رەسپۋبليكامىزدىڭ مەملەكەتتىك ارحيۆتەرى – ۇلتتىق جادى ساقتاۋشىسى، اقپاراتتىق قوعامدا ماڭىزدى رولگە يە قۇندى اقپاراتتىق رەسۋرس. سوندىقتان، بۇل اقپاراتقا قول جەتكىزۋ مەملەكەتتىڭ ماڭىزدى ستراتەگيالىق مىندەتى بولىپ تابىلادى دەپ جازادى "قامشى" اقپاراتتىق اگەنتتىگى ق ر مسم باسپا ءسوز قىزمەتىنە سىلتەمە جاساپ.
قازاقستاندىق ارحيۆتەردىڭ دامۋى، مىندەتتەرى مەن قىزمەتى جونىندە ورتالىق كوممۋنيكاسيالار قىزمەتىندە قازاقستان رەسپۋبليكاسى مادەنيەت جانە سپورت مينيسترلىگىنىڭ ارحيۆتىك ءىس جانە قۇجاتتاما دەپارتامەنتىنىڭ ديرەكتورى ءاليا مۇستافينا، قازاقستان رەسپۋبليكاسىنىڭ ورتالىق مەملەكەتتىك مۇراعاتىنىڭ ديرەكتورى اقتايەۆا ءلاززات، قازاقستان رەسپۋبليكاسى ورتالىق مەملەكەتتىك كينوفوتوقۇجاتتار جانە دىبىس جازبالار ءارحيۆىنىڭ ديرەكتورى اللا سەيتوۆا، قازاقستان رەسپۋبليكاسىنىڭ ۇلتتىق ءارحيۆىنىڭ ديرەكتورى جانگەلدى ماقاشوۆ اڭگىمەلەدى.
وكق وتكەن بريفينگتە ءاليا مۇستافينا اتاپ وتكەندەي، قازىرگى تاڭدا مەملەكەتتىك ارحيۆتەردىڭ ءبىرىڭعاي جۇيەسىندە 7 رەسپۋبليكالىق جانە 207 ايماقتىق مەملەكەتتىك ارحيۆتىك مەكەمەلەر قامتىلعان. تاۋەلسىزدىك جىلدارىنان بەرى قازاقستاننىڭ ۇلتتىق ءارحيۆىنىڭ قورى مەن قۇجاتتارى 7،08 ملن.-نان 23،3 ملن. بىرلىككە دەيىن ءوستى. ورتاشا ەسەپپەن، جىل سايىن مەملەكەتتىك ارحيۆتەر 400 مىڭنان اسا ىستەر مەن قۇجاتتاردى ساقتاۋعا قابىلداۋدا. ارحيۆتىك قۇجاتتاردى ۋاقىتشا ساقتاۋدى جۇزەگە اسىراتىن ۇيىمدارمەن تۇراقتى تۇردە جۇمىس جۇرگىزىلۋدە، بۇگىندە ولاردىڭ سانى 15 مىڭنان اسادى.
«مەملەكەتتىك ارحيۆتەر جىل سايىن الەۋمەتتىك-قۇقىقتىق سيپاتتاعى 300 مىڭنان اسا ءوتىنىشتى، 32 مىڭ تاقىرىپتىق جانە گەنەالوگيالىق ءوتىنىشتى ورىندايدى» - دەپ اتاپ ءوتتى ا. مۇستافينا.
قازاقستان ارحيۆتەرىندە مەملەكەتىمىزدىڭ تاريحى توڭىرەگىندەگى ءتۇرلى داقپىرتتار مەن بۇرمالاۋدىڭ الدىن الۋعا مۇمكىندىك بەرەتىن بىرەگەي ماتەريالدار جيناقتالعان. قازىرگى تاڭدا قۇجاتتار تۇپنۇسقاسىمەن وقىرماندار زالدارىندا، قۇجاتتامالىق كورمەلەردە تانىسۋعا مۇمكىندىك بار، سوڭعى بەس جىلدا 200 ارحيۆتىك قۇجاتتاردىڭ جيناقتارى جارىق كوردى.
سونداي-اق، رەسپۋبليكامىزدىڭ مەملەكەتتىك ارحيۆتەرى قۇجاتتامالىق ماتەريالداردى ساندىق فورماتقا اۋدارۋ بويىنشا اۋقىمدى جۇمىستار جۇرگىزۋدە. بارلىعى 200 مىڭنان اسا ساقتالعان بىرلىكتەر ساندىق فورماتقا ءوتتى، بۇل شامامەن 23 ملن. پاراقتار. بۇل سالاداعى كوشباسشى ۇيىم قازاقستان رەسپۋبليكاسى ورتالىق مەملەكەتتىك كينوفوتوقۇجاتتار جانە دىبىس جازبالار ءارحيۆى بولىپ تابىلادى. ۇيىمدا 56 مىڭنان اسا فوتو جانە فونوقۇجاتتارعا ەلەكتروندىق فورماتتا قول جەتكىزۋگە بولادى (ارحيۆتىك قوردىڭ اۋديوۆيزۋالدىق قۇجاتتارىنىڭ ەلەكتروندىق بازاسى ارحيۆ سايتىندا)
بريفينگتە ايتىلىپ وتكەندەي، اعىمداعى جىلى «ەلەكتروندىق قۇجاتتار قويماسى» سەرۆيستىك باعدارلامالىق ءونىمىن جۇزەگە اسىرۋ بويىنشا جۇمىستار باستالدى. ول ارحيۆتەردى ەلەكتروندىق ۇكىمەت جۇيەسىنە مەملەكەتتىك تەتىك ەلەمەنتتەرىنىڭ ءبىرى رەتىندە ەندىرۋ ماقساتىندا ەلەكتروندىق قۇجاتتاردى ەلەكتروندىق قۇجات اينالىس جۇيەسىنەن ۇيىمنىڭ ۆەدومستۆالىق ارحيۆىنە وتكىزۋ بارىسىن تولىق اۆتوماتتاندىرىلۋىن قامتاماسىز ەتەدى.
تاريحي ەستەلىكتەردى ساقتاپ، تۇراقتى تۇردە تولىقتىرىپ وتىراتىن ارحيۆتەر قازىرگى عانا ەمەس، بولاشاق قازاقستاندىق ۇرپاققا قىزمەت ەتەدى. ۇزاقمەرزىمدى ساقتاۋدىڭ باستى ماقساتى ۇلتتىق ارحيۆ قورىن زاماناۋي تالاپتارعا جاۋاپ بەرەتىن اقپاراتتىق جۇيەگە اينالدىرۋ زاڭدى قۇبىلىس. اتالمىش كەزەڭدەگى باسىم باعىت قازاقستان رەسپۋبليكاسىندا قۇرىلاتىن ءبىرىڭعاي اقپاراتتىق كەڭىستىك تالاپتارىنا جاۋاپ بەرە الاتىن ارحيۆتىك اقپاراتتىق تەحنولوگيالار ارقىلى اقپاراتتى جيناقتاۋ، وڭدەۋ، ساقتاۋ، ىزدەۋ جانە تاپسىرۋ پروسەسستەرىن اۆتوماتتاندىرۋ بولىپ تابىلادى.
