«قامشىنىڭ» حات قورجىنىنا جۋرناليست قازىبەك يسانىڭ تومەندەگى ماقالاسى كەلىپ ءتۇستى. حالىق قالاۋلىسى سميرنوۆانىڭ ەلدىڭ جاعاسىن ۇستاتقان پىكىرىنە ءوزى دە ىڭعايسىزدانىپ، ۋايىمعا سالىنىپ، كۇنى كەشە كەشىرىم سۇراعانىن وقىرمانعا حابارلاعان بولاتىنبىز. ەلباسىنىڭ ساياساتىن قولداۋدىڭ ورنىنا، بىزگە تۇسىنىكسىز سەبەپتەرگە بايلانىستى كەرتارتپالىق ارەكەتكە باستاعان دەپۋتاتتىڭ جۇرەكجاردى سوزدەرىن بالانىڭ اڭگىمەسىنە بالاپ، وڭاي ۇمىتىپ، بىردەن كەشىرە سالاتىن دۇنيە ەمەس. قازاقستاندىق بولا تۇرا قازاقتىڭ كۇيىن كۇيتتەمەگەن ونى قوعامدىق تالقىعا سالۋ ورىندى دەي كەلە ماتەريالدى وقىرمان نازارىنا ۇسىنامىز.
«ەلباسىمىز نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىن ەل قۋانا قارسى الىپ، قىزۋ قولداۋدا. بولاشاققا يدەولوگيالىق باعدار بەرگەن ماقالانىڭ ماڭىزى وراسان ەكەنىن كوكىرەگى وياۋ، كوزى اشىق اركىم دە انىق تۇسىنۋدە. باستى باعىتتارىنا باسا نازار اۋدارىپ، ءار تاراۋىن ادىپتەپ جاتىر. اسىرەسە، الەمدىك عىلىم مەن تەحنولوگيا ءتىلى – لاتىن الىپبيىنە ءوتۋدى رۋحاني تاۋەلسىزدىك رەتىندە قۇلشىنا قولداۋدا.
ءبىراق كوكىرەگى وياۋلىعى كۇماندى، كوزى كوك تۋدى دا كورمەس كورسوقىرلار دا تابىلىپ جاتىر. ولار الىستاعى اۋىل-ايماقتان ەمەس، استانادان، پارلامەنت ۇيىنەن شىقتى! قازاقستان حالىق كوممۋنيستىك پارتياسىنان سايلانعان ءماجىلىس دەپۋتاتى يرينا سميرنوۆا: «مۇنداي جولمەن قازاقستان ورىس الەمىنەن الىستاپ كەتەدى. سەبەبى، كيريلليسا جويىلسا، بولاشاق ۇرپاق ءۇشىن بۇل الفاۆيت تە جوعالادى. بۇل مەنى قايعىرتادى»، -دەپ، بەتى بۇلك ەتپەستەن بەتپەردەسىن اشىپ الدى…
بۇل دەپۋتاتتىڭ بۇرىن مەكتەپ ءمۇعالىمى، مەكتەپ ديرەكتورى بولعانىن ەسكەرسەك، بالالارعا قانداي تاربيە بەرىپ كەلگەنىن باعامداي بەرىڭىز.
ەلباسىنىڭ كەشەگى «بولاشاققا باعدار: رۋحاني جاڭعىرۋ» اتتى ەل قولداعان ماقالاسى ايرانداي ۇيىعان حالىق بىرلىگىنە داق سالارلىق، ءبىر قارىن مايدى شىرىتەتىن ءبىر قۇمالاقتارعا ساباق رەتىندە جازىلعانىن دا ەسكە سالامىز: « بىزگە تاريح تۋرالى وزدەرىنىڭ سۋبەكتيۆتى پايىمدارىن تىقپالاۋعا دا ەشكىمنىڭ قاقىسى جوق»
حوش، سونىمەن ءبىز بۇل سميرنوۆا حانىمعا ەلدىڭ كوڭىلىن ەلەڭدەتكەن بىرەر سۇراق قويايىن دەپ ەدىك.
بىرىنشىدەن، ول وسىدان 26 جىل بۇرىن قازاقستاننىڭ تاۋەلسىزدىك العانىن بىلە مە، بىلمەي مە؟
ەكىنشىدەن، ول ءوزىن قازاقستان رەسپۋبليكاسى پارلامەنت ءماجىلىسىنىڭ دەپۋتاتى ەمەس، شەتەلدىڭ، رەسەي دۋماسىنىڭ دەپۋتاتى سەزىنىپ ءجۇر مە؟
ۇشىنشىدەن، بۇل تەك ويى بۇزىق دەپۋتاتقا عانا ەمەس، قازاقستاننىڭ حالىقتىق كوممۋنيستىك پارتياسى باسشىلىعىنا دا ايتىلار ءسوز: يرينا سميرنوۆا ماجىلىسكە قازاقستاننىڭ كوممۋنيستىك پارتياسىنان ءوتتى مە، جوق، رەسەيدىڭ كومۋنيستىك پارتياسىنان ءوتتى مە؟
تورتىنشىدەن، «قازاقستان ورىس الەمىنەن الىستاپ كەتەتىن بولدى» دەپ، وزگە ەلدە، ايدالادا شالا ءبۇلىنىپ، شابىنا شوق ءتۇسىپ جاتقان شوۆينيستەر شۋىنىڭ جاۋاپكەرشىلىگى ءوزىنىڭ موينىنا جۇكتەلەتىنىن تۇسىنە الار ساۋاتى بار ما؟
بەسىنشىدەن، ەلباسى بەلگىلەپ بەرگەن مەملەكەتتىك ساياساتقا قارسى شىعاتىنداي، ول «ورىس الەمىنسىز» كۇن كورە المايتىن بولسا، ونى كىم ۇستاپ وتىر بۇل ەلدە؟
ءبىز ءماجىلىس دەپۋتاتى ي. سميرنوۆا مەن قازاقستاننىڭ حالىقتىق كوممۋنيستىك پارتياسى باسشىلىعىنان وسى سۇراقتارعا جاۋاپ كۇتەمىز».
قازىبەك يسا
