ءان الەمىنە تاعى ءبىر سازدى اۋەن قوسىلدى. قازاقتىڭ بۇكىل مۋزىكاسى - ساعىنىشتىڭ سازى. التاي مەن اتىراۋدىڭ اراسىنداعى ۇلانعايىر دالانى مەكەندەگەن الاش جۇرتى كوپ دۇنيەنى ءان ارقىلى جەتكىزگەن. سونداي ءبىر جۇرەك تەربەتەر، مۇڭى مەن سىرىن اۋەنگە جاسىرعان "ءتاڭىرتاۋ" ءانى جارىققا شىقتى. ءان اۆتورى - قازاق ەلىندە ازاماتتىق بەلسەندىلىگىمەن، ەلدىك، ۇلتتىق ماسەلەلەرگە بەيجاي قارامايتىن مەملەكەتشىل ۇستانىمىمەن تانىلعان ەرلان تولەۋباي. بۇل كۇندە جۋرناليستيكا سالاسىندا ەسىمى ەلگە تانىس ەرلان مىرزا سوڭعى كەزدەرى قازاق ءان الەمىنىڭ دە ەسىگىن ەپپەن اشىپ، حالىقتىڭ ءداستۇرلى دالالىق سارىنىن جاڭاشا جەتكىزىپ ءجۇر. "ءتاڭىرتاۋ" ءانى ەرلان مىرزانىڭ تۋعان جەرى بوعداعا ارناعان كەزەكتى سالەمى!
ەرلان تولەۋبايدىڭ "اۋىلعا ساعىنىش"، "ساعان كەلدىم اتاجۇرت" سىندى جان قالاۋىمەن جارىق كورگەن اۋەندەرى بيبىگۇل قيلىمحان سىندى بۇلبۇل كومەي انشىلەردىڭ ورىنداۋىمەن جۇرت جۇرەگىنەن ورىن تاپتى. ال ءقازىر تۇساۋى كەسىلىپ جاتقان "ءتاڭىرتاۋ" ءانى دە ارعى-بەرگى قازاققا جات ەمەس، جاقىن اتاۋ. ءان ءسوزىنىڭ اۆتورى - قىتايداعى بەلگىلى اقىن ىقىلاس ورازباي. ايتا كەتەرلىگى "ءتاڭىرتاۋدى" بۇعان دەيىن ەرەكەڭنىڭ "اۋىلعا ساعىنىشىن" تاتارستاننىڭ قازان قالاسىندا ورىنداپ، تىڭدارمانداردىڭ قۇلاق قۇرىشىن قاندىرعان بازارباي مۇرات ۇلى ورىندادى. ول ازامات تا بوعدانىڭ كۇنگەيىندە سانجى وبلىسى، شونجى اۋدانى، قاراساي قىستاعىنىڭ تۋماسى. ءقازىر رەسەي فەدەراسياسى، قازان قالاسى كونسەرۆاتورياسىنىڭ ۆوكال ءان بولىمىندە سوڭعى كۋرس ستۋدەنتى. ءبىر قانشا رەتكى رەسپۋبليكالىق، حالىقارالىق كونكۋرستاردىڭ جەڭىمپازى. اۆستراليا، تۇركيا، رەسەيدىڭ ءتۇرلى قالالارىندا كوپتەگەن كونكۋرستار مەن فەستيۆالدارگە قاتىسقان. "كەزىندە ايگىلى عۇلاما، اقىت قاجى ءۇلىمجى ۇلىنىڭ كىتابى العاش باسىلعان كونە قازان قالاسىندا مەنىڭ ءانىم شىرقالعانىنا وتە قۋانىشتىمىن" دەيدى ەرلان تولەۋباي مىرزا.
ءان - حالىق قازىناسى. ونىڭ ومىرشەڭدىگى جۇرت جۇرەگىنەن ورىن تابا بىلۋىندە. "قامشىگەر" ەرلان تولەۋباي مىرزانىڭ "ءتاڭىرتاۋ" ءانىن سول بيىكتەن كورۋ بارىمىزگە ءناسىپ بولسىن!
