حيدجابتى شەشۋدى ويلاعان قىز ءوز اكەسىنەن مۇنداي جاۋاپتى كۇتكەن جوق

    Nazerke Labihan
    حيدجابتى شەشۋدى ويلاعان قىز ءوز اكەسىنەن مۇنداي جاۋاپتى كۇتكەن جوق

     17 جاستاعى امەريكالىق مۇسىلمان قىز ءوزىنىڭ سىرتقى كيىم ۇلگىسىنە بايلانىستى ءتۇرلى پىكىرلەر مەن تالاس-تارتىستارعا تاپ بولادى ەكەن، دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساپ.  

    ءبىر كۇنى ول بەلگىسىز ادامنان مىنانداي ماتىندەگى حابارلاما الادى: «يسلامدى قورعاشتاۋدى توقتات. ەگەر سەن حيدجابىڭدى شەشسەڭ، اكەڭ سەنى وڭدىرمايدى.»

    لامياعا ءتىل تيگىزۋشىنىڭ پىكىرىنشە، حيدجابتى مۇسىلمان ايەلدەر ماجبۇرلىكتەن تاعادى ەكەن. وسىعان بايلانىستى  لاميا حيدجابتى شەشەتىن بولسام، اكەم قالاي قابىلدار ەكەن دەپ، اكەسىنە حابارلاما جازادى. اكەسىنىڭ قىزىنا بەرگەن جاۋابى كۇتپگەن جاڭالىق بولدى.

    «كۇنىم، بۇل شەشىمدى مەن قابىلدامايمىن. باسقالار دا سەن ءۇشىن شەشىم قابىلدامايدى. ەگەر سەن دۇرىس دەپ ويلاساڭ، حيدجاب كيمەسەڭ  بولادى. مەن سەنى قانداي جاعداي بولسا دا قولداۋعا دايىنمىن» - دەپ جاۋاپ قايتارعان.

    وسى جايتتان كەيىن وزىنە دورەكى سوزدەر جازعان بەيمالىم جانعا جاۋاپ رەتىندە اكەسىنىڭ وسى جاۋابىن الەۋمەتتىك جەلىگە جاريالاپ، 100 مىڭداعان ءلۇپىل جيناعان.

    «وسى وقيعادان كەيىن كوپتەگەن ادامداردان جىلى سوزدەر جازىلعان حابارلامالاردى الدىم. ولاردىڭ ىشىندە يسلام تۋرالى بىلگىسى كەلگەندەر دە بولدى»،- دەپ قۋانىشىن جاسىرمادى لاميا.

    لاميا مۇسىلماندار تۋرالى دۇرىس ەمەس اقپاراتتار مەن قاتە قاعيدالاردى جويعىسى كەلەدى.

    «ادامدار يسلام ءدىنى قاتىگەزدىك پەن قاتالدىقتان، ايەلدەردىڭ قۇقىعىن شەكتەۋدەن قۇرالادى دەپ تۇسىنەدى. بۇل پىكىردى جاقتاۋشىلار ءدىن تۋرالى بىلمەيدى نەمەسە وزگە سەنىمدەرمەن شاتاستىرادى دەپ ويلايمىن. يسلام – ەشكىمدى ماجبۇرلەمەيدى، كۇشتەمەيدى»، - دەپ تۇسىندىرەدى مۇسىلمان قىز.  

    كەيبىر ايەلدەرگە حيدجابتى كۇشتەپ كيگىزەدى. بۇل – دۇرىس ەمەس. لاميا وندايلاردىڭ قاتارىنان ەمەس. بارلىق ادامدار بىردەي ەمەس سەكىلدى، مۇسىلمانداردىڭ بارلىعىن قاتىگەز دەپ ايتۋ دا دۇرىس پىكىرگە جاتپايتىندىعى بەلگىلى.  

    «مەن حيجدجابتى ءوز ەركىممەن كيدىم. سەبەبى، حيدجاب كيۋ ارقىلى ءوزىمدى سۇق كوزدەردەن قورعايمىن. ول مەنىڭ قۇدايمەن قارىم-قاتىناسىمدى جاقسارتادى. مەن حيدجاب كيگەن كەزدە ءوز ءسوزىم مەن ىسىمە ءمان بەرىپ، قاداعالاپ وتىرامىن. يسلام تۋرالى ءتۇرلى جالا مەن وتىرىككە سەنىپ جۇرگەندەرگە ءبىر عانا كەڭەسىم بار، جاي عانا كەز-كەلگەن مۇسىلمانمەن سويلەسىپ كورىڭىز سوندا ءوزىڭىزدىڭ قاتەلەسكەنىڭىزدى تۇسىنەسىز».

    ءقازىر جاڭا عاسىر،  ادامداردىڭ سىرتقى كەلبەتى مەن كيىمىنە قاراپ باعالاۋدىڭ قاجەتى جوق. سىرتقى بەينە، كەلبەت ەشتەڭە شەشپەيدى. بىرەۋلەر حيدجاب دەسە، بىرەۋلەر ورامال دەپ اتايدى. اتاۋىندا تۇرعان ەشتەڭە جوق. تەك وزگەلەردىڭ ءدىنى  مەن سەنىمىن سىيلاي بىلسەك، قوعامداعى كيكىلجىڭ دە توقتار ەدى. قازىرگى قازاق جاستارى دا، ورتا بۋىن وكىلدەرى دە شاتاساتىنى، شاتاستىراتىنى تاعى بار. ءدىنى بولەك امەريكادا ورامالدى ەركىن تاعىپ، يسلامدى وزگەلەرگە ءتۇسىندىرىپ جۇرسە، ءدىنى يسلام بولعان قازاقتىڭ كەي جاندارى وزدەرىنىڭ اتا دىنىمەن كۇرەسىپ جاتىر. 

    قاتىستى ماقالالار