If you don't know English، you don't have any chances

ءتىل بىلمەيتىن ادامنىڭ، ارينە، شەت ەلدە وقۋعا مۇمكىندىگى جوق. تەگىن دە، اقىلى دا. ءتىل، اسىرەسە اعىلشىن ءتىلى، ءبىلىم كوكجيەگىن كەڭەيتىپ قانا قويماي، الەمنىڭ رەيتينگتى وقۋ ورىندارىندا ءبىلىم الۋعا جول اشادى. تالپىنساڭ گرانت تا، ستيپەنديا دا الاسىڭ، جاتاقحانا دا تەگىن بەرىلەدى. ال وعان قول جەتكىزۋدىڭ جولدارى قالاي؟

امەريكا، ەۋروپا جانە قىتايدىڭ سىزگە ۇسىنا الاتىن مۇمكىندىكتەرىمەن تانىسىپ كورىڭىز. رەت-رەتىمەن.

جەتى جۇرتتىڭ ءتىلىن ءبىل، جەتى ءتۇرلى ءىلىم ءبىل

اعىلشىن ءتىلى نەمەسە باسقا شەت ءتىلى مەكتەپ باعدارلاماسىندا تەرەڭ وقىتىلاتىن، ودان قالسا، ارنايى كۋرستار مەن رەپەتيتوردىڭ كومەگىنە جۇگىنەتىن قالا بالاسى ءۇشىن اسا قيىنعا سوقپايدى. پوليگلوت بولۋ اۋىل بالاسى ءۇشىن اۋىر. «اقپاراتتىق-تالداۋ ورتالىعى» اكسيونەرلىك قوعامىنىڭ زەرتتەۋىنە جۇگىنسەك، اۋىلدىڭ 9 سىنىپ وقۋشىسى قالاداعى قاتارلاسىنىڭ بىلىمىنەن 4 بالعا، 11 سىنىپ وقۋشىسى – 7،33 بالعا ارتتا قالىپ وتىر. ءبىراق، زەرتتەۋ ورتالىعىنىڭ ماماندارى بۇل كورسەتكىش اۋىل بالاسى قابىلەتسىز دەگەندى ەمەس، ولارعا تەرەڭ ءبىلىم بەرەتىن مۇعالىمدەردىڭ تاپشى ەكەنىن بىلدىرەدى دەيدى.

ءبىلىم مينيسترلىگى بەكىتكەن ورتا ءبىلىم ستاندارتى اۋىلعا دا، قالاعا دا ورتاق. ءبىراق ارادا كوزگە كورىنبەيتىن ۇلكەن كەدەرگى بار. سونىڭ سالدارىنان اۋىل مەكتەبىنىڭ تۇلەگى ءتىل ۇيرەنۋگە كەمىندە ءبىر جىلىن، ءتىپتى، ەكى-ۇش جىلىن جوعالتادى.

11 جىل اۋىلدا وقىسا دا، گەرمانيادا ءبىلىم العان سەرىك سولداتحان قالاعا كەلگەندە نەمىسشە ءبىر اۋىز ءسوز بىلمەگەنمىن دەيدى.

"اقمولا وبلىسى ارشالى اۋدانىنا قاراستى بۇلاقساي ورتا مەكتەبىندە 11 جىل وقىدىم. اۋىلىمىزدا جۇزگە جەتپەيتىن ءتۇتىن بار، سىنىپتا جالپى، مەكتەپتە دە بالا سانى از بولاتىن. نەمىس ءتىلى وقىتىلعان جوق، ال اعىلشىن ءتىلى باعدارلامادا بولعانمەن، ۇستاز تۇراقتامادى. ءسويتىپ، 2007 جىلى 11 سىنىپتى تاۋىستىم. اۋىل وقۋشىسى بولساق تا، ۇلتتىق ءبىرىڭعاي تەستىلەۋ استانا قالاسىندا، ياعني، قالا بالالارىمەن قاتار ءوتتى. تەستىنى ويداعىداي تاپسىرعان سوڭ، اگروتەحنيكالىق ۋنيۆەرسيتەتتىڭ گرانتىنا ءتۇستىم. ءبىراق، قالاعا كەلگەندە نەمىسشە ءبىر اۋىز ءسوز بىلمەدىم"، – دەيدى سەرىك.

