وتاندىق كينو  تاعى ءبىر (ءتول) تۋىندىمەن تولىقتى. 20 ءساۋىر كۇنى «سۇيە بىلسەڭ» اتتى تەلەسەريال «قازاقستان» ۇلتتىق تەلارناسىنان ءوز كورسەتىلىمىن باستادى. تەلەسەريالدىڭ پروديۋسەرلەرى رينات سافاروۆ جانە اسقار ۇزابايەۆ، ال رەجيسسەرى ەرنار نۇرعالييەۆ.

كينونىڭ العاشقى بولىمىنەن-اق سپورتقا دەگەن ماحاببات، جەڭىسكە دەگەن ۇمتىلىس بايقالادى. ءوز باقىتىن ىزدەگەن جاستاردىڭ ءتۇرلى ارەكەتتەرى سۋرەتتەلەدى.  مانساپ پەن ماحابباتتىڭ ورتاسىندا قالعان جاس فۋتبولشى ءداميردىڭ ءرولىن دارىندى اكتەر جاندوس ايباسوۆ، ال سپورتشى قىز دينارانىڭ ءرولىن - «قازاق ارۋى-2015» گۇلناز جولانوۆا سومدايدى. سونداي-اق، كامشات جولدىبايەۆا، قۋانىش كەرىمقۇلوۆ باستى رولدەردە وينايدى.

تەلەسەريال بولاشاعىنان كوپ ءۇمىت كۇتتىرەتىن جاس فۋتبولشى جايىندا. دامير مىقتى  فۋتبولشى بولۋدى ارماندايدى. دينارا دامير ءۇشىن سپورتتان دا باس تارتۋعا ءازىر. ال دامير بولسا دينارا ءۇشىن ءوزىنىڭ سپورت جولىنداعى مانسابىن قۇربان ەتكىسى كەلمەيدى. دامير يسپانياعا جول جۇرمەك بولادى. ءبىراق دامير مەن دينارا جول اپاتىنا ۇشىرايدى. دارىگەرلەر داميرگە فۋتبولمەن اينالىسۋعا بولمايتىنىن ايتادى. بۇل قايعىلى جاعدايدىڭ ورىن الۋىنا ول ءوزىنىڭ بۇرىنعى ءجۇرىپ جۇرگەن قىزى دينارانى كىنالايدى.

دامير ءوز ءومىرىن فۋتبولسىز ەش ەلەستەتە المايدى، كوڭىل-كۇيى قۇلازىپ ۇلكەن كۇيزەلىسكە تۇسەدى. ول كۇش-جىگەرىن جيناپ، بۇرىنعى قالپىنا تۇسكىسى كەلەدى. ال دامير سپورتقا قايتا ورالادى  ما؟ ول جاعى كورەرمەن قاۋىمعا ازىرگە بەلگىسىز.

سەريال  21:45-تە دۇيسەنبى-جۇما ارالىعىندا كورسەتىلەدى.

«قازاقستان» ۇلتتىق تەلەارناسىنان «سۇيە بىلسەڭ...» تەلەحيكاياسىن جىبەرىپ الماڭىزدار!

قامشىگەر: ايكەرىم تاۋباي