وسى جىلى رەسەيدە 4 سىنىپ وقۋشىلارىنىڭ ورىس تىلىنەن بىلىمدەرى مىندەتتى تۇردە تەكسەرىلىپ، ارنايى تەست تاپسىرمالارىن ورىندايتىن بولادى، دەپ جازادى قامشى اا. ال ۇلكەن سىنىپتار ءوز قالاۋىنشا تاپسىرا الادى.

رەسەي مەكتەپتەرى وقۋشىلاردىڭ ورىس تىلىنەن بىلىمدەرىن تەكسەرۋگە كوشىپتى. روسوبرنادزور باسپا ءسوز قىزمەتىنىڭ مالىمەتىنشە،  ورىس ءتىلى بويىنشا بۇكىلرەسەيلىك تەست جۇمىستارى 4-سىنىپتار ءۇشىن مىندەتتەلەدى، ال قالعان سىنىپتار ءۇشىن قاتىسۋ-قاتىسپاۋ ءوز ەركىندە.

روسوبرنادزور باسشىسى سەرگەي كراۆسوۆ ايتىپ وتكەندەي رەسەي مەكتەپتەرىنىڭ 70%-ى ورىس تىلىنەن تەكسەرۋ جۇمىستارىنىڭ وتۋىنە كەلىسىمىن بەرگەن. مەكتەپتەر ءۇشىن مۇنداي جۇمىستار ءوزىن ءوزى دياگنوستيكالاۋ، سونداي-اق بولاشاق جوسپارلارعا پايدالانا الاتىن سىرتقى باعالاۋ ءۇشىن كەرەك بولادى.

سەيسەنبى كۇنى كراۆسوۆ بۇكىلرەسەيلىك تەست جۇمىستارىنىڭ باستاماسىن جاساۋ ءۇشىن ماسكەۋلىك گيمنازياعا ات باسىن بۇرماقشى.

الداعى جىلى روسوبرنادزور برتج-ىن ۇلكەن سىنىپتارعا مىندەتتەپ، قاتارىنا باسقا دا پاندەردى قوسپاقشى.

بۇدان بۇرىن رەسەيدە «جاپپاي ديكتانت قابىلداۋ» اكسياسى وتكەن بولاتىن. اكسيا بارىسىندا 866 قالا مەن 71 اۋىلدىق اۋدانداردى قوسقاندا جالپى سانى 200 مىڭ وقۋشى ديكتانت جازعان. ناتيجەسىندە، قاتىسۋشىلاردىڭ 10%-ى عانا «وتە جاقسى» دەگەن كورسەتكىشكە يە بولعان. كەڭەس باسشىسىنىڭ جەتەكشىسى ناتاليا كوشكاريەۆانىڭ ايتۋىنشا، رەسەيلىكتەر ءۇشىن قيىنعا سوققان سوزدەر «كونياك» پەن «ستەرلياد» بولىپتى.

ال ەندى ءوز ەلىمىزدەگى ءبىلىم جۇيەسىندەگى سوڭعى جاڭالىقتارعا كوز جۇگىرتىپ وتەيىك. ناۋرىزدىڭ باسىندا ەلىمىزدە عىلىم جانە ءبىلىم مينيسترلىگى اقىلعا سىيمايتىن باعدارلاما جاساعان ەدى.  ۇبت-عا بىرەر ايلار عانا قالعاندا قازاق ءتىلىن الىپ تاستاعان بولاتىن. قازاق ءتىلى سۇراقتارى بۇدان بىلاي تەست تاپسىرۋشىلارعا «وقۋ ساۋاتتىلىعى» دەگەن ءپاننىڭ ىشىندە كوزگە كورىنەر-كورىنبەستەي كەزىگەدى ەكەن.

ءتىپتى، ۇلتتىق تەست ورتالىعىنىڭ ديرەكتورى رامازان ءالىمقۇلوۆ «قازاق ءتىلىنىڭ» ۇبت-دان رەسمي تۇردە الىنىپ تاستالعانىن مالىمدەي وتىرىپ، «مەن ورىس مەكتەبىندە وقيمىن دەلىك. سوندا، ماعان ۇلتتىق ءبىرىڭعاي تەستىلەۋدە قازاق ءتىلىن تاپسىرۋ مىندەتتى ەمەس پە» دەگەن ءجۋرناليستىڭ سۇراعىنا «مىندەتتى ەمەس» دەپ جاۋاپ بەرگەن بولاتىن. بۇل نەنى بىلدىرەدى؟ ەلىمىزدەگى ءتىلدىڭ مارتەبەسىنىڭ باعاسىن انىق كورسەتەدى ەمەس پە؟ ۇبت-داعى جاڭالىق قازاق ءۇشىن عانا ەمەس، قازاقستان حالقىنىڭ بولاشاعى ءۇشىن ءتيىمسىز ەكەنى دە بەلگىلى ەدى.

قاراپ وتىرساق، رەسەي بيلىگى ءوز مەملەكەتتەرىندە ءتىل ماسەلەسىنە نەمقۇرايلى قارامايىنىن انىق كورسەتىپ تۇر. ال، ءبىزدىڭ ەلىمىزدە، وكىنىشكە وراي، ۇبت-دان قازاق ءتىلىنىڭ الىنىپ تاستالعانىنا كوز جۇما قارادى، وزگەرىس سول قالپىندا قالىپ قويا بەردى.