اۋىلدان كەتكەننەن كەيىن تۋرا ەكى جىلدان سوڭ سەرىك ەۋروپادا ءبىلىم الامىن دەگەن شەشىمگە كەلگەن. دورتمۋند قالاسىنداعى ۋنيۆەرسيتەتتەردىڭ بىرىنە وقۋعا ءتۇسىپ، ماشينا جاساۋ مامانى اتانىپ شىقتى.

سوندىقتان، شەتەلگە بارىپ، ءبىلىم العىسى كەلەتىن تۇلەكتەر ءۇشىن ءبىرىنشى كەڭەس – ۋاقىتتى جۇيەلەپ، ءتىل كۋرسىنا جازىلۋ كەرەك. كۋرستان تىس، الەۋمەتتىك جەلىگە كەتەتىن ۋاقىتتى ينتەرنەتتەگى تەگىن ءتىل ساباقتارىنا جۇمساعان ابزال.

ال امەريكاعا جول IELTS بەن TOEFL-دان باستالادى

ال، اقش-تا ءبىلىم الۋ ءۇشىن ءوزىڭىز قالاعان وقۋ ورنىنىڭ تالابىنا ساي وسى ەكى ەمتيحاننىڭ ءبىرىن تاپسىرساڭىز جەتكىلىكتى. مىسالى، IELTS ەمتيحانىنان قازاقستانداعى اعىلشىن كونسۋلدىعىندا نەمەسە سەرتيفيكاتتالعان حالىقارالىق مەكتەپتەردىڭ بىرىندە تاپسىرۋعا بولادى. باعاسى – 50 مىڭ تەڭگە اينالاسىندا. شاما كەلگەنشە بىر-ەكى اپتا ەرتە جازىلىپ قويعان دۇرىس، ويتكەنى، ورىن بولماي جاتادى.

ءبىرىنشى كۇنى اۋىزشا، ەكىنشى كۇنى جازباشا ەمتيحان تاپسىراسىز. جاۋابى ەكى اپتادا دايىن بولادى. اقش-قا بارۋ ءۇشىن IELTS ەمتيحانىنان ەڭ ازى 6.0 بالل، TOEFL iBT-دان 60 باللدان جوعارى باعا الۋىڭىز كەرەك. بۇل – باكالاۆرياتتا وقۋ ءۇشىن. ال ماگيستراتۋراعا باراتىن بولساڭىز العاشقىسىنان 7.0 بالل، ەكىنشىسىنەن 100 باللدان ارتىق جيناۋىڭىز ءتيىس. ەكى ەمتيحاننان دا كەرەكتى بالل العان سوڭ، ارى قاراي قامدانۋعا بولادى.

IELTS پەن TOEFL ەمتيحاندارىنان باسقا، امەريكانىڭ وقۋ ورىندارى تالاپ ەتەتىن تاعى ءبىر – SAT ەمتيحانى بار. ونى اقش-تىڭ ءوز تالاپكەرلەرىمەن قاتار، شەتەلدىكتەر دە تاپسىرادى. بۇل سىناقتان اقش-تان باسقا، 175 ەلدە وتۋگە بولادى. قازاقستاندا دا.

جالپى 3 ساعات 45 مينۋتقا جالعاساتىن ەمتيحان تالاپكەردىڭ اعىلشىن تىلىندە ءماتىن وقۋىن، ەسەپ شىعارۋىن جانە جازباشا ءبىلىمىن تەكسەرەدى. اقىلى. ءبىر رەت وتە الماساڭىز، تاعى بىرنەشە رەت تاپسىرۋعا بولادى.

ون-لاين دا مۇمكىندىك بار. اقش-تا Sat تاپسىرۋ $45 (بۇگىنگى ۆاليۋتا باعامى بويىنشا 1 دوللار –310 تەڭگە). اقش-تان باسقا ەلدەرگە كونتينەنتتىك قوسىمشا سومالار بەكىتىلگەن. ەۋرازيا ەلدەرى ءۇشىن $38 قوسىلادى. ياعني، بارلىعى $45 + $38 = $83.

