نيۋ-يورك قالاسىندا كۇيەۋلەردى ساتاتىن دۇكەن اشىلدى. دۇكەن 5 قاباتتان تۇرادى: ءار قاباتقا جوعارىلاعان سايىن ساتىلاتىن كۇيەۋلەردىڭ باعاسى دا، «ساپاسى» دا جاقسىراق بولادى ەكەن، دەپ جازادى قامشى اقپاراتتىق اگەنتتىگى شەتەلدىك باق-قا سىلتەمە جاساپ.

دۇكەننىڭ وزىندىك ەرەجەلەرى دە بار:

• ءبىر قاباتتان ەكىنشى قاباتقا كوتەرىلسەڭىز استىڭعى قاباتقا قايتادان ورالۋعا بولمايدى.
• تاڭداۋ جاساپ قويعان بولسا، ونى اۋىستىرۋعا نەمەسە قايتارۋعا بولمايدى.
• بۇل دۇكەنگە تەك ءبىر-اق رەت قانا كەلە الاسىز.

ءبىر كۇنى اتالمىش دۇكەنگە ءبىر ايەل كىرىپ، ءبىرىنشى قاباتتاعى ءىلۋلى تۇرعان تاقتايشاداعى جازۋدى كورەدى: «بۇل قاباتتاعى كۇيەۋلەر جاقسى تابىس تابادى جانە وزدەرى دە جاقسى». قانداي كەرەمەت دەپ ويلاعان ايەل نە بولسا دا ەكىنشى قاباتتى كورگىسى كەلەدى.

ەكىنشى قاباتتا: «مۇنداعى كۇيەۋلەر جاقسى تابىس تابادى، وزدەرى دە جاقسى جانە كىشكەنتاي بالالاردى جاقسى كورەدى» دەپ جازىلىپ تۇرادى. قۋانعان ايەل «قانداي كەرەمەت، دەگەنمەن ءۇشىنشى قاباتتى دا كورەيىن» دەپ جوعارى كوتەرىلەدى.

ءۇشىنشى قاباتتا دا ءدال سونداي تاقتايشا ءىلۋلى تۇرعان، وندا: «بۇل قاباتتا ساتىلاتىن كۇيەۋلەر جاقسى تابىس تابادى، وزدەرى دە جاقسى، بالالاردى دا جاقسى كورەدى، سونىمەن قاتار ءۇي شارۋاسىنا كومەكتەسەدى» دەپ جازۋلى تۇر. مۇنداي كۇيەۋدى تەك ارمانداۋعا بولادى دەپ ويلاعان ايەل بۇل قاباتقا دا توقتاماي جوعارىعا كوتەرىلەدى.

ءتورتىنشى قابات. تاقتايشاداعى جازۋ: «بۇل قاباتتا ساتىلاتىن كۇيەۋلەر جاقسى تابىس تابادى، وزدەرى وتە جاقسى، كىشكەنتاي بالالاردى جاقسى كورەدى، ءۇي شارۋاسىنا كومەكتەسەدى جانە دە ولار رومانتيكتەر». ءيا، بۇل جازۋدى كورگەن ايەل بىردەن ىزدەگەنىمدى تاپتىم دەپ ويلاپ، دەگەنمەن بەسىنشى قابات بار، ونى دا كورگىسى كەلگەن ايەل سوڭعى قاباتقا كوتەرىلەدى.

بەسىنشى قاباتتا ءىلۋلى تۇرعان تاقتايشاداعى جازۋ مۇلدەم وزگەشە ەدى:

«كەشىرىم وتىنەمىز، ءبىراق بۇل دۇكەندە كۇيەۋلەر ساتىلمايدى. بۇل يدەيا ايەلدەردىڭ تالابى تىم جوعارى ەكەندىگىن تاعى ءبىر رەت دالەلدەۋ ءۇشىن ويلاپ تابىلعان بولاتىن. ءسىز – 1 965 784ء-شى كەلۋشىسىز. بۇل ۋاقىتقا دەيىن دۇكەنگە كىرگەن ءبىر دە ءبىر ايەل تاڭداۋ جاساپ، سونى قاناعات تۇتىپ كەتكەن ەمەس».

دايىنداعان: نازەركە لابيحان