سۇرىنبەي جەتتى. قىتايلىق Sina weibo الەۋمەتتىك جەلىسىندەگى اقپاراتقا سەنسەك، بايقاۋدىڭ اقتىق باسەكەسىنە جولداما العان 8 ءانشى جۇڭگو ەستراداسىنىڭ جۇلدىزدارىمەن جۇپ بولىپ ونەر كورسەتەدى. ايتا كەتەيىك، شاڭ ۆەنجە 1982 جىلى شاڭحاي قالاسىندا تۋعان. شانحاي فۋدان ۋنيۆەرسيتەتىن بىتىرگەننەن كەيىن انشىلىك جولىن باستاعان. فرانسۋز جانە اعىلشىن تىلدەرىن جەتىك مەڭگەرگەن. 2006 جىلى حۋنان تەلەارناسىنىڭ «Super Girl» ءان بايقاۋىندا باس جۇلدەنى جەڭىپ العان، سونداي-اق، 2013 جىلى «I am singer» بايقاۋىنىڭ العاشقى ماۋسىمىندا ونەر كورسەتكەن. 2012 جىلى پاريج قالاسىندا فرانسۋز اندەرى مۋزىكالىق كەشىن وتكىزگەن. ديماش قۇدايبەرگەن كەلىسىمشارتقا وتىرعان BGTalent (黑金经纪) پروديۋسەرلىك كومپانياسىنىڭ نەگىزىن قالاۋشى. ەسكە سالا كەتەيىك، «Singer» بايقاۋىنىڭ جارتىلاي فينالى حۋنان تەلەارناسىنان 8 ءساۋىر كۇنى كورسەتىلەدى. بايقاۋدىڭ فينالىن 15 ءساۋىر كۇنى وتاندىق حابار ارناسىنان جانە حۋنان تەلەارناسىنان تىكەلەي ەفيردەن تاماشالاۋعا بولادى.