ءبىر ەمەس، بەس ۋنيۆەرسيتەت تاڭداۋعا بولادى

اعىلشىن تىلىمەن قاتار، شەتەلدىك ۋنيۆەرسيتەتتەردى دە زەرتتەي بەرۋ كەرەك. العاشىندا قازاق، ورىس تىلدەرىندە، ءتىل مەڭگەرگەن سوڭ اعىلشىن تىلىندە مول اقپارات جيناۋعا بولادى. ەڭ الدىمەن مىنانى ەستە ساقتاڭىز: اقش-قا وقۋعا بارامىن دەگەن ادام كەمىندە 1،5-2 جىل بۇرىن قامدانۋ كەرەك. اعىلشىن ءتىلىنىڭ ەمتيحانى مەن قۇجات جيناۋ پروسەسى وسى 2 جىلعا كىرەدى.

ەكىنشىدەن، ءبىر ەمەس، بەس، ءتىپتى، ون وقۋ ورنىن تاڭداپ قويىڭىز. بۇل رەتتە اقش-تىڭ ۋنيۆەرسيتەتتەرىن عانا تاڭداپ، كوللەدجدەرىن مەنسىنبەي كەتۋگە بولمايدى. تاڭداعان وقۋ ورىندارىنىڭ تەڭ جارتىسى كوللەدج بولسا، ءتىپتى جاقسى. اقش ءبىر قادام بولسىن جاقىنداي بەرەدى. سەبەبى، قازاقستانداعىداي ەمەس، اقش كوللەدجەرىنىڭ بەدەلى جوعارى ءارى ەكى جىلدان كەيىن ۋنيۆەرسيتەتتىڭ ءۇشىنشى كۋرسىن جالعاستىرىپ وقۋعا بولادى.

تاعى ءبىر ماڭىزدى فاكتور بار: الدىمەن امەركانىڭ ەڭ ۇزدىك 30 ءتىپتى، 50 ۋنيۆەرسيتەتىنىڭ ءتىزىمىن جازىڭىز. بۇل وقۋ ورىندارى ءسىز تاڭداعان ۋنيۆەرسيتەتتەردىڭ قاتارىنا قوسىلماۋ كەرەك. سەبەبى، امەريكانىڭ ۇزدىك ۋنيۆەرسيتەتتەرى مەملەكەتتىك گرانت پەن ستيپەنديا تاعايىندامايدى. ياعني، امەريكادا جوعارى ءبىلىمدى تەگىن الۋ ءۇشىن ۇزدىكتەر قاتارىنا جاتپاسا دا، ستۋدەنتكە گرانت، ستيپەنديا، جاتاقحاناداعى ورىنمەن قاتار، ساپالى ءبىلىم بەرە الاتىن، ءبىراق رەيتينگىسى 50-دەن تومەن ۋنيۆەرسيتەتتەردى تاڭداۋ كەرەك.

بارىنشا كوپ وقۋ ورنىن تاڭداعاننىڭ ارتىقشىلىعى بار

قاراڭىز، قازاقستاندا اتتەستاتىڭىز بەن تەست قورىتىندىسىنىڭ تۇپنۇسقاسىن قۇجات تاپسىرىپ وتىرعان نەگىزگى ۋنيۆەرسيتەتتىڭ قابىلداۋ ءبولىمى الىپ قالادى. سول ۋنيۆەرسيتەتتىڭ قابىلداۋ بولىمىندە وتىرىپ، تاڭداۋ ءپانى سايكەس كەلەتىن ءتورت جوو مەن ءتورت ماماندىقتى تاڭداي الاسىز. ءبىراق باسقا ماماندىققا ب ا ق سىناۋ ءۇشىن قۇجاتتىڭ ءتۇپنۇسقاسى كەرەك، ال ول گرانت ناتيجەسى شىققانشا، نەگىزگى ۋنيۆەرسيتەتتىڭ قابىلداۋ كوميسسياسىندا جاتادى.

