ءقايسىبىر جىلى قاراتاۋ بوكتەرىندەگى تاۋكەنتكە جولىم تۇسە قالدى. مەكتەبىنە باس سۇقتىق. وقۋ ءىسىنىڭ مەڭگەرۋشىسى سىمباتتى، اشىق-جارقىن كەلىنشەك ەكەن. مەكتەپتى ارالاتىپ، جەتىستىكتەرىمەن تانىستىردى. تاۋكەنت تۇكپىردە ورنالاسسا دا راسىمەن-اق، وقۋ ورداسى الماتى مەكتەپتەرىنەن ەش كەم ەمەس. لينگوفوندىق جانە مۋلتيمەديالىق كابينەتتەرى جاپ-جاڭا. فرانسۋزدار جاساقتاپ بەرىپتى. تانىستىرۋ بارىسىندا الگى كەلىنشەك ماعان جالت بۇرىلا قاراپ، اقسيا كۇلىمسىرەدى. تانىس تا بەيتانىس جانار. ءبىراق ءجون سۇراسىپ تۇراتىن ۋاقىت جوق. كوپ ايالداعان جوقپىز. ارنايى ءبىز ءۇشىن جايىلعان داستارحانعا قاراماستان، ۋران توتىعىن وڭدەيتىن زاۋىتتارعا تارتىپ كەتتىك. نەگىزگى تاپسىرمامىز دا وسى ەدى. - تولەگەن مومبەكوۆتىڭ "سالتانات" كۇيىن بىلەسىز بە؟ - دەدى بىزگە جول كورسەتىپ جۇرگەن سەرىگىمىز. - الگى كەلىنشەك سول سالتانات قوي! اپ-ساتتە مەن ءۇشىن اسپان اينالىپ جەرگە ءتۇستى! كوز الدىما شاشى قيىلعان، جۇزىنەن جىلى كۇلكى كەتپەيتىن اق سارى قىز كەلە قالدى. ول كەزدە مەن 9-سىنىپتا وقيتىنمىن. جاز بولسا ءتۇپ ناعاشىلارىمنىڭ اۋىلى - قوزمولداققا تارتىپ كەتۋشى ەدىم. ەرماحان كوكەمنىڭ ءۇيى - تولەگەن كۇيشىمەن يىقتاس وتىر. كۇن سايىن كەشكىلىك سول ماڭايدىڭ جاستارى جيىلىپ، ويىن وينايمىز، اڭگىمە-دۇكەن قۇرامىز. جانىنا قۇربىسىن ەرتىپ، سالتانات تا كەلىپ تۇرادى. سىرتتاي بىلۋىمشە، سالتاناتتىڭ اكەسى بەلگىلى كۇيشى. اناسى سالتاناتقا تولعاق ۇستىندە دۇنيەدەن ءوتىپتى. تولەگەن كۇيشى "سالتانات" كۇيىن جان-دۇنيەسى كۇيزەلگەن تۇستا دۇنيەگە اكەلىپتى. شىعارمانىڭ ونە بويى لاپىلداعان سەزىم، وزەكتى ورتەر وكىنىش، تىعىرىقتا قىلاڭ بەرگەن ۇمىتتەن تۇرادى. تىڭدارماننىڭ الپىس ەكى تامىرىن ءيىتىپ، جانارعا ەرىكسىز جاس ۇيىرەدى. كۇيشى بۇل قايعىعا دا مويىمادى. باسىن تىك كوتەرىپ، جاستاي جەتىم قالعان بالالارىن جەتىلدىرۋگە ۇمتىلدى. كەيىننەن، ءبىر ايەلگە ۇيلەندى. ودان 2-3 بالاسى بار ەكەنىن ەستىگەم. ءتىپتى، كورىپ تە ءجۇردىم. بىرتە-بىرتە سالتانات ەكەۋىمىزدىڭ ءسوزىمىز جاراسا باستادى. كۇن ەڭكەيسە بولعانى، عاني ەكەۋىمىز سالتاناتتىڭ ەسىگىنىڭ الدىنا جەتەمىز. ودان ارى رايگۇلدى ەرتىپ الىپ، قاراڭعى تۇسكەندە ەكى-ەكىدەن ءبولىنىپ كەتەمىز. جۇرەكتە بۇلقىنعان بالالىق سەزىم اۋزىمدى بۋادى. كوپ ەشنارسە