تۇركيانىڭ ىستامبۇل قالاسىندا تۇركىتىلدەس ەلدەردىڭ ورتاق تەلەارناسىن قۇرۋ بويىنشا جۇمىس توبىنىڭ العاشقى وتىرىسى ءوتتى. جيىندا قازاقستان، ءازىربايجان مەن تۇركيانىڭ مەديا سالاسىنىڭ مەنەدجەرلەرى بولاشاق ارنانىڭ تۇجىرىمداماسىن تالقىلادى. بۇل جونىندە Baq.kz جاڭالىقتارى جازدى.  

تۇركى كەڭەسى باس حاتشىسىنىڭ ورىنباسارى ابزال ساپاربەك ۇلىنىڭ ايتۋىنشا قازاقستان دەلەگاسياسى وسى جيىنعا ارنايى قۇجاتپەن كەلدى. وسى قۇرىلاتىن تەلەارنانىڭ تۇجىرىمداماسىن دايىنداپ، مۇشە مەملەكەتتەردىڭ وكىلدەرىمەن تالقىعا سالدى. الداعى كەزەكتە مۇشە مەملەكەتتەر قازاقستان ۇسىنعان تۇجىرىمدامانى ەگجەي-تەگجەي تالقىلاپ، كەلەسى جىلى اقپان ايىندا وتەتىن جيىندا ورتاق كەلىسىمگە كەلۋدە جوسپارلاپ وتىر. 

قازاقستاندىق ساراپشىلاردىڭ پىكىرىنشە، ورتاق تەلەارنا اقپاراتتىق-تانىمدىق باعىتتا حابار تاراتۋعا باعىتتالعان. سونداي-اق، الەمگە تۇركى تاريحى پەن مادەنيەتىن ءسالت-داستۇرىن ناسيحاتتايتىن باستى ارناعا اينالۋى كەرەك. مۇنداي تەلەارنا اشۋدى بيىل ەلباسى بودرۋمدا وتكەن تۇركىتىلدەس مەملەكەتتەر ىنتىماقتاستىعى كەڭەسىنىڭ سامميتىندە كوتەرگەن بولاتىن. وسىعان وراي، تۇركى كەڭەسىنىڭ حاتشىلىعى ارنايى جۇمىس توبىن قۇرىپ، ارنانىڭ قۇقىقتىق-نورماتيۆتىك بازاسىن ازىرلەۋگە كىرىستى.

كەلەسى جىلى استانادا وتەتىن سامميتتە مەملەكەت باسشىلارى ءتيىستى كەلىسىمگە قول قويادى دەپ جوسپارلانۋدا.

قامشى-اقپارات