اقش-تا ولاي ەمەس. ءسىز قاتارىنان بەس جانە ودان دا كوپ ۋنيۆەرسيتەتكە قۇجات تاپسىرا الاسىز. جانە قۇجاتتارىڭىزدىڭ ءتۇپنۇسقاسىن ەمەس، نوتاريۋس بەكىتكەن كوشىرمەلەرىن جىبەرەسىز. بۇل جەردە بىرىنشىدەن، ۋاقىت ۇتاسىز. ءبىر ۋنيۆەرسيتەت سىزگە شاقىرتۋ جىبەرە مە، جوق پا، بەلگىسىز، ال بىرنەشە ۋنيۆەرسيتەتتەن شاقىرتۋ كەلەدى دەگەن ءۇمىت باسىم.

ول جاق تياناقتىلىقتى جاقسى كوردى

اقش-تىڭ جوعارى ءبىلىم ورىندارىنا وقۋعا ءتۇسۋ ءۇشىن مىنا ستاندارتتى قۇجاتتار قاجەت:

1. ءتولقۇجات كوشىرمەسى

2. بۇعان دەيىن العان ءبىلىمىڭىزدى راستايتىن قۇجات

3. مەكتەپ اتتەستاتى نەمەسە ديپلومداعى كرەديتتەردىڭ اۋدارماسى مەن نوتاريۋس ارقىلى بەكىتىلگەن ترانسكريپتى

4. ۇسىنىس حات

5. بانكتەگى ەسەپشوتىڭىزدىڭ كوشىرمەسى

6. ءتىل سىناقتارىنىڭ سەرتيفيكاتى (IELTS، TOEFL، SAT، GRE)

بۇل قۇجاتتارىڭىز ۋنيۆەرسيتەتتىڭ سايتىنداعى تالاپقا ساي تولتىرىلۋ كەرەك. قۇجاتىڭىز قاشالىقتى تياناقتى بولسا، قابىلداۋ كوميسسياسى ءوتىنىشتى سونشالىقتى تەز قارايدى.

بۇكىل اقپارات ۋنيۆەرسيتەت سايتىندا.

اقش-تىڭ كەز كەلگەن ۋنيۆەرسيتەتى ستۋدەنتكە قانداي مۇمكىندىك، قانداي ماماندىق، قانداي باعدارلاما ۇسىنا الاتىنىن الدىن الا ناقتىلاپ قويادى. ول ءار ۋنيۆەرسيتەتتىڭ سايتىندا تۇر. جالپى، امەريكاداعى وقۋ تۋرالى ماتەريال شاش ەتەكتەن. ءبىز ناقتى ءبىر باعىتى بويىنشا جول سىلتەپ وتىرمىز. اقش ۋنيۆەرسيتەتتەرىن توپتاستىرعان سايت تا بار. وسى سايتتاعى ۋنيۆەرسيتەتتەر اراسىنان "ستيپەندياسى بارىن" ىرىكتەپ الۋعا بولادى. قۇجات تاپسىرعاندا دا تەك ستيپەندياسى بار ۋنيۆەرسيتەتتەرگە تاپسىرعان ابزال. ويتكەنى، اقش-تا ءبىلىم الۋدى كەز كەلگەننىڭ قالتاسى كوتەرە بەرمەيتىنى انىق. ءار ۋنيۆەرسيتەتتىڭ سايتىن تەرەڭ زەرتتەپ، تالابىنا ساي كەلدىم دەگەن ۋنيۆەرسيتەتكە عانا ءوتىنىش تاستاۋ كەرەك.

امەريكا ۋنيۆەرسيتەتتەرىنىڭ باكالاۆرياتىن كۇزگى سەمەستەردەن باستاۋ ءۇشىن قۇجاتتى سول جىلدىڭ قىسى باستالا سالا، كوكتەمنەن كەشىكتىرمەي تاپسىرۋ كەرەك. ال، حالىقارالىق ستۋدەنتتەردىڭ دەرەگى ءبىر جىل بۇرىن قابىلدانادى. ءوتىنىش بەرۋ ءۇشىن وقۋ ورنىنىڭ ارنايى پورتالىنا تىركەلەسىز دە، قۇجاتتارىڭىزبەن قوسا، ۋنيۆەرسيتەتتىڭ ۇلگىسىن تولتىراسىز. ءدال سول پورتالدان ءوتىنىشىڭىزدىڭ ستاتۋسى مەن قارالۋ پروسەسىن باقىلاي الاسىز.

