«قوستاناي تاڭى» گازەتىندە اقىن سايات ابەنوۆتىڭ «ءبىزدىڭ اكىم» اتتى ولەڭىنە قاتىستى ەل اقساقالدارى مەن ەلگە تانىلعان اپا-اتالاردىڭ سىني پىكىرى جاريالاندى. وندا قوستاناي وبلىسىنىڭ اكىمى ارحيمەد مۇحامبەتوۆ بولعالى ورىن العان وڭ وزگەرىستەردى تىزبەكتەپ جازعان. سايات ابەنوۆتىڭ قولىنا قالام الۋىنا سەبەپ بولعان سۋ تاسقىنى، قازاق حالقىنىڭ باسىنا تۋعان ناۋبەت اكىمدەردىڭ بەت-بەدەلىنە قارامايدى دەپ جازعان ماقالادا.
"اينالايىن، سايات! اق پەن قارانى، وتىرىك پەن شىندىقتى، جاقسى مەن جاماندى ايىراتىن جاسقا جەتكەن ازاماتسىڭ. سەنىڭ تالابىڭا تىلەكشىمىز، وشكەنىڭدى ەمەس، وسكەنىڭدى قالايمىز. ارزان سوزگە، جالعان اتاققا قۇمارتپاعانىڭ ابزال. سىرتتا ءجۇرىپ، ۇزىنقۇلاتان جەتكەن جەل سوزدەرگە ەرىپ، ەلدىڭ ازاماتتارىنا ايىپ تاعۋىڭ ورىنسىز. اپات ايتىپ كەلمەيدى. بۇل قازاق دالاسىنا كەلگەن بۇل ناۋبەت اكىمدەردىڭ بەت-بەدەلىنە قارامايتىندىعىن بالامىز بىلەر دەيمىز" دەپ جازادى "قوستاناي تاڭى" گازەتىنىڭ باس رەداكتورى.
سايات ابەنوۆكە قاراتىلا ايتىلعان سىندارعا قاتىستى اقىننىڭ پىكىرىن ءبىلۋ ءۇشىن وزىنە حابارلاستىق. سايات ابەنوۆ قازاقستاننىڭ ازاماتى رەتىندە تەك ءوز ويىن بىلدىرگەنىن ايتادى.
سايات ابەنوۆ، اقىن: بالا كەزىمنەن باستاپ «قوستاناي تاڭى» گازەتىندە ولەڭدەرىم شىعىپ تۇردى. اتالمىش گازەتتە جازىلعان سىندى ۇستازدارىمنىڭ اقىلى رەتىندە قابىلدايمىن. اعالارىم مەن اپالارىم ولەڭدى سۇيىلتپاي، كوركەمدەپ، مولدىرەتىپ جازساڭ دەگەن كەڭەسىن ايتىپ وتىر. مۇنى وزىمە كەلىپ، سايات، سەن شەكتەن شىعىپ باراسىڭ. مۇنىڭ بولمايدى دەپ ايتسا قۋانار ەدىم. گازەت بەتىندە ماقالا جاريالانعانى مەن ءۇشىن اۋىر سوققى بولدى. مەن قازاقستان رەسپۋبليكاسىنىڭ ازاماتى رەتىندە ەلدەگى ماسەلە جونىندە تەك ءوز ازاماتتىق پىكىرىمدى ءبىلدىردىم. ودان پوەزيا ىزدەۋ كۇلكىلى. وندا اكىمنىڭ جەكە باسىنا تيىسپەدىم. ءبىرى ءوزىنىڭ ازاماتتىق پىكىرىن سوزبەن ايتسا، مەن ولەڭمەن جەتكىزەمىن. كەزىندە بۇقار جىراۋ دا ابىلاي حانعا سىني پىكىرلەرىن ولەڭمەن جەتكىزگەن. ابىلاي حان ونى دۇرىس قابىلداعان. سول سياقتى اكىمدەر دە جەرگىلىكتى اقىنداردىڭ ويىمەن ساناسۋ كەرەك، پىكىرىنە قۇلاق اسۋ كەرەك دەپ ويلايمىن. سەبەبى مەن تەك حالىقتىڭ كوكەيىندەگىسىن عانا جەتكىزدىم. مەن حالىقپەن بىرگەمىن. ال ءوزىمدى تورعايلىق اقىن دەپ تانىستىرۋىما كەلەر بولساق، ستۋدەنت كەزىمنەن بارلىق ولەڭدەرىمنىڭ استىنا تورعايلىق اقىن دەپ جازىپ داعدىلانىپ كەتكەنمىن. مۇنداعى ايتپاعىم تەك تۋعان جەرىم تورعايدىكى ەكەنىمدى ءبىلدىرۋ عانا. الەۋمەتتىك جەلىدە جاريالانعان جازبالارىم ءوز اۋديتورياما ارنالعان. ۇناپ جاتسا قۋانىشتىمىن، ۇناماسا رەنجىمەيمىن.
مەن ايتىلعان سىنداردىڭ بارلىعىن سارالاپ، ساراپتاپ، ءبىر جۇيەگە كەلتىرىپ، قورىتىندى شىعارامىن. بولاشاقتا مۇلدە ولەڭ جازبايمىن نەمەسە پوەزياعا كوشەمىن» دەيدى سايات ابەنوۆ.
اقىن، جازۋشى – زيالى قاۋىم وكىلدەرى. ەلدەگى قوردالانعان ماسەلەنى كوتەرىپ، جىرلايتىن دا، حالىقتىڭ مۇڭىن مۇڭدايتىن دا، جوعىن جوقتايتىن دا وسى زيالى قاۋىم. ەلدەگى وزەكتى ءارى ماڭىزدى ماسەلە تۋراسىندا ءۇنسىز قالۋ حالىقتىڭ شىمبايىنا تيەتىنى انىق. اقىنداردىڭ حالىقتىڭ كوكەيىندەگىسىن ولەڭمەن جەتكىزسە قۇبا-قۇپ دەيمىز. ورىندى سىن ايتىلسا ءمىن دە تۇزەلەتىنى انىق. تەك ونى دۇرىس قابىلداپ، وڭ ناتيجە شىعارسا بولعانى.
قامشىگەر: اسەم المۇحانبەت
