گەرمانيانىڭ دورتمۋند قالاسىندا فۋتبولشىلار مىنگەن اۆتوبۋس جانىندا ءۇش بىردەي جارىلىس بولدى، دەپ حابارلايدى "قامشى" اقپاراتتىق اگەنتتىگى حابار 24 ارناسىنا سىلتەمە جاساپ.

جەرگىلىكتى ارنالاردىڭ حابارلاۋىنشا، وقىس وقيعادان دورتمۋندتىق «بورۋسسيا» كومانداسىنىڭ ورتالىق قورعاۋشىسى مارك بارترا اۋىر جاراقات العان. وعان شۇعىل وپەراسيا جاسالدى. گەرمانياداعى مەنشىكتى ءتىلشىمىز شولپان نايمانبايەۆانىڭ حابارلاۋىنشا، جارىلىس اۆتوبۋس ستاديونعا بارا جاتقان جولدا بولعان. ول جەردە دورتمۋندىق «بورۋسسيا» مەن فرانسۋزدىق «موناكو» كوماندالارى اراسىندا ويىن ءوتۋى ءتيىس ەدى. توسىن جاعدايعا بايلانىستى ماچ كەيىنگە قالدىرىلىپ، جانكۇيەرلەرگە دەرەۋ ۇيلەرىنە قايتۋعا كەڭەس بەرىلدى. پوليسيا وكىلدەرى قاستاندىقتىڭ فۋتبولشىلارعا باعىتتالعانىن ايتىپ وتىر. سونىمەن قاتار، وقيعا ورنىنان سالەمدەمە حات تابىلعان. ءبىراق ونىڭ ءماتىنى ازىرگە جاريالانبادى. ايتا كەتەيىك، ءتارتىپ ساقشىلارى جارىلىستى تەررورلىق شابۋىل رەتىندە قاراستىرىپ وتىرعان جوق.

گرەگور لانگە، دورتمۋند قالاسىنىڭ پوليسيا باسشىسى:

- ءتارتىپ ساقشىلارى ارنايى وپەراسياعا جۇمىلدىرىلدى. ساراپشىلار جارىلعىشتىڭ نەدەن جانە قالاي جاسالعانىن انىقتاپ جاتىر. ازىرگە شابۋىلدى كىمنىڭ جاساعانى بەلگىسىز. سوندىقتان وقيعانى جان-جاقتى قاراستىرىپ، بارلىق جاعدايعا ساقاداي ساي وتىرمىز.