تەگىن تاماق بەرۋ باستاۋىش مەكتەپتەردەگى وقۋشىلاردىڭ وقۋ ۇلگەرىمىن جوعارىلاتادى. مۇنداي شەشىمگە كەلگەن بريتان عالىمدارى وقۋشىلاردىڭ ماتەماتيكا سەكىلدى ناقتى عىلىمعا نەگىزدەلگەن پاندەردى وقۋعا ىنتالارىن جوعارىلاتىپ، وقۋ ۇلگەرىمىن كوتەرەتىندىكتەرىن مالىمدەگەن. بۇل تۋرالى «قامشى» اقپارات اگەنتتىگى The Guardian-عا سىلتەمە جاساپ حابارلايدى.
جۇرگىزىلگەن تاجىريبەگە 106 بريتاندىق باستاۋىش مەكتەپتەرى قاتىسقان. ونىڭ دەرلىك كوپشىلىگى ناشار اۋدانداردا ورنالاسقان مەكتەپتەر.
وسى اتالعان مەكتەپتەر مەملەكەت تاراپىنان دەمەۋشىلىككە يە بولا وتىرىپ، تەگىن تۇسكى اسپەن قامتاماسىزداندىرىلعان.
ستاندارتتى جەڭىلدىكتەر ارقىلى بەرىلەتىن تۇسكى استىڭ ورنىنا تولىققاندى تەگىن تاڭعى/تۇسكى اس كلۋبتارى ۇيىمداستىرىلعان.
جۇرگىزىلگەن زەرتتەۋدىڭ ناتيجەسىندە تاڭەرتەڭگى اس ىشكەن بالانىڭ ماتەماتيكا، وقۋ، جازۋ سىندى ساباقتاردا ۇلگەرىمى وسكەن. سونىمەن قاتار، تاماقتانۋ جالپى تۇرعىدا وقۋشىلاردىڭ جاي-كۇيىن ساباققا نازارىن اۋدارتۋدا ماڭىزدى ءرول الاتىنى دا دالەلدەنگەن.
"وقۋشىلاردىڭ جەپ-ىشكەن استارىنىڭ قۇرامى ەمەس، سول اس قانداي ورتادا، قانداي كوڭىل كۇيدە قابىلدانعاندىعى ماڭىزدى"- دەيدى زەرتتەۋشىلەر.
زەرتتەۋشىلەردىڭ ءبىرى «موتيۆاسيالاندىراتىن» تاڭعى استار مەن تۇسكى استار كلۋبىن ۇيىمداستىرۋدى بريتان ۇكىمەتىنە قامتاماسىز ەتۋىن ۇسىنىپ وتىر.
ءبىز دە ءوز كەزەگىمىزدە، ەلىمىزدەگى مەكتەپتەردە، ءتىپتى بولماعاندا ناشار اۋداندا ورنالاسقان مەكتەپتەردە وقيتىن وقۋشىلاردى تۇسكى/تاڭعى اسپەن قامتاماسىز ەتۋدى رەسپۋبليكا ءبىلىم مينيسترلىگى قاراستىرسا دەگەن ۇسىنىس قالدىرۋدى ءجون دەپ ەسەپتەيمىز.
