ەلىمىزدە وتەتىن حالىقارالىق «ەكسپو –2017» كورمەسىنىڭ اياسىندا م.اۋەزوۆ اتىنداعى قازاق مەملەكەتتىك اكادەميالىق دراما تەاترى 21 ماۋسىم كۇنى  «كومبە ناننىڭ ءدامى» دراماسىن ساحنالايدى دەپ حابارلايدى "قامشى" اقپاراتتىق اگەنتتىگى م.اۋەزوۆ اتىنداعى  قازاق مەملەكەتتىك اكادەميالىق دراما تەاترىنىڭ 
"باسپاسوزبەن جۇمىس جاساۋ" بولىمىنە سىلتەمە جاساي وتىرىپ.

تاريحي جاعدايلاردىڭ سالدارىنان قازاقستانعا جەر اۋدارىلعان ءتۇرلى ۇلت وكىلدەرىنىڭ تاعدىرى سۋرەتتەلەتىن دراماتۋرگ ءمادينا وماروۆانىڭ «كومبە ناننىڭ ءدامى» دراماسى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىندا «تەاتر كوكتەمى – 2017» فەستيۆالىنىڭ اياسىندا تۇساۋى كەسىلىپ، كورەرمەنگە جول تارتقان بولاتىن. بۇعان دەيىن جازۋشىنىڭ  «اقتاستاعى احيكو» دراماسى اسحات ماەميروۆتىڭ رەجيسسەرلىك شەشىمىمەن اتالمىش تەاتردا ساحنالانعان. ەكىنشى شىعارماشىلىق جۇمىسىندا دا تاريحي تاقىرىپقا جۇگىنگەن دراماتۋرگتىڭ بۇل شىعارماسى، وزىندىك كوركەم شەشىمدەر مەن كەيىپكەرلەر حاراكتەرىن اشۋداعى ىزدەنىستەرىمەن ەرەكشەلەندى. قويىلىمعا رەجيسسۋرا تالاپتارىنا ساي كورىك قوسقان الما كاكىشيەۆا، ال تىڭ سەنوگرافيالىق شەشىم كورسەتكەن سۋرەتشى ەسەنگەلدى تۇياقوۆ بولدى.  الما كاكىشيەۆا كاسىبي ساحنا ونەرىنە اكتريسا رەتىندە اياق باسىپ، 2003 جىلدان بەرى رەجيسسەرلىك قىزمەت اتقارىپ ءجۇر. تىرناقالدى جۇمىسى – «كوشكىن» سپەكتاكلى (اۆت.ت.جۇجەنوعلى، اۋد. و.قىيقىموۆ). ول باس تەاتردا «ءجۇز جىلدىق ماحاببات» (اۆت.د.يسابەكوۆ)، «تاڭسۇلۋ» (اۆت.ع.ەسىم)، «ءاپالى-سىڭلىلى ۇشەۋ» (اۆت.ا.چەحوۆ، اۋد.ءا.بوپەجانوۆا)، «يمپەرياداعى كەش»  (اۆت.س.اسىلبەك ۇلى)، «الماس قىلىش» (اۆت.ءى.ەسەنبەرلين، ينس.ءا.باعدات)  سىندى تۋىندىلاردى ساحنالادى.

كەزەكتى جۇمىسى «كومبە ناننىڭ دامىندە» سۇراپىل سوعىس جىلدارى قازاقستانعا قونىس اۋدارىلعان ۇلت پەن ۇلىستاردىڭ كۇندەلىكتى ءومىرى مەن قازاق حالقىنىڭ قوناقجايلىلىعى سۋرەتتەلىپ، ولار باستان كەشىرگەن قيىندىقتار ارقىلى وقيعا جالعاسىن تاۋىپ، ارى قاراي ءوربيدى. كەڭەس وكىمەتىنىڭ سولاقاي ساياساتى تۇسىندا جەر اۋدارىلعان حالىقتى سىرتقا تەپپەي، باۋىرمالدىلىق پەن ادامگەرشىلىك، مەيىرىمدىلىك پەن قامقورلىق تانىتقان قازاق حالقىنىڭ يگى ىستەرى اسپەتتەلەتىن قويىلىم، كوركەمدىك تۇتاستىقتا شەشىلگەن. پەسادا دا، قويىلىمدا دا باستى قاھارمان – حالىق. ءبىر عانا اۋىلدا بولىپ جاتقان جاعداي بۇكىل رەسپۋبليكانى قامتىپ، ويىن بالالارىنىڭ مىنەز-قۇلقىنا دا اسەر ەتكەن.

سەنوگرافيالىق شەشىم مەن اكتەرلار كەسكىندەگەن شەبەر بەينەلەر، مۋزىكالىق كوركەمدەۋ مەن كاسىبي رەجيسسۋرا ۇيلەسىم تاپقان قويىلىمنىڭ كوتەرگەن تاقىرىبى قاشان دا وزەكتى، قاشان دا وتكىر.

گۇلزيا ءسادۋاقاس