شامامەن 3-4 ايدان كەيىن قۇجات تاپسىرعان وقۋ ورىندارىنان جاۋاپ كەلە باستايدى. بىرەۋى قابىلداندىڭىز دەسە، بىرەۋى، "قاپالانباڭىز" دەپ جۇباتۋ حات جىبەرەدى. سولاردىڭ ءبىرىن تاڭداپ، وقيمىن دەگەن راستاۋ حات جىبەرەسىز. ءسىزدى تاڭداعان، ءسىز تاڭداعان ۋنيۆەرسيتەت جەكە كۋراتور بەكىتەدى دە ەندىگى پروسەستەردىڭ ءبارىن كۋراتورىڭىزبەن ونلاين تالقىلاپ وتىراسىز.

ءدال وسى كۋراتوردان گرانتتا ءبىلىم الۋدىڭ جولدارىن تاپتىشتەپ سۇراپ الاسىز. كۋراتورعا قارجىلىق جاعدايىڭىزدى بايانداپ، قوسىمشا جەڭىلدىكتەر سۇراۋ – وقۋعا ءتۇسۋ پروسەسىنىڭ ءبىر بولىگى دەۋگە بولادى. اقش-تاعى كەز كەلگەن ۋنيۆەرسيتەت شەتەلدىك ستۋدەنتتەرگە جەكە-جەكە كوڭىل بولەدى جانە ءار ستۋدەنتتىڭ جاعدايىن قاراپ، وعان تەگىن نەمەسە ارزان ءبىلىم ۇسىنادى.

مىسالى، ميسسۋري شتاتىنداعى مەريۆيلل ۋنيۆەرسيتەتى. شەتەلدىك ستۋدەنتتەرگە ارنالعان 10 ستيپەندياسى، ياعني گرانتى بار. بۇل ۋنيۆەرسيتەت بىلتىر ستۋدەنتتەرىنە قارجىلاي كومەك كورسەتۋ ءۇشىن (ستيپەنديا مەن گرانتتار وسىنىڭ اياسىندا) 99 ملن دوللار جۇمساعان.وقۋ ورنى ستۋدەنتتەرىنە مەملەكەتتىك، فەدەرالدىق جانە جەكەمەنشىك باعدارلامالار اياسىندا قارجىلاي قولداۋ كورسەتە الادى.

مۇندا باكالاۆرياتقا كۇندىزگى بولىمگە وقۋعا تۇسكەن ستۋدەنت 6000-14 000 دوللار اراسىندا ستيپەندياعا يە بولادى. ال، قوسىمشا تاعى 10 ءتۇرلى ستيپەنديا بار. ءبىرىنشىسى – پرەزيدەنتتىك ستيپەنديا. حالىقارالىق ستۋدەنتتەر، ياعني، شەتەلدىك ستۋدەنتتەردىڭ ءبارى قاتىسا الادى. ۇتىپ السا، ءتورت جىلعى اقىسى، جاتىن ورنى مەن ىشىپ-جەمى تۇگەل تولەنەدى.

ستۋدەنتتىڭ GPA كورسەتكىشى (Grade Point Average – اتتەستاتىڭىزبەن ديپلومىڭىزداعى باعالاردىڭ ورتاشا بالى) – 3،75، ال SAT سىناعى 27/1290 بولۋى كەرەك. بيىل وسىنداي ستيپەنديا الىپ ۇلگەرۋ ءۇشىن 2017 جىلدىڭ 1 جەلتوقسانىنا دەيىن قۇجات تاپسىرۋ كەرەك.

قالعان ستيپەنديالاردىڭ تالابى مەن كولەمىنە قىسقاشا توقتالساق

قامقورلىق ستيپەندياسى. شەتەلدىك ستۋدەنتتەردىڭ ءبارى قاتىسا الادى، السا، وقۋ اقىسى تولەنەدى. تالاپ – GPA – 3،75؛ SAT – 27/1290.

دوكتور دونالد اتىنداعى ستيپەنديا. حالىقارالىق ستۋدەنتتەردىڭ ءبارى قاتىسا الادى، وقۋ اقىسى تولىق تولەنەدى، جاتاقحانا مەن تاماعى تەگىن. GPA – 3،25؛ SAT – 23/1040

«كيبەرسپورت» ستيپەندياسى. شەتەلدىك ستۋدەنتتەردىڭ بارىنە ارنالعان. جىلىنا 2000 دوللار بەرىلەدى. «اڭىزدار ليگاسى» («ليگا لەگەند ويىنى») مەن «قۇيىن باتىر» (گەروي بۋري) جارىستارىنان سىناق الىنادى.

