استانانىڭ ۇلتتىق اكادەميالىق كىتاپحاناسىندا ق ر مادەنيەت جانە سپورت مينيسترلىگىنىڭ ۇيىمداستىرۋمەن ەلباسى ن.ءا. نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن تالقىلاۋعا ارنالعان القالى جيىن ءوتت دەپ حابارلايدى "قامشى" اقپاراتتىق اگەنتتىگى. باسقوسۋعا ءتوراعالىق جاساعان مينيسترلىك جانىنداعى قوعامدىق كەڭەس ءتوراعاسى مىرزاتاي جولداسبەكوۆ «ەلباسى كوتەرىپ وتىرعان ماسەلە – بۇگىنگى قوعامىمىز ءۇشىن اۋاداي قاجەت ماسەلەلەردىڭ ءبىرى. وتكەن سالت-سانامىزدان پاتشالى رەسەي مەن كەڭەستىك يدەولوگيانىڭ بۇعاۋىندا قالىپ قول ۇزگەن، كەڭەس ءداۋىرىنىڭ كۇنى وتكەنىمەن، سانداعان جىلدار بويى كۇشتەپ تاڭىلعان ساياساتتىڭ سالدارىنان ورنىققان قۇلدىق پسيحولوگيامەن ات قۇيرىعىن كەسىسە الماي جۇرگەن ەل-جۇرتىمىز بۇگىندە ءارى-سارى حالدە ەكەنى دە شىندىق. كەي جاستارىمىزدىڭ باتىستىڭ جىلتىرىنا ەلىكتەپ، قازاقى ار-ۇياتتان الشاقتاۋى، ال ەندى ءبىرىنىڭ ۇلتىمىزدا بولماعان، اتا-بابامىزدىڭ ۇستانىمىنا مۇلدەم كەرەعار اعىمدارعا ىلەسۋى ۇلتتىق ساناداعى اقتاڭداقتاردىڭ سالدارى» دەي كەلە، ءوز ويلارىن ورتاعا سالۋ ءۇشىن، عاريفوللا ەسىم، نامازالى وماشيەۆ، عالىم احمەدياروۆ، اسحات مايەميروۆ، كوپەن امىربەك جانە باسقالار ماقالانىڭ وزەگى كوكەيدەگىنى ءدوپ باساتىنىن ايتىپ، «حالقىمىزدىڭ تامىرى تاريحىنىڭ تەرەڭىنەن باستاۋ الاتىن رۋحاني كودى بولادى... جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي. ءبىراق، ۇلتتىق كودىمدى ساقتايمىن دەپ بويىڭداعى جاقسى مەن جاماننىڭ ءبارىن، ياعني بولاشاققا سەنىمدى نىعايتىپ، العا باستايتىن قاسيەتتەردى دە، كەجەگەسى كەرى تارتىپ تۇراتىن، اياقتان شالاتىن ادەتتەردى دە ۇلتتىق سانانىڭ اياسىندا سۇرلەپ قويۋعا بولمايتىنى ايدان انىق» - دەپ تايعا تاڭبا باسقانداي، سوقىردىڭ قولىنا تاياق ۇستاتقانداي ەتىپ ايتقان پىكىرىن كوكىرەك كوزى اشىق ادام قولداۋ كەرەك ەكەندىگىن، سونىمەن قاتار ماقالادا ايتىلعان جەرشىلدىك دەرتىنە قوسا، ەتەكتەن تارتىپ وتىرعان رۋشىلدىق دەرتىنەن دە وسكەلەڭ ۇرپاقتى ادا ەتۋ كەرەك ەكەندىگى كەڭىنەن اڭگىمە بولدى.
تۇتاس قوعامنىڭ جانە ءاربىر قازاقستاندىقتىڭ ساناسىن جاڭعىرتۋدىڭ ەلباسى ۇسىنىپ وتىرعان قاي باعىتى بولماسىن ەلدىڭ رۋحاني الەمىن بايىتاتىن باعىتتار. باسەكەلىك قابىلەت، پراگماتيزم، ۇلتتىق بىرەگەيلىكتى ساقتاۋ، ءبىلىمنىڭ سالتانات قۇرۋى، قازاقستاننىڭ ريەۆوليۋسيالىق ەمەس، ەۆوليۋسيالىق دامۋى، سانانىڭ اشىقتىعى – رۋحاني جانە ەكونوميكالىق جاعىنان ورلەيمىن دەگەن قوعام ءۇشىن اۋاداي قاجەت قابىلەتتەر مەن قاسيەتتەر بولىپ تابىلادى.
تاياۋ جىلدارداعى مىندەتتەر رەتىندە ۇسىنىلىپ وتىرعان لاتىن الىپبيىنە كوشۋ، قوعامدىق جانە گۋمانيتارلىق عىلىمداردى جەتىلدىرۋ، تۋعان ەلگە – قازاقستانعا دەگەن پاتريوتتىق سەزىمدى قالىپتاستىرۋ باعىتىندا اتقارىلاتىن ءىسشارالاردى مەملەكەتتىڭ مىندەتى رەتىندە ۇسىنۋ ەلباسىنىڭ ۇلت كوسەمى ەكەندىگىن جانە ءبىر مارتە بايقاتادى.
ۇلتىن ءسۇيىپ، ۇلت تاعدىرىن ءوز تاعدىرىمەن بايلانىستىراتىن جۇرەگى ىزگىلىككە تولى ءاربىر ازامات بۇل مىندەتتەردى قۋانا قابىلداپ، ونىڭ اتقارىلۋ بارىسىنا جۇمىلا كىرىسەدى دەگەن ويدامىز.
