الماتى مەن الماتى وبلىسىنىڭ شەكاراسىندا ورنالاسقان كارەرنايا كوشەسىندە جول اپاتى بولدى دەپ حابارلايدى «قامشى» اقپاراتتىق اگەنتتىگى patrul.kz-كە سىلتەمە جاساپ.
ەرلى-زايىپتىلار جۇمىستان شىعىپ، ۇيلەرىنە قاراي كەلە جاتقاندا ەر ادام جولدان جۇگىرىپ وتپەك بولعان. سول كەزدە ەر ادامدى كولىك قاعىپ كەتتى. كولىك جۇرگىزۋشىسىنىڭ جىلدامدىقتى اسىرىپ كەلە جاتقانى دا انىقتالدى. ەر ادام سول جەردە كوز جۇمدى. سوققىنىڭ قاتتى بولعانى سونشالىق كولىكتىڭ كاپوتى مايىسىپ كەتكەن، ەر ادام باسىمەن سوقتىعىسقان كولىك اينەگى قاتتى شىتىناعان.
كوز الدىندا كۇيەۋىن قاعىپ كەتكەنىن كورگەن ايەلىنە مەديسينالىق كومەك كورسەتىلدى. ءبىر ساعات بويى ايەلى وز-وزىنە كەلە الماعان. قايتىس بولعان ەر ادام التى بالانىڭ اكەسى ەكەن.
تەكسەرىس بارىسىندا اپات بولعان كارەرنايا كوشەسىندە جارىقتاندىرۋ ناشار ەكەنى دە انىقتالدى. ءقازىر سوتقا دەيىنگى تەكسەرۋ جۇمىستارى جۇرگىزىلىپ جاتىر.