ايتا قويمايمىز. ول كەزدە بۇيىعى ەدىك. مەنىڭ بايقاعانىم - سالتاناتتىڭ جانارى وتە سىرشىل. ىشتەگى سەزىمىن مولدىرەگەن كوزدەرى جاسىرا المايدى. سول كوزدەن ۇققان سەزىمدى عانا قاناعات تۇتامىن. ال سويلەگەن كەزدە تەك اناسى جايلى تولعانادى. جەتىمسىرەگەن كوڭىل جۇبانىش ىزدەيدى. مەن ءۇنسىز تىڭدايمىن. جازدىڭ قىسقا ءتۇنى تامىلجىپ تۇر. قاراتاۋدان ەسكەن سالقىن سامال ىشتەگى الاي-تۇلەي سەزىممەن قوسىلىپ دەنەنى مۇزداتىپ سالادى. كەمىپ، جارىعى سەمىپ بارا جاتقان ايدىڭ ولىمسىرەگەن ساۋلەسى سالتاناتتىڭ بەتىندەگى قۇبىلعان سەزىمدى جاسىرا المايدى. شەگىرتكەنىڭ شىرىلى، قوراداعى قويدىڭ كۇيسەگەن دىبىسى، اندا-ساندا ءاۋپ ەتە قالاتىن ماڭ توبەت تۇنەكتەگى ءولى تىنىشتىققا جاراسىمدى جان بىتىرەدى. - مەنى ىزدەپ قالدى، - دەيتىن سالتانات، ءۇي جاعىنا ابدىراي قاراپ. - كوكەم مەنسىز كوز ىلمەيدى... ەسىك الدىنا كەلگەسىن تاعى دا ءبىراز ءۇنسىز تۇرامىز. الدەن سوڭ، سالتاناتتىڭ جانارى جارق ەتىپ، بەتىمە قارايدى دا، تىستەرى اقسيعان كۇيى ۇيىنە جۇگىرە جونەلەدى...

بۇل تاعدىردىڭ شەبەرلىگىن ايتساڭشى! اراعا ءبىراز جىل سالىپ، قيانداعى اۋداننان قىز الدىم. سالتانات تا ءدال سول اۋىلعا كەلىن بولىپ ءتۇسىپتى. ءبىراق جولىعۋدىڭ ءساتى تۇسپەدى. بىرنەشە جىل وتكەسىن، سالتاناتتىڭ رەسەيگە كاماز ايداپ كەتكەن كۇيەۋىنىڭ ءىز-تۇزسىز جوعالعانى جايلى جايسىز حابار جەتتى. "كەبەنەك كيگەن كەلەدى" دەگەن ۇمىتپەن، سالتانات 5-6 جىل تاعى كۇتتى. سوڭىندا اتاسى مەن ەنەسى كەلىننەن وبال بولماسىن دەپ، باتاسىن بەرىپ، شىعارىپ سالىپتى. "سالتانات توركىنىنە كوشىپ كەتتى" دەپ تاعى ءبىر ەستىگەم. "اناسىنىڭ قۇرساعىنان ازا تۇتىپ تۋعان قىزدىڭ تاعدىرى تاعى دا تالكەككە ءتۇستى-اۋ" دەپ ءبىر كۇيىندىم. ايانىش تۋدارتىن سەزىم ەمەس. ءجاي، كۇيىك قانا... "سالتانات كۇيىن بىلەسىز بە؟" دەگەندە سەلك ەتكەنىم دە سودان ەدى. مەنىڭ كوز الدىمدا ەكى سالتانات تۇردى: ونىڭ ءبىرى بالعىن دا بەيكۇنا بويجەتكەن بولسا، ەكىنشىسى سىمباتى كەلىسكەن مۇلدەم وزگە كەلىنشەك ەدى. ال جاستىق شاقتىڭ ورالماس كۇندەرى 32 جىل بۇرىن زۋ ەتە شىققان. ەندى قايتادان سالتاناتپەن كەزدەسەرمىن دەپ كىم ويلاعان؟ اقسيعان قىزدىڭ كوڭىلدەگى بەينەسى الدەقاشان كومەسكىلەنىپ كەتىپتى. ال ونىڭ مەنى تانىعانى اقيقات...

(Facebook-تەگى پاراقشاسىنان)