«ەڭ العاشقى ماحاببات باستالادى مەكتەپتەن» دەمەكشى مەكتەپ قابىرعاسىندا جۇرگەن شاقتاردا ءارقايسىمىز ماحاببات سەزىمدەرىن باستان كەشتىك. جاي عانا ماحاببات ەمەس، العاشقى ماحاببات، ۇمىتىلماس ماحاببات، جۇرەكتە ماڭگى ورنايتىن ماحاببات. ءتىپتى، باسقا جانمەن وتاۋ قۇرساڭ دا، العاشقى ماحابباتتى ۇمىتۋ مۇمكىن بولماس. ال، مەكتەپ قابىرعاسىندا جۇرەگىڭنەن ورىن الىپ ۇلگەرگەن اداممەن كوڭىل قوسىپ، شاڭىراق قۇرعاندار الەمدەگى ەڭ باقىتتى جاندار شىعار، بالكىم. مەنىڭ دە جازباق بولعان كەيىپكەرلەرىم ءدال سونداي جاندار. تەك ول ەكەۋى مەكتەپ بىتىرە سالا ەمەس، اراعا 60 جىل سالىپ، ءبىر-بىرىن ىزدەپ تاپقان، ءبىر جاستىقتا قارتايىپ، كوز جۇمۋعا سول كەزدىڭ وزىندە بەل بايلاعان جاندار. باقىتتىڭ ەرتە-كەشى جوق دەگەن وسى شىعار.

دجيم مەن دجويس XX عاسىردىڭ ورتاسىندا مەكتەپ وقۋشىلارى ەدى. باستاۋىش سىنىپتىڭ وزىندە قىز بەن جىگىت بىر-بىرىنەن ايىرىلماستاي بولدى. ال، ەسەيىپ، مەكتەپ بىتىرۋگە تاياعاندا بالا كوڭىلدەرى ۇلكەن سەزىمگە ۇلاستى. الايدا، مەكتەپ بىتىرە سالا ەكەۋنىنىڭ جولدارى ەكىگە ايىرىلدى. قوشتاسۋ كەشىندە بىرگە بيلەگەن بيلەرى ەڭ سوڭعى بولدى دەپ ولار ويلاماعان. قانداي جاعدايدا ايىرىلىسقانى بىزگە بەلگىسىز.

جەرگىلىكتى باق-تىڭ حابارلاۋىشا، دجيم مەن دجويس ەكى ءتۇرلى مەملەكەتتە تۇردى، جۇمىسقا ورنالاسىپ، كارەرارالارىن جاسادى. وتاۋ قۇرىپ، ەكەۋى ەكى ءتۇرلى الەمدە باقىتتى كۇن كەشتى.

بۇگىندە ەكى عاشىقتىڭ ومىرلىك سەرىكتەرى كوز جۇمعان. تاعدىر ەكەۋىن كەزدەستىرۋ ءۇشىن ماڭدايلارىنا ادەيى جازىپ قويعانداي. سەبەبى، ەكەۋىن ۇلكەن توسىنسىي كۇتىپ تۇر ەدى.

كۇندەردىڭ بىرىندە مەكتەپ كەزدەرىن ەسكە تۇسىرمەك بولعان دجيم البومداردى اقتارا باستايدى. ارينە، سۋرەتتەردەن بالا كەزدەگى عاشىعى دجويستى كورەدى. جۇرەگى الاسۇرعان ەر ادام دجويستى الەۋمەتتىك جەلىلەردەن ىزدەي باستايدى. ىزدەۋى ءساتتى اياقتالىپ، بالا عاشىقتار الەۋمەتتىك جەلىدە جولىعادى. ەشتەڭە وزگەرمەگەن سەكىلدى، ءبارى سول باياعىشا، جۇرەكتەگى سەزىم دە، كوڭىلدەگى تولقۋ دا... ەرەسەك ەر مەن ايەل كۇن سايىن بىرنەشە ساعاتتاپ تەلەفونمەن سويلەسۋگە كوشەدى، اقىرى كەزەدسۋگە بەل بايلايدى.

مەكتەپ بىتىرگەندەرىنە 64 جىل وتكەن سوڭ دجيم مەن دجويس بالا كۇندەرىندەگى ارماندارىن ورىندايدى – 81 جاستاعى عاشىقتار توي جاسايدى. جۇبايلاردىڭ بالالارى مەن نەمەرەلەرى اتا-اجەلەرىنىڭ شەشىمىن قۋانا قابىلداپ، قولداۋ كورسەتتى. سەبەبى، ولار ءۇشىن اتاسى مەن اجەسنىڭ باقىتتى كۇيدە دۇنيەدەن وتكەنى ماڭىزدى ەدى. 

اۋدارعان: گۇلىم جاقان