60 جاستاعى يۋريي تىرلوۆتى بىرەۋلەر وسىنشاما ۋاقىت جۇمىسقا جەگۋمەن كەلىپتى، دەپ جازادى قامشى اا. تەك قولىنا كۇرەك ۇستاي المايتىن حالگە جەتكەندە، الگى قوجايىندارى ونى بوستاندىققا جىبەرگەن كورىنەدى. ەسكى مەكەن-جاي بويىنشا ۇيىنە تارتقان جارىمجان ازامات، باسپاناسىن دا ورنىنان تاپپاي قالعان. قۇجاتى دا، جاقىندارى دا جوق ول ءقازىر اۋرۋحانادا جاتىر.

كتك ارناسىنىڭ حابارلاۋىنشا، وعان جۇمىس ۇسىنىپ، شالعايداعى اۋىلعا الىپ كەتكەن. ول جەردى ءوزى جامبىل وبلىسىنىڭ قورداي اۋدانى دەپ وتىر. سودان بەرى ءيۋرييدىڭ كورمەگەن قورلىعى قالماپتى.

 «ءبارىن ىستەدىم. قويلاردى باقتىم، تاماقتاندىردىم، تازالادىم، ايتقاندارىنىڭ ءبارىن ىستەدىم»، دەيدى يۋريي تىرلوۆ تىلشىگە بەرگەن سۇحباتىندا.

وسىلاي جىلدار بويى جۇمىسقا جەگىلگەن. تەك دەنساۋلىعىنان ايىرىلىپ، ەڭبەككە جارامسىز كۇيگە جەتكەندە عانا، قوجايىندارى الماتىعا اكەلىپ تاستاپتى. ال 17 جىل بويعى جۇمىسى ءۇشىن قولىنا ۇستاتقاندارى – مىڭ تەڭگە عانا. ونسىز دا ازاپتان ارەڭ قۇتىلعان يۋريي تىرلوۆ مۇندا كەلگەندە دە قيىندىققا تاپ بولعان.

يۋريي تىرلوۆ: «قايتىپ كەلسەم، ءۇيىم جوق. مەنىڭ جەرىمە بالاباقشا سالىپ تاستاعان».

ەندى ءيۋرييدىڭ قۇجاتى دا، جاقىندارى دا جوق. ال دەنساۋلىعى ءسال دە بولسا تۇزەلىپتى. مۇندا ول جەدەل جاردەممەن ءولىمشى كۇيىندە جەتكىزىلگەن ەكەن.

ەر ادامنىڭ قازىرگى جاعدايىنا قاتىستى نيەۆرولوگ كۇلاش بابايەۆا بىلاي دەيدى:

- كەلگەن كەزدە ەسىن دۇرىس بىلمەيتىن. مۇرىنى جارىلعان. بەتى قان. كوپ نارسەنى ايتا المايتىن.  ول كىسىدە سول جاعىنداعى قول مەن اياعى سال بولىپ قالعان. ءتىلى كۇرمەلەدى.

ءقازىر پالاتاداعى وزگە ناۋقاستار كەرەك-جاراعىن الىپ، وعان بارىنشا كومەكتەسۋدە. يۋريي دە تەك سولارعا مۇڭىن شاعىپتى.

الماتى قالاسىنىڭ تۇرعىندارىنىڭ ايتۋىنشا، ەر ادامنىڭ ەرەسەك بالالارى بار، ونى سولار ۇرعان كورىنەدى. ال، شەشەسى قىتايدان كەلگەن ەكەن. يۋرييگە ادامداردان گورى قويلار جولداس بولعان.

ەندى ساناۋلى كۇندەردەن كەيىن قاريا بۇل جەردەن شىعارىلادى. ءبىراق، بارار جەرى بولماعاندىقتان، دارىگەرلەر ونى مەدبيكەلىك كۇتىم اۋرۋحاناسىنا جىبەرمەك. وندا دا تەك 10 كۇندەي پانالاي الادى.

سوندىقتان، دارىگەرلەر ءقازىر قۇزىرلى ورىندارمەن بىرىگىپ، يۋريي تىرلوۆتىڭ جاقىندارىن ىزدەپ جاتىر. قورلىق كورگەن ازاماتتىڭ ءوزى سوتقا شاعىمدانباق. ءسويتىپ، قۇلدىققا جەككەندەردىڭ جازاعا تارتىلعانىن قالايدى. ال ولاردىڭ ءتۇر-تۇسىن دە، الگى اۋىلعا بارار جولدى دا بىلەمىن دەپ وتىر.