ەۋرازيالىق توپ (ERG) قوستاناي وبلىسىندا ستۋدەنتتىك ورتادا جاستار كاسىپكەرلىگىنىڭ ەكوجۇيەسىن قۇرۋ جوباسىن قولعا الدى. كومپانيانىڭ تىڭ باستاماسى ستۋدەنتتىك كاسىپكەرلىكتى دامىتۋعا ارنالعان دوڭگەلەك ۇستەل بارىسىندا كوپشىلىككە تانىستىرىلدى دەپ حابارلايدى "قامشى" اقپاراتتىق اگەنتتىگى.
تالقىلاۋعا Eurasian Resources Group، ايماقتىق كاسىپكەرلەر پالاتاسىنىڭ ديرەكسياسى، قوستاناي وبلىسىنىڭ اكىمدىگى، ءبىلىم باسقارماسى، رەسپۋبليكالىق جانە وبلىستىق بىرلەستىكتەر، ايماقتاعى جوعارى وقۋ ورىندارى مەن جەرگىلىكتى بيزنەس قاۋىمداستىعىنىڭ وكىلدەرى قاتىستى.
ەۋرازيالىق توپ كەلەشەك 4.0 يندۋسترياسىنىڭ نەگىزگى قاتەرى – حالىقتى ەڭبەكپەن قامتۋ دەپ ءبىلىپ، وسى تۇيتكىلدى ءىستىڭ ءتۇيىنىن تارقاتۋ ءۇشىن تىڭ شەشىم – شاعىن قالالارداعى بەلسەندى ءارى ىسكەر جاستاردى دامىتۋدى ۇسىنىپ وتىر. وسى ورايدا، بيزنەستى جۇرگىزۋدىڭ الەۋمەتتىك جاۋاپكەرشىلىگى قاعيدالارىنا سۇيەنەتىن ERG كومپانيالارى وزدەرى ورنالاسقان وڭىرلەردەگى جوعارعى وقۋ ورىندارىنىڭ كاسىپكەرلىك باعىتقا يكەمدەلىپ، ترانسفورماسيالانۋى قولعابىس ەتىپ، «ستۋدەنتتىك ورتادا جاستار كاسىپكەرلىگىنىڭ ەكو-جۇيەسىن قۇرۋ جوباسىن» جۇزەگە اسىرا باستاماق. ەرتەرەكتە بۇل باستاما اقتوبە وڭىرىندە كوپشىلىككە تانىستىرىلعان بولاتىن.
جاڭا باعدارلاما دەگەنىمىز سەرىكتەس ۋنيۆەرسيتەتتەردى قارجىلاندىرۋ ەمەس. كەرىسىنشە، ERG وقىتۋ ترەنينگتەرى مەن كۋرستارىنا جەتەكشى كوۋچتەردى تارتىپ، جۇمىلدىرۋ مىندەتىن ءوز موينىنا الادى. بەلسەندى ستۋدەنتتەرگە مەنتورلاردى بەلگىلەپ، جالىندى جاستارعا ءوز يدەيالارىنىڭ ەكونوميكالىق تيىمدىلىگىن ەسەپتەۋ داعدىلارىن ۇيرەتەدى. قاجەت بولعان جاعدايدا عيماراتتارىن تەحنوپاركتەر مەن زەرتحانالاردىڭ قاجەتىنە بەرىپ، بارىنشا سەپتەسپەك.
– جاستاردىڭ باسىم بولىگى ءقازىر تۇراقتى تۇردە قالاي دا مەملەكەتتىك باسقارۋ ورگاندارى مەن وڭىردەگى ءىرى كاسىپورىندارعا جۇمىسقا تۇرۋعا ۇمتىلادى. وسى جاعدايدى وزگەرتۋ ءۇشىن ەرتە كەزدەن، ياعني جاستار جوعارى وقۋ ورنىندا ءبىلىم الىپ جۇرگەن كەزدەن-اق ارالارىنداعى ىسكەرلىك قابىلەتى جوعارىلارىن انىقتاپ العان ءجون. سوسىن ولاردى ىنتالاندىرۋ سەسسيالارى مەن ساراپشىلاردىڭ دامىتۋ كونسۋلتاسيالارىنا تارتۋ كەرەك. ولاردىڭ بيزنەس يدەيالارىن جەتىلدىرىپ، بيزنەس-جوسپارلاۋ جانە بيزنەس جوبالاۋ فورماتتارىنا كوشۋىنە جول اشاتىن الاڭدار قالىپتاستىرۋ كەرەك. ينۆەستيسيالىق جانە كاسىپكەرلىك ينفراقۇرىلىمدارىنا جاستاردىڭ باستامالارىن قوسۋدى قامتاماسىز ەتۋ قاجەت. ءبىز بۇل باستامانى قولعا العاندا جاستاردىڭ كاسىپكەرلىگىن دامىتۋ ءوزىمىزدىڭ تۋعان قالالاردا شاعىن جانە ورتا كاسىپكەرلەرلىكتى دامىتۋعا مىعىم تۇعىر بولا الاتىنىن كورىپ وتىرمىز. ونىڭ ۇستىنە بۇل ەكونوميكانىڭ يننوۆاسيالىق الەۋمەتىن ارتتىرۋعا تىڭ سەرپىن بەرەدى، – دەدى ەۋرازيالىق توپتىڭ پەرسونال جانە الەۋمەتتىك جۇمىس جونىندەگى باسقارۋشى ديرەكتورى يرينا داۋلەتباكوۆا.
– ءبىز جۇزەگە اسىرا باستاعان بۇل جوبا ەلباسىنىڭ حالىقتى كاسىپكەرلىككە كەڭىنەن ىنتالاندىرۋ تاپسىرماسىن ورىنداۋعا باعىتتالعان، – دەدى قوستاناي وبلىستىق كاسىپكەرلەر پالاتاسىنىڭ ديرەكتورى مۇرات ابەنوۆ. – ءوز كەزەگىمىزدە ءبىز ناقتى بيزنەس-يدەيالارى بار ازاماتتارعا اقپاراتتىق جانە سەرۆيستىك قولداۋ كورسەتۋگە ءازىرمىز. ERGء-دىڭ بۇل باستاماسى ايماقتاعى شاعىن جانە ورتا بيزنەستىڭ ۇلەس-سالماعىن ارتتىرۋعا سەپ بولارىنا سەنىمدىمىن.
ERG–ءدىڭ ستۋدەنتتىك كاسىپكەرلىكتى قولداۋعا باعىتتالعان قانات قاقتى جوباسى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى بازاسىندا ءساتتى سىنالدى. ىلكىمدى ىسكە تەل-اۆيۆ ۋنيۆەرسيتەتى (تاۋ) مەن قازاقستانداعى تەل-اۆيۆ ۋنيۆەرسيتەتى دوستارىنىڭ قاۋىمداستىعى سەپتىگىن تيگىزدى. ناتيجەسىندە باستامانىڭ ومىرشەڭدىگى مەن وزەكتىگىنى ايقىن اڭعارىلدى.
باعدارلامانىڭ تۇساۋكەسەرىنەن كەيىن ERG جوباسىنا قاتىساتىن، ىرىكتەۋدەن وتكەن جوعارعى وقۋ ورىندارى-سەرىكتەستەر ءتىزىمى جاريالاندى.