مۋلتيمادەنيەت ستيپەندياسى. وقۋ اقىسىنىڭ جارتىسى تولەنەدى. شەتەلدىك ستۋدەنتتەرىڭ ءبارى قاتىسا الادى. تالابى – ۋنيۆەرسيتەت كامپۋسىندا ينكليۋزيۆتى مادەنيەتتى قالىپتاستىرۋعا ۇلەسىن قوسۋى كەرەك.

مەليسسا بريكەي اتىنداعى ستيپەنديا. بۇل ستيپەندياعا اقش-تىڭ ميسسۋري شتاتىنداعى سەنت-لۋيس قالاسىنىڭ دە لا سال ورتا مەكتەبىن نە وسى قالاداعى مەملەكەتتىك جانە جەكەمەنشىك مەكتەپتەردى ءتامامداعان ستۋدەنتتەر عانا قاتىسا الادى. وقۋ اقىسى مەن جاتىن ورنى ءۇشىن 8000 دوللار بەرىلەدى.

ونەر مەن ديزاين ستيپەندياسى. جىلىنا 500 دوللاردان باستاپ 5000 دوللار كولەمىندە. شەتەلدىك ستۋدەنتتەر قۇجات تاپسىرا الادى. بۇل گرانتتىڭ كەلەسى قۇجاتى 2018 جىلدىڭ 1 ناۋرىزىنا دەيىن قابىلدانباق. تالاپ – ستۋدەنت پورتفوليوسىن ۇسىنۋى ءتيىس.

ءان مەن بي سالاسىنداعى ستيپەنديا. شەتەلدىك ستۋدەنتتەر قاتىسا الادى. گرانت يەگەرلەرى وقۋعا تۇسكەننەن كەيىن ىرىكتەلىپ، جىلىنا 2000 دوللارعا دەيىن ستيپەنديا الا الادى.

يننوۆاسيالىق ستيپەنديا. جىلىنا 3 000 دوللار ستيپەنديا تاعايىندالادى. ءبىراق، بۇعان تەك اقش-تىڭ تۇرعىلىقتى ستۋدەنتتەرى قاتىسا الادى.

تاعى ءبىر مىسال رەتىندە پەنسيلۆانيا شتاتىنداعى گۋمانيتارلىق Dickinson College وقۋ ورنىن تاڭداپ كورىڭىز. بۇل كوللەدجىڭ IV عاسىرعا جۋىق تاريحى بار. شەتەلدىك ستۋدەنتتەر ءۇشىن 6 ءتۇرلى ستيپەندياسى بار. ءبارى دە اقشالاي. جانە العاشقى وقۋ جىلىندا ستۋدەنتتەر كامپۋسىنان جاتىن ورىن بەرەدى.

قامقورلىق ستيپەندياسى. شەتەلدىك ستۋدەنتتەردىڭ ءبارى قاتىسىپ، جىلىنا 7500 دوللار كولەمىندە ستيپەنديا الا الادى.ۋنيۆەرسيتەت باعدارلاماسىنداعى ەڭ قيىن پاندەردەن جوعارى بالل جيناعان ستۋدەنتتەر قاتىسا الادى.

كافدرا دەكانىنىڭ ستيپەندياسى. جىلىنا 5000 دوللار ستيپەندياسى بار. ۋنيۆەرسيتەتتىڭ تىنىس-تىرشىلىگىنە بەلسەندى قاتىسقان جانە قيىن پاندەردەن جوعارى ۇپاي جيناعان ستۋدەنتتەرگە بەرىلەدى. ستيپەندياعا شەتەلدىك ستۋدەنتتەر دە قۇجات تاپسىرا الادى.

