ايەلدەردىڭ قۇقىعى بۇگىنگى تاڭدا كوپ تالاستار مەن پىكىرلەر تۋدىراتىن شيەلەنىستى ماسەلە. قوعامدا فەمەنيستىك كوزقاراستاعى ايەلدەر قاۋىمى كوبەيىپ كەلەدى. ەر ازاماتتارعا دەگەن سەنىمسىزدىك پەن قورقىنىش وسىعان سەبەپ بولىپ وتىر. 

كۇندەلىكتى ومىردە، جاڭالىقتاردان ايەلدەرگە جاسالاتىن تۇرمىستىق زومبىلىق تۋراسىندا كوپ ەستيمىز، ءتىپتى كوزبەن كورىپ جاتامىز. ستاتيستيكاعا سۇيەنسەك الەمدە 35% ايەل كۇيەۋلەرىنىڭ تاراپىنان زورلىق ارەكەتتەرىنىڭ قۇربانى بولىپ جاتادى. وسىنداي جاعدايلارمەن  بەتپە-بەت كەلەدى. الەمدىك دەنساۋلىق ساقتاۋ ۇيىمى  الەمدەگى ءتۇرلى ەلدەردەن 24 مىڭ ايەلدەن الىنعان ساۋالناما ناتيجەسىندە  ايەل زورلىعى 15%  دەپ انىقتادى. قىزدار مەن ايەلدەر زورلىعى ۇلكەن قيىندىقتار تۋعىزاتىن قوعام مەن وتباسى دامۋىنا زارداپ اكەلەتىن وتە نازىك ماسەلە. الەمدە 603 ميلليون ايەل وتباسىنداعى زورلىق قىلمىس بولىپ ەسەپتەلمەيتىن ەلدەردە تۇرادى. الەمدىك ستاتيستيكا بويىنشا، 10 ايەلدىڭ 6-اۋى فيزيكالىق نەمەسە جىنىستىق زورلىقتىڭ قۇربانى بولادى. 

جاقىندا عانا وسىنداي زورلىق ارەكەتى  اقش-تىڭ وگايو شتاتىندا كورىنىس تاپقان. «ماكدونالدس» فاستفۋد رەستورانى قىزمەتكەرلەرى سۇمدىق جاعدايعا كۋا بولعان دەپ جازادى قامشى اقپاراتتىق اگەنتتىگى. رەستوران الدىنا ىشىنە بالالار لىق تولعان ماشينا توقتاپ، قولىندا بالاسى بار  ابدەن شوشىنىپ قالعان ايەل قىزمەتكەرلەر كوزىنە تۇسكەن.

ول كولىك ورىندىعىنان سەكىرىپ ءتۇسىپ بالاسىن تانىس ەمەس قىزمەتكەرلەرگە ۇسىنا باستاعان. سول كەزدە قاسىنداعى سەرىگى ونى قۋىپ جەتىپ كولىك ىشىنە زورلىقپەن كىرگىزىپ كولىكتى ايداپ كەتكەن. ماكدونالدس قىزمەتكەرلەرى  ايەلدىڭ تەك ايقايلاعان داۋسىن عانا ەستىپ ۇلگەرگەن. بالالى ايەل ولارعا  قۇتقارۋ قىزمەتىنە حابارلاسۋىن ءوتىنىپ ۇلگەرگەن.

كەيىنىرەك، كولىكتىڭ ىشىندە كوپ بالالى دجەسسيكا ۋيلسون مەن ونىڭ كىشكەنە ۇلىنىڭ اكەسى كروسستي ليەۆينسكي بولعاندىعى انىقتالدى. ول دجەسسيكانىڭ پاتەرىنە قالاعان ۋاقىتىندا كەلىپ ونى وپاسىزدىق ءۇشىن كىنالاپ ۇرىپ سوعاتىندىعى بەلگىلى بولعان. ونى ايەلدىڭ دەنەسىندەگى جاراقاتتار مەن كوگەرگەن ىزدەر،كەسىلگەن دەنەسى دالەلدەگەن.

وسى وقيعادان كەيىن ليەۆينسكي ۇستالىپ 20 جىلعا باس بوستاندىعىنان ايىرىلعان. 

شىعىس ەلدەرىنىڭ ءبىر قاتارىندا ايەل قۇقىعىنىڭ تومەندەپ كەتۋى مەن سول ەلدەردىڭ نازىك جاندىلارىنىڭ زومبىلىققا ءجيى كەزىگەتىنىنە بايلانىستى بۇۇ تاراپىنان گەندەرلىك تەڭدىك ماسەلەسى كوتەرىلدى. ونىڭ ماقساتى ليۆيا، پاكىستان، سيريا سياقتى ءبىرقاتار ەلدەردە ايەل قۇقىعىن كوتەرۋ بولدى. تەك قانا اتالعان ەلدەر ەمەس بۇكىل الەمدە تۇرمىستىق زورلىق كۇن سايىن ورىن الۋدا. ءبىر رەسەيدىڭ وزىندە ءبىر جىلدا 14000 ايەل زورلىق زومبىلىق ارەكەتتەرىنەن قازا تاپقان. ال قازاقستان «Cato Institute» ۇيىمىنىڭ 2016 جىلعى رەيتينگىسىندە ايەلدەردى زورلىقتان قورعاۋ بويىنشا  العاشقى وندىققا كىرگەن. 

دايىنداعان: نازەركە مۇسا