«ونەرلى ورگە جۇزەر» دەگەن حالىق دانالىعىن پايىمعا الساق، ونەردىڭ سان-سالاسى بار. سونىڭ بىرەگەيى – قىلقالاممەن ورنەك سالىپ، زامان مەن قوعام، تابيعات پەن ادام بەينەسىن شىنايى سومداۋ ارقىلى كەلەشەك ۇرپاقتى تاربيەلەۋ بولىپ تابىلادى. وسى قىلقالام ونەرى – ۇلى جاراتقاننىڭ پەندەسىنە بەرگەن ۇلكەن سىيى. قىلقالامنىڭ كومەگىمەن دۇنيەۋي جانە ادامي قۇندىلىقتاردى ناقتى كورسەتىپ، حالىقتىڭ رۋحاني-تانىم سەرپىلىسىنە قوزعاۋ سالۋعا ابدەن بولادى. وسىنداي ۇلى ونەردىڭ ورىندە ءجۇرىپ، ونىڭ از-كەم مەحناتى مەن قيىندىق قالتارىسىن تارتىپ، وزىندىك قولتاڭبامەن جۇرگەن سۋرەتشىلەر قاۋىمى جەتەرلىك. وسىنداي ەلگە ەلەنبەيتىن، كوزگە كورىنبەيتىن ساف ونەردىڭ ساحناسىندا كوپ جىلداردان بەرى ەسەلى ەڭبەك ەتىپ كەلە جاتقان ونەرلى ازاماتتىڭ ءبىرى – وراز-كوزدى ەسەنبايەۆ.
سۋرەتشى وراز اعا ەسەنبايەۆ 1960 جىلى 27 اقپاندا قىزىلوردا وبلىسى، جالاعاش اۋدانى، مادەنيەت اۋىلىندا دۇنيەگە كەلگەن. 1977 جىلى اۋدان ورتالىعىنداعى №123 ورتا مەكتەپتى بىتىرىسىمەن، كەڭەس ارمياسى قاتارىندا وتان الدىنداعى بورىشىن وتەيدى. 1980-1983 جىلدارى الماتىداعى ن.ۆ.گوگول اتىنداعى الماتى كوركەمسۋرەت ۋچيليششەسىن ءتامامداعان سوڭ، ەڭبەك جولىن قىزىلوردا قالاسىندا باستاپ، كەيىن 1989-93 جىلدارى ت.جۇرگەنوۆ اتىنداعى تەاتر جانە كوركەمسۋرەت ينستيتۋتىن ءتامامداعان. بۇگىندە ول، الماتى «سىمبات» ديزاين جانە تەحنولوگيا اكادەمياسىنىڭ سۋرەتشى-وقىتۋشى قىزمەتىندە ەڭبەك ەتىپ، جۇزدەگەن شاكىرتتەر تاربيەلەۋدە. قازاقستان سۋرەتشىلەر وداعىنىڭ مۇشەسى، بىرنەشە مارتە حالىقارالىق جانە رەسپۋبليكالىق كورمەلەردىڭ قاتىسۋشىسى، ءتۇرلى ماراپاتتاردىڭ يەسى. «قوبىزناما»، «ناۋرىز» اتتى تاريحي تۋىندىلار مەن «كوسياك» اتتى سىبايلاس جەمقورلىققا قارسى رەسپۋبليكالىق سۋرەت كورمەلەرىنىڭ اۆتورى.
وراز اعا جاراتىلىسىندا وتە قاراپايىم، ادامي بولمىسى قازاقي، سالماقتى ويمەن ساليقالى تىرلىك ەتىپ جۇرگەن ۇلت ونەرىنىڭ جاناشىرى. قىلقالام شەبەرى – ءوزىنىڭ ءساياسي-پالساپالىق تۇجىرىمدارى ارقىلى، اسقان جاڭاشىلدىقپەن، رۋحشىلدىقپەن كوركەمسۋرەت تۋىندىلارىن جۇرتشىلىققا ارناپ، سالىپ جاريا ەتىپ ءجۇر. سونىڭ ءبىر پاراسى تومەندەگى «مۇسىلماندىق حاديستەرى» مەن «كونفۋسييدىڭ ءپالساپالىق ىلىمىنە» ارنالعان ەڭبەكتەرى.
تاريحي دەرەكتەرگە قۇرىلعان، بوياۋ-بولمىسى قانىق، مازمۇنى تەرەڭ، تاعىلىمدى دا، تاربيەلىك ۇلكەن ءمانى بار سۋرەتتەردى كوپشىلىك وقىرمانعا ۇسىنامىز. قالىڭ وقىرمان وزدەرىنىڭ تالعامدى ويلارىن ورتاعا سالادى دەگەن ويدامىز.
[gallery link="file" columns="9" type="slideshow" ids="13888،13887،13886،13885،13884،13883،13882،13881،13880،13879،13878،13877،13876،13875،13874،13873،13872،13871،13870،13869،13868،13867" orderby="rand"]
مۇحتار مۇباراك ۇلى،
م.و.اۋەزوۆ اتىنداعى ادەبيەت جانە ونەر
ينستيتۋتىنىڭ كىشى عىلىمي قىزمەتكەرى.