دجون ديكينسون اتىنداعى ستيپەنديا. ستيپەنديا كولەمى - 20 000 دوللار. شەتەلدىك ستۋدەنتتەردىڭ ءبارى قاتىسا الادى. وسى ستيپەنديانى الامىن دەگەن ستۋدەنت وقۋ باعداراماسىنىڭ قيىن پاندەرىنەن ەڭ ازى 4.0 (ا) بالل جيناۋ كەرەك. SAT ەمتيحانى بويىنشا 1350 بالل جيناپ، كوللەدجدە جان-جاقتى ءبىلىم دەڭگەيىن بايقاتۋى قاجەت.

"ۇلتتىق ماراپات" ستيپەندياسى. بۇل ستيپەنديانى كوللەدجدىڭ نەگىزىن قالاعان دجون ديكينسون مەن بەندجامين راشتىڭ اتىنداعى ورتاق گرانت دەۋگە بولادى. ستيپەنديا كولەمى – 2000 دوللار. قيىن پاندەردەگى باعاسى جوعارى شەتەلدىك ستۋدەنتتەردىڭ ءبارى قاتىسا الادى.

سونداي-اق 15000 دوللاردان تۇراتىن بەندجامين راش اتىنداعى جەكە ستيپەنديا بار. بۇعان دا شەتەلدىك ستۋدەنتتەر قاتىسا الادى. ەڭ قيىن پاندەردەن 4.0 (ا) بالىن العان جانە SAT تەستىنەن 1350 بالل جيناعان ستۋدەنتتەر باعىن سىناسا بولادى.

دجون مونتگومەر اتىنداعى ستيپەنديا 10 000 دوللاردى قۇرايدى. بۇل ستيپەنديا قيىن پاندەردەن ەڭ جاقسى باعا العاندار مەن بەلگىلى ءبىر سالادا تالانتى بار جاستارعا ارنالعان.

فۋلبرايت باعدارلاماسىمەن دە تەگىن وقۋعا بولادى

ايتا كەتۋ كەرەك، اقش-تا ماگيسترلەرگە ارنالعان فۋلبرايت (Fulbright Graduate Student Program) پروگرامماسى بار ەكەنىن كوپ ادام بىلە بەرمەيدى. ول ارقىلى ءبىر تيىن تولەمەي-اق قايتا اي سايىن 1500-2500$ ستيپەنديا الىپ وقۋعا بولادى. ول تۋرالى ناقتىراق مىنا جەردەن وقىپ بىلە الاسىز.

ءبىلىم ىزدەسەڭ، ەۋروپانى دا بايقاپ كور

امەريكاداي ەمەس، قازاقستان جاستارىنە ەۋروپانىڭ ۋنيۆەرسيتەتتەرىنە تەگىن وقۋعا ءتۇسۋ وڭايىراق. ويتكەنى، ەۋروپانىڭ ونشاقتى ەلىندەگى مەملەكەتتىك ۋنيۆەرسيتەتتەر شەتەلدىك ستۋدەنتتەردى ءوز جاستارىمەن تەڭ قويىپ، تەگىن ءبىلىم بەرەدى. كوبىنە ورتاق تالاپ – سول ەلدىڭ مەملەكەتتىك ءتىلىن ءبىلۋ كەرەك.

مىسالى، چەحيا مەملەكەتى. ەگەر ءسىز چەح ءتىلىن وتە جاقسى مەڭگەرگەن بولساڭىز، وسى ەلدىڭ كەز كەلگەن مەملەكەتتىك ۋنيۆەرسيتەتىندە تەگىن ءبىلىم الا الاسىز. ءبىراق، چەحيانىڭ ءىرى قالالارىندا ستۋدەنت جاتىن ورنىن ءوزى تابادى.

گەرمانيانىڭ تالاپتارى دا جەڭىل. نەمىس تىلىنەن ەمتيحان تاپسىرىپ، ءوز ەلىڭىزدەگى ۋنيۆەرسيتەتتە كەمىندە 2 جىل ءبىلىم الۋىڭىز كەرەك. نەمەسە، گەرمانيانىڭ ۋنيۆەرسيتەتىندە ءبىر جىل دايىندىق كۋرسىن وقۋ مىندەتتى. بىردەن ايتا كەتەيىك، ەۋروپا ۋنيۆەرسيتەتتەرى تەگىن ءبىلىم الاتىن ستۋدەنتتىڭ وزىنەن كىتاپحانا، سپورتزال تاعى باسقا قىزمەتتەر ءۇشىن ءبىر رەتتىك جارنا الادى. گەرمانيانىڭ مەملەكەتتىك وقۋ ورىندارى ستۋدەنتتىڭ ەسەپشوتىنداعى بەلگىلى ءبىر سومانى ءبىر جىلعا بۇعاتتايتىنى دا سودان.

