ەلىمىزدىڭ ەلەۋلى مەرەكەسى جەڭىس كۇنى تابان تىرەپ كەلەدى. ەكىنشى دۇنيە جۇزىلىك سوعىستا بۇگىنگى بەيبىت كۇن ءۇشىن دەنەلەرىن وتقا توسقان ءار ازاماتتىڭ ەرلىگى ۇرپاقتارىنىڭ جادىندا ماڭگى قالارى ءسوزسىز. اتاۋلى مەرەكەگە وراي ەلىمىزدىڭ ءار قالاسى قىزۋ دايىندىققا كىرىسىپ تە كەتتى. استانا، شىمكەن سىندى ەل قالالارى "جەڭىس لەنتاسىن" تاراتىپ، تۇرعىندارعا ەرلىك كۇنىن ەسكە سالۋدىڭ امالدارىن قاراستىرۋدا.

ەندىگى ماسەلە "جەڭىس لەنتاسى" جايىندا بولماق. ەسكە سالا كەتەيىك، وسىدان بىرنەشە جىل بۇرىن وسى مەرەكەگە وراي قازاقستاننىڭ ءار بۇرىشى قوڭىر-سارى تۇستەس "گەورگيي لەنتاسىمەن" قاپتالىپ ەدى. الايدا، بۇل لەنتانىڭ تۇپكى ماعىناسىن تۇسىنگەن بيلىك وكىلدەرى ودان باس تارقان. مۇنى ەسكەرگەن «اق جول» پارتياسى ەلىمىزدىڭ تۋى تۇستەس جەڭىس لەنتاسىن ويلاپ تاپقان. بۇل وي قازاقستاندىقتاردىڭ كوڭىلىنە مايداي جاعىپ، 2015 جىلدان بەرى كوك ءتۇستى "جەڭىس لەنتاسى" اتاۋلى كۇننىڭ ەستەلىگىن ۇلىقتايتىن سيمۆولعا اينالدى.

نە كەرەك، كەي مەكەمەلەردىڭ باسشىلىعى مۇنداي شەشىمگە اسا ءمان بەرمەگەن بولۋ كەرەك. اباي مەن فۋرمانوۆ كوشەلەرىنىڭ قيىلىسىنىداعى فرانسۋز ءۇيىنىڭ باسشىلىعى ەيفەل مۇناراسىنىڭ الدىنا جارقىراتىپ گەورگيي لەنتاسىن ءىلىپ قويىپتى. بۇل نەنى بىلدىرەدى، ءالى دە رەسەيدىڭ ىعىنا كونىپ، ەل تاۋەلسىزدىگىن مويىنداماۋدىڭ بەلگىسى مە؟ ابىروي بولعاندا، مۇنى قالا اكىمدىگى بايقاپ، دەرەۋ الىپ تاستاۋدى بۇيىرعان. بۇگىندە عيمارات الدىندا "گەورگيي" لەنتاسىن الىپ تاستاۋ جۇمىستارى جۇرىگىزىلدى.

تاريح - ادامزات بالاسىن وتانسۇيگىشتىككە، پاتريوتتىققا تاربيەلەيتىن قاينار كوز. ونى دارىپتەپ ءجۇرۋ ۇرپاققا مىندەت، دەگەنمەن قۇر سوزبەن اۋىز تولتىرىپ ايتۋ ازدىق ەتەدى. ءبىر كەزدەرى "گەورگيي" لەنتاسىنا قانشاما قوعام بەلسەنىدىسى قارسى شىعىپ، رەسەيدىڭ جىمىسقى ساياساتىنا بالادى. ناعىز ەرلىكتىڭ تۋىن كوككە جەلبىرەتىپ ءجۇرۋ ءۇشىن ۇلتتىق تاريحىمىزدى تەرەڭىنەن زەردەلەپ، دۇرىس دارىپتەي ءبىلۋىمىز شارت.

گۇلىم جاقان