مەلومەن توبىنىڭ قۇرامىندا، سونداي-اق جەكە ءان شىرقاپ جۇرگەن تانىمال ءانشى جىگەر اۋىپبايەۆ Massaget.kz پورتالىنىڭ «اينا» اتتى جوباسىندا جان سىرىمەن ءبولىستى. ەلدىڭ سۇيىكتىسى بولعان جىگەر ومىرىندەگى ەڭ ۇلكەن سىناقتى بالا كۇنىندە وتكەرىپ ۇلگەرگەن. بۇل جايىندا ەسىنە تۇسىرگىسى كەلمەسە دە، قويىلعان سۇراققا جاۋاپ بەرۋگە ءماجبۇر بولعان ءانشى كىشكەنتاي كەزىن ايتىپ وتىرىپ، كوزىنە ەرىكسىز جاس الدى.

ءتىلشىنىڭ «بالا كەزىڭىزدە ۇيىقتار الدىندا نە ويلايتىن ەدىڭىز؟» دەگەن سۇراعىنا جىگەر اۋىپبايەۆ ومىرىندەگى ەڭ قيىن كەزدەردى ەرىكسىز ەسكە الدى.

«راسىن ايتايىن، وتباسىم ۇلكەن قيىندىقتاردى باستان كەشتى. بالا كەزىمدە قاتتى ناۋقاستانىپ، وتا جاساتقانمىن. ءولىم اۋزىنان قالدىم دەسە دە بولادى. مەن اۋرۋحانادا جاتقان كەزدە، اتا-انام مەنىڭ دارى-دارمەكتەرىم ءۇشىن ءۇيدى ساتىپ جىبەرگەن. مەن ول جايىندا بىلمەدىم. اۋرۋحانادان شىقسام، ءبىزدىڭ ءۇيىمىز جوق. جيھازداردىڭ ءبارىن اجەمىزدىڭ ۇيىنە اپارىپ تاستاعان. سول كەزدە اتا-انامنىڭ ءۇيىمىزدى ساتقانىنا مەن ءوزىمدى كىنالادىم. كۇنى-تۇنى جىلايتىنمىن. ۋايىمداعاننان ۇيىقتاي الماعان كەزدەرىم دە بولدى.

تۇندە ويانىپ الىپ اللاعا جالبارىناتىنمىن، اتا-اناما ءۇي الىپ بەرشى دەپ...».

بالا كۇنگى ەستەلىگىن تولقىنىسپەن ايتقان ءانشىنىڭ اۋىر سەزىمى ءار تىڭداۋشىنىڭ جۇرەگىنە مىندەتتى تۇردە جەتەرى انىق. بۇدان بولەك، ءوزىنىڭ تولعانىستارىمەن، ويلارىمەن ءبولىستى. ماسەلەن:

ءانشىنىڭ ساناسىن سەلت ەتكىزەر كەڭەس بەرگەن ادام – اتا-اناسى. ۇلكەن كەڭەسى – «ساعىڭ سىنباسىن». ونەر جولىندا تالاي كەدەرگىلەرگە كەزىككەن ءانشى اتا-اناسىنىڭ ءسوزىن ءاردايىم جادىندا ۇستاعان. جۇرەگى قاشان دا جاقسىلىقتان ءۇمىت كۇتىپ جۇرەدى.

ءان – جىگەر اۋىپبايەۆتىڭ بويىنداعى قۋانىشى دا، مۇڭى دا، ءومىرى.

ءانشى ءۇشىن ۇلى مۋزىكانت – كىشكەنتاي عانا نارەستە، سەبەبى، ول سەكىلدى ەشكىم ءان سالا المايدى.

ءاردايىم تولعانىستا جۇرەتىن جان سىرلارىن ەشكىمگە ءتىس جارىپ ايتقان ەمەس، ءبارى ۇيىندە تۇرعان كۇندەلىكتىڭ پاراقتارىندا جازۋلى.