اتىراۋ وبلىسى اكىمىنىڭ باسپا ءسوز قىزمەتى اۋىل قارياسىنىڭ “كرىشاسى” بار براكونەرلەر تۋرالى شىندىعىنا” قاتىستى مالىمدەمە جاسادى دەپ حابارلايدى قامشى اقپاراتتىق اگەنتتىگى.
ەستەرىڭىزگە سالايىق، بۇعان دەيىن اققىستاۋ اۋلىنىڭ تۇرعىنى ساعىنعالي قاريا وبلىس اكىمى نۇرلان نوعايەۆقا “كرىشاسى” بار براكونەرلەردىڭ كوپ ەكەنىن ايتىپ، زاڭسىزدىقتان اراشا سۇراعان ەدى.
باسپا ءسوز قىزمەتىنىڭ حابارلاۋىنشا، زاڭسىز بالىق اۋلاۋ مەن سۋ مارجانىن كوبەيتۋ جولىنداعى كۇرەس باسەڭسىمەيدى.
“2 اي ىشىندە ەلدىڭ باتىسىنداعى ءۇش وبلىستا زاڭسىز اۋلانعان 60 توننادان استام بالىق پەن 3 مىڭعا جۋىق بالىق اۋلاۋ قۇرالدارى تاركىلەندى”، – دەلىنگەن حابارلامادا.
ايتۋلارىنشا، “بەكىرە-2017” اكسياسىنىڭ اياسىندا بارلىعى 711 زاڭسىزدىق تىركەلىپ، ونىڭ 100-گە جۋىعىنا قىلمىستىق ءىس قوزعالعان.
بالىق سانىن كوبەيتۋ ءۇشىن جاسالاتىن جايىق وزەنىندەگى “يايسكيي” جانە قيعاش وزەنىندەگى “گانيۋشكينو” كانالدارىن تەرەڭدەتۋ جۇمىسىنىڭ شەشىمى بيىل تابىلعانى دا بەلگىلى بولدى.
بۇل جۇمىس بالىقتاردىڭ ۋىلدىرىق شاشۋىنا قولايلى جاعداي تۋعىزىپ، سۋ مارجانىنىڭ قىستايتىن شۇڭقىرلارىنا جەتۋىن وڭايلاتا تۇسپەك.
جۇمىس بيىل ءۇشىنشى توقساندا باستالادى دەپ جوسپارلانعان.
ايتا كەتەلىك، بيىلعا دەيىن جايىق وزەنىنىڭ 16 شاقىرىمىن تەرەڭدەتۋ جوباسى جۇرگەن ەدى.
ەستەرىڭىزگە سالايىق، بالىق ۋىلدىرىق شاشاتىن مەزگىلدە سۋ كولىگىن جۇرگىزۋ ەرەجەسىنە نارازى بولعان ءبىر توپ اتىراۋلىق ازامات ساۋىردە بيلىك وكىلدەرىمەن قاقتىعىستى. سەبەبى، بالىق قورعاۋمەن اينالىساتىن ينسپەكسيا سۋ جانۋارىنىڭ كوبەيۋىنە كەدەرگى بولماۋ ءۇشىن موتورىنىڭ قۋاتى 20 اتتىڭ كۇشىنەن اساتىن قايىقتاردى تەڭىزگە شىعارماي قويعان. كەيىن نارازىلىق تانىتقان 37 ادامنىڭ تۇراقتى جۇمىسقا ورنالاسۋعا كەلىسكەنى بەلگىلى بولدى.
بىرنەشە كۇن وتكەن سوڭ زاڭسىز اۋلانعان 4 توننا بالىقتىڭ رەسەيگە ءوتىپ كەتكەنى انىقتالىپ، كوپ ۇزاماي جەرگىلىكتى ورمان شارۋاشىلىعى جانە جانۋارلار دۇنيەسى اۋماقتاق ينسپەكسياسىنىڭ باسشىسى مۇرات ەرمەكقالي ءوز ەركىمەن جۇمىسىنان كەتۋ تۋرالى ارىز جازدى.
باسپا ءسوز قىزمەتىنىڭ حابارلاۋىنشا، يساتاي اۋدانى تۇرعىندارىن جۇمىسپەن قامتۋ باعىتىنداعى شارالار كۇشەيگەن. ماسەلەن ءقازىر اۋداندا 2 ماماندىق بويىنشا كاسىپتىك ءبىلىم بەرۋدى ۇيىمداستىرۋ جۇزەگە اسىرىلىپ جاتىر، جاقىن مەزگىلدە كوللەدج اشۋ ماسەلەسى دە كوتەرىلگەن.
