حيميالىق قارۋعا قارسى ۇيىم ءساۋىردىڭ باسىندا يدليب پروۆينسياسىندا بولعان شابۋىلدا زارين مەن جۇيكە-جۇيەسىنە اسەر ەتەتىن حيميالىق زاتتار قولدانىلعان دەگەن شەشىمگە كەلدى، دەپ جازادى قامشى اقپاراتتىق اگەنتتىگى.

«4 ساۋىردە بولعان اۋە شابۋىلىنىڭ سالدارىنان كەمى 87 ادام كوز جۇمعان. شابۋىل قۇرباندارى بولعان 10 ادامنان سىنامالار الىنىپ، ءتورت زەرتحانادا زەرتتەلگەن»، - دەدى حيميالىق قارۋعا تىيىم سالۋ ۇيىمىنىڭ جەتەكشىسى احمەت ءۇزىمجى.

جەرگىلىكتى باق-تىڭ حابارلاۋىنشا، سىنامالار قازا تاپقان 3 ادامنان جانە جاراقاتتانعان 7 ادامنان الىندى. زەرتتەۋ ناتيەجەسىندە ماماندار زارين نەمەسە زارينگە ۇقساس حيميالىق زاتتىڭ قولدانىلعانىن انىقتاعان. اتالىمش ۇيىم وكىلى ەندى زارداپ شەككەن قالاعا بارىپ، زەرتتەۋ جۇمىستارىن جالعاسىترماق ويدا. سىنامالار ازىرگە تەك زارداپ شەككەندەردەن الىنىپ جاتىر. اۋە شابۋىلىنان كەيىن تۇرعىنداردىڭ تىنىسى تارىلىپ، تۇنشىعا باستاعان. كەيبىرىنىڭ كوز قاراشىعى كىشىرەيىپ، بالالاردىكى ۇلكەيىپ كەتكەن.

ەسكە سالا كەتيىك، 4 ساۋىردە سيريانىڭ سولتۇستىك-باتىسىنداعى يدليب پروۆينسياسىنىڭ كوتەرىلىسشىلەر باقىلايتىن حان-شەيحۋن قالاسىندا حيميالىق شابۋىل جاسالعان.

كۇندىزگى ۋاقىتتا حان-شەيحۋن قالاسىندا بومبالاۋ بولعان ەدى. اۋە سوققىسىنان كەيىن جەر بەتىندەگى ادامدار تۇنشىعا باستاعان.

وپپوزيسيا بەلسەندىلەرى ۇشاقتار زىمىراندارىن اۋىر حالدەگى ادامدار ەمدەلىپ جاتقان جەرگىلىكتى اۋرۋحاناعا قۇلاتقان دەيدى. سيريا اسكەرى وزدەرىن حيميالىق شابۋىلعا قاتىسى جوق ەكەندەرىن العا تارتقان. رەسەي اسكەرى سيريا اۆياسياسىنىڭ تەرروريستەردىڭ حيميالىق قارۋ جاراقتارى ساقتالعان ۇلكەن قويماسىنا سوققى جاساعانىن ايتتى..

ال ءساۋىردىڭ 6-سىنان 7-سىنە قاراعان ءتۇنى اقش سيريانىڭ يدليب پروۆينسياسىنا جاسالعان حيميالىق شابۋىلعا جاۋاپ رەتىندە سيريانىڭ اۋە بازاسىن زىمىرانمەن اتقىلادى.

باق-تىڭ حابارلاۋىنشا، بۇل شابۋىل يدليب پروۆينسياسىنداعى بەيبىت تۇرعىندارعا قارسى حيميالىق شابۋىلدى قولدانعان سيريانى جازالاۋ ماقساتىندا ورىن العان. سيريانىڭ اۋە بازاسىن 60-تان استام «توموگاۆك» زىمىراندارىمەن اتقىلانعان.