قامشى اقپاراتتىق اگەنتتىگىنىڭ حات قورجىنىنا قالدىقىز بەشىمبايەۆا ەسىمدى وقىرماننان حات كەلدى. وندا ديماش استاناعا كەلگەننەن كەيىن، حالىقپەن جۇزدەسۋ ءۇشىن ۇيىمداستىرىلىپ وتىرعان جيىنعا بارعانىن جانە ونداعى كورگەنىن جازىپ وتىر. ۆيدەو قالدىقىز بەشىمبايەۆانىكى.
بولىس بولدىم، مىنەكي
...كۇشتىلەرىم ءسوز ايتسا،
باس يزەيمىن شىبىنداپ.
ءالسىزدىڭ ءسوزىن سالعىرتسىپ،
شالا ۇعامىن قىرىنداپ.
ۇلى ابايدىڭ ايتقان «بولىسىن» ديماشتىڭ كونسەرتىنەن كوردىم. ب ا ق بەتتەرىندە ديماشتى ماراپاتتاۋعا ارنالعان كەشتىڭ وتەتىندىگى جانە كىرۋ تەگىن بولاتىنى تۋرالى جاريالاندى. ديماش ەلگە قاشان ورالادى دەپ تاعاتسىزدانا كۇتىپ وتىرعان حالىق كەشتىڭ باستالۋىنان ەكى ساعات بۇرىن كەلە باستادى. سولاردىڭ ءبىرى - قاسىما جەتپىسكە تاياۋ قارت انام ەرتىپ، ەلپىلدەپ جەتكەن مەن ەدىم. ەرتە بارعانداعى ماقساتىمىز - قاريانىڭ قان قىسىمى جوعارى بولعان سوڭ، تومەنگى ورىندارعا جايعاسۋ ەدى. الايدا ءىس باسقاشا بولدى...
پارتەرگە باردىق – ورىن جوق، بەلەتاجعا باردىق – ورىن جوق، بالكونعا باردىق – ورىن جوق، گالەرەيادا عانا ورىن قالىپتى. ەسىكتى اشىپ، كىرگىزگەنى جاڭا عانا ەدى، قالاي ورىن جوق؟ ەل اڭ-تاڭ... بۇلاي بولماس دەگەن ۇمىتپەن پارتەرگە قايتا كەلدىك.
قولدارىندا شاقىرۋ بيلەتتەرى بار «جايساڭدار» كىرىپ جاتىر ەكەن. بيلەتسىز «مۇساپىرلەر» ءبىر شەتتە تۇر ەدىك، كەنەتتەن اشۋعا بۋلىققان بىرەۋى ارتىمىزدان ەكپىندەتىپ يتەرە جونەلگەنى. سول ەكپىنمەن ىشكە ەندىك. اپىر-توپىردان شوشىنعان كۇزەتشى جىگىتتەر اتا-اجەلەرگە اياقتارىن توسەي قالعانى. قارتتار شالىنىپ، قۇلاي جازداپ ءوتىپ جاتىر. وتە بەرگەنىمىز سول ەدى، كوزى الارعان جاس قىز «سىزدەرگە مۇندا كىرۋگە بولمايدى» دەپ بايبالام سالدى. مەنىڭ انام: «مەن سياقتى قاريا كىرمەگەندە، كىم كىرەدى؟» دەپ وكتەم سويلەپ قالىپ ەدى، قىز دا تىنىشتالا قالدى. ورىنعا بارىپ جايعاسقان سوڭ دا تىنىم بەرمەدى. ەكىنشى قىز كەلدى، ول كەتتى. ورتا جاستاعى ەر ادام كەلىپ:
- سىزدەر بۇل ورىندى بوساتۋلارىڭىز كەرەك، - دەدى.
- نەگە؟
- بوس ەمەس.
- نەگە بوس ەمەس؟
- شاقىرۋ بيلەتى بارلار وتىرادى.
- شاقىرۋ بيلەتى نە ءۇشىن بەرىلدى؟
- بوساتىڭىزدار.
- تۇرمايمىز، تەگىن دەپ حابارلانعان. تەگىن كەشكە شاقىرۋ بيلەتى نە ءۇشىن بەرىلدى؟
- مەن ءالى كەلەمىن.
- نە ءۇشىن كەلەسىز؟ ءسىز كىمسىز؟
- وسى جەردىڭ باستىعىمىن.
- سىزدەر وسىنداي شەنەۋنىكتىك جىمىسقى ارەكەتتەرىڭىزدى قاشان قوياسىزدار؟
- ديماش سىزدەردىكى عانا ما؟ ول - حالىقتىكى.
ءۇن-تۇنسىز كەتىپ قالدى. ۇيالدى ما؟ ءاي، قايدام؟ بولعان شىعار دەپ ەدىك، بەكەر ەكەن. ءتورتىنشىسى كەلدى (بەينەروليكتە).
«جايساڭداردىڭ» ارقاسىندا امان قالدىق. سول جاعىمىزدا مينيسترلىكتىڭ، وڭ جاعىمىزدا اپپاراتتىڭ «ناعىز ادامدارى» وتىر ەكەن. «مينيسترلىكتەن» دەگەن ءسوزدى ەستىگەندە، «كەشىرىڭىز» دەدى دە، جالت بەرىپ، جوق بولدى.
«اباي جولى» رومانىنداعى ءان تىڭدايمىن دەپ مايباساردان تاياق جەگەن كەدەي جىگىت پەن «ايعىز بەن قاليقانىڭ كارىنە قاراماي...» انشىلەرگە كەتكەن ءيىس كەمپىر ءبىز بولدىق.
كەشتەردە، كونسەرتتەردە ارناي شاقىرىلعان قوناقتار بولاتىنى بۇرىننان بەلگىلى... ءبىراق ولار سوعىس ارداگەرلەرى، ونەر مەن مادەنيەتكە ەڭبەگى سىڭگەن قايراتكەرلەر، قوعام قايراتكەرلەرى، ەلىمىزگە ەڭبەگى سىڭگەن قۇرمەتتى ازاماتتار، سونىمەن قوسا، ديماشتىڭ سىيلى قوناقتارى بولسا، تۇسىنەرلىك جاعداي. اتتەڭ، ءبىراق باسقاشا...
ءبىزدىڭ جانىمىزداعى جانە پارتەرگە جايعاسقان «جايساڭدار» شەنەۋنىكتەردىڭ اتاسىنان باستاپ شوبەرەسىنە دەيىنگى تايلى تۇياعى. ولاردىڭ اجەسى سياقتى مەنىڭ اجەم دە وتىر. اجەدەن اجەنىڭ قانداي ايىرماشىلىعى بار؟ ءبىر قىزىعى، ولار ديماشتىڭ كونسەرتىنە ونىڭ ونەرىن سۇيەتىن كورەرمەن ەمەس، «مينيستر» بولىپ كەلەدى ەكەن. زالدى تولتىرۋ ءۇشىن شاقىرۋ بيلەتىن بەرۋگە دە بولاتىن شىعار، ءبىراق ورىن كورسەتىلمەسىن. ارنايى شاقىرىلعان كورەرمەن مەن ديماشتى ءبىر تىڭداپ، ءجۇزىن ءبىر كورۋگە ىنتىعىپ كەلگەن كورەرمەننىڭ قانداي ەرەكشەلىگى بار؟
قالدىقىز بەشىمبايەۆا
