كوپبالالى وسپانوۆتار اۋلەتى جاقىندا تاعى ءبىر جانمەن تولىقتى. ومىرگە كوپتەن كۇتكەن شەكەسى تورسىقتاي ۇل كەلدى. اتالارىنىڭ قالاۋى بويىنشا ۇلدىڭ ەسىمىن نۇرتىلەۋ دەپ قويدى. باقىتتى وتباسى جايىندا eKaraganda پورتالىنىڭ ءتىلشىسى ءبىلىپ قايتتى.

زامزاگۇل مامالينوۆا مەن دۋمان وسپانوۆ 7 قىز تاربيەلەپ وتىرعان ەرلى-زايىپتىلار. قىزدارىنىڭ ۇلكەنى 26 جاستا، ال كىشىسى 2-دە. دۋمان «قاراعاندى سۋدا» شەبەر.

«التىن القا» يەگەرى اتانعان 42 جاستاعى ايەل تۇرمىسقا شىعاردا كوپ بالالى وتباسى اتانارمىز دەپ ويلاماعان. ولار ءاۋ باستا ۇل بولعانىن قالايدى، الايدا 25 جىل بويى تاعدىر وتباسىنا قىز سىيلاپ كەلگەن. انا العاشقى قىزىن بوسانعاندا 18 جاستا بولعان. ەكى جىلدان كەيىن ەكىنشى قىزىن بوساندى، ءسويتىپ اراعا جىلدار سالىپ تاعى دا ومىرگە تەك قىز بالا كەلىپ ءجۇردى.

كوپبالالى اتا-انا قىزدارى ءۇشىن قولدارىنان كەلگەنىنىڭ ءبارىن ىستەدى. جاقسى تاربيە بەردى، جوعارعى وقۋ ورىندارىندا وقىتتى. بالالارىنىڭ بولاشاعى ءۇشىن بار كۇشتەرىن جۇمسادى.

بۇگىندە ەسەيگەن ەكى قىزى ءوز ماماندىقتارى بويىنشا جۇمىس ىستەپ ءجۇر. قالعان قىزدارى ۋنيۆەرسيتەت پەن مەكتەپ قابىرعالارىندا ءبىلىم الۋدا. قىزدارى ونەردەن دە كەندە ەمەس. ءبىرى بي بيلەسە، ءبىرى ءان ايتادى، ەندى ءبىرى دومبىرامەن كۇي شەرتەدى.

انا الدىنداعى مىندەتتەردى ورىنداۋمەن قاتار زامزاگۇل ەكى وقۋ ورنىن بىتىرگەن (فيلولوگ جانە زاڭگەر)، بۇگىندە 10 جىلدىق جۇمىس تاجىريبەسى بار.

ەندى، مىنە، ۇيىپ وترىعان وتباسى كەزەكتى قۋانىشتارىمەن ءبولىستى. وتباسىندا ۇل پايدا بولعانىنا اتا-انا ەرەكشە قۋانىشتى.

«بۇل كۇيەۋىم ەكەۋىمىزدىڭ ۇلكەن ارمانىمىز. ءبىز ناعىز قازاق وتباسىمىز» دەيدى زامزاگۇل.

ءقازىر وسپانوۆتار اۋلەتى ءۇش بولمەلى پاتەردە تۇرىپ جاتىر. باسپاناعا كەزەكتە تۇرعانىنا 10 جىلدان اسقان. بۇرىندارى ءوز ۇيلەرىندە تۇرعان ەكەن، الايدا كەيبىر جاعدايلارعا بايلانىستى ساتۋعا ءماجبۇر بولعان. بۇگىندە تۋىستارىنىڭ پاتەرىن جالداپ تۇرىپ جاتىر.

قانداي جاعداي بولماسىن، ەرلى-زايىپتىلار كەزدەسكەن ءار قيىندىققا ءتوزىپ كەلگەن. قىزدارىن قاتارىنان قالدىرماي، جەتىلدىرگەن. ول ءۇشىن قىزدارى اتا-اناسىنا ءدان ريزا.

«قانداي جاعداي بولماسىن ءبىر-بىرىمىزدى تاستاپ كەتپەيتىنىمىزگە سەندىم. بالالارىمىزدىڭ بويىنا تەك جاقسىلىقتى دارىتتىق. بىر-بىرىنە باۋىرمال بولسىن، ۇلكەندى قۇرمەتتەپ، ءوز حالقىنىڭ رۋحاني قۇندىلىقتارىن ساقتاسىن دەپ وسىردىك» دەيدى كوپبالالى انا.