بولگاريا مەن نورۆەگيا دا شەتەلدىك ستۋدەنتتەردى قۋانا قارسى الادى. ونىڭ ۇستىنە، بۇل ەلدەردىڭ مەملەكەتتىك ۋنيۆەرسيتەتتەرى اعىلشىن تىلىندە ءبىلىم بەرەتىن باعدارلامالار ۇسىنادى. ءبىراق، ەكى ەلدىڭ دە مەملەكەتتىك ءتىلىن ءبىلۋ مىندەتتى.

دەسە دە، ءبىر قاراعاندا وقۋ تەگىن بولعانمەن، ەۋروپانىڭ كوپ ۋنيۆەرسيتەتتەرى جاتاحقانا بەرمەيدى. سوندىقتان، بۇل ەلدەردە ءومىر ءسۇرۋ ارزان با، قىمبات پا، سونى زەرتتەپ العان سوڭ عانا قۇجات تاپسىرعان ابزال. ەۋروپاداعى ۋنيۆەرسيتەتتەر دە قۇجاتتى ونلاين قابىلدايدى.

ەۋروپادا تەگىن وقۋعا مۇمكىندىك بەرەتىن باسقا گرانتتار

مىسالى، ۇلىبريتانيادا Chievening، گەرمانيادا DAAD، ال ەۋرووداق قارجىلاندىراتىن Erasmus Mundusباعدارلامالارى.

قىتايدا دا تەگىن وقۋ بار

سوڭعى ۋاقىتتا قىتايدا وقىپ جاتقان جانە وقىعىسى كەلەتىن جاستارىمىزدىڭ سانى ارتىپ كەلەدى. قىتايدا تەگىن ءبىلىم الۋعا نيەتتى تۇلەكتەر بولسا، ونىڭ دا جولدارى بار. جۇڭگو حالىق رەسپۋبليكاسىنىڭ ءبىلىم مينيسترلىگى مەن قازاقستاننىڭ ءبىلىم مينيسترلىگى اراسىنداعى كەلىسىم، سونداي-اق، شانحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەتارالىق كەلىسىمى اياسىندا تەگىن وقۋعا بولادى. ءبىلىم مينيسترلىگىنىڭ سايتىندا قىتايدا باكالاۆريات، ماگيستراتۋرا مەن دوكتارانتۋرا بويىنشا ءبىلىم الۋ باعدارلاماسىنىڭ كونكۋرسى جاريالانعان.

ستۋدەنتكە قويىلاتىن نەگىزگى ءتورت كريتەريي بار:

1. جۇڭگو ءتىلىنىڭ HSK سەرتيفيكاتى

2. اتتەستات نەمەسە ديپلومى

3. اكادەميالىق كەزەڭ اياقتالعان ۋاقىتتاعى وقۋ ۇلگەرىمىنىڭ باعاسى

4. ەگەر ماگيستراتۋرا مەن دوكتورانتۋرادا وقيمىن دەسە، قىتايدا ءبىلىم الامىن دەگەن ماماندىعى بويىنشا قازاقستاننىڭ ديپلومى.

وسى كريتەرييلەرگە ساي تالاپكەر ەركىن، قازاق نەمەسە ورىس تىلدەرىندە شەتەلگە بارۋىنىڭ ماقساتىن جازىپ، ءبىلىم مينيسترلىگىنىڭ سايتىنداعى نۇسقاۋعا ساي، قىتايدا تەگىن ءبىلىم الا الادى. ەكى ەلدىڭ مينيسترلىكتەرى اراسىنداعى كەلىسىم بويىنشا بيىل 39، شىۇ ۇكىمەتارالىق كەلىسىمىنە ساي 16 گرانت ءبولىنىپ وتىر.

اۆتورى: كەنجەكەي توقمۇرات قىزى

شولۋشى: اسەل وتەشوۆا