بىرنەشە جىل بۇرىن 61 جاستاعى دانەكەرلەۋشى پول گەيلوردتىڭ ومىرىنە ءقاۋىپ ءتوندى. سۇيىكتى ءۇي جانۋارى ونىڭ ولىمىنە سەبەپكەر بولا جازداعان. پولدىڭ مىسىعى تىشقان اۋلاپ ورمانعا ءجيى كەتىپ قالاتىن. پولدىڭ ونى اسىراپ العانىنا كوپ ۋاقىت بولدى. ءبىر كۇنى مىسىعى بىردەڭەگە شاشالىپ جاتقانىن كورگەن پول وعان كومەكتەسپەك بولادى. ول يەسىن تىستەپ، قاشىپ كەتەدى. بىرنەشە ۋاقىتتان كەيىن دانەكەرلەۋشى مىسىقتى ءولى كۇيىندە تاۋىپ الدى. مىسىق ءبىر اۋرۋدان ءولىپ قالعانداي كورىندى.

ول دەرت بىرنەشە كۇننەن كەيىن پولدىڭ دا ومىرىنە ءقاۋىپ ءتوندىردى. ونىڭ دەنە قىزۋى كوتەرىلىپ كەتتى. قولتىعىنىڭ استىندا ليمونمەن بىردەي بولاتىن ىسىك شىققاننان كەيىن تۋىستارى ونى بىردەن اۋرۋحاناعا جەتكىزدى.

دارىگەرلەر ونى قاراپ شىققاننان كەيىن ورتاعاسىردا «قارا ءولىم» دەپ اتالىپ كەتكەن بۋبون وباسىنا شالدىققانىن انىقتادى. پول بىردەن اۋرۋحاناعا بارماعان. سونىڭ سالدارىنان ومىرىمەن قوش ايتىسا جازدادى. پول 27 كۇندە كومادا جاتتى.

پولدىڭ ىشكى اعزاسى بىرىنەن كەيىن ءبىرى ءوز قىزمەتىن توقتاتتى. ءبىر اپتادان استام ۋاقىت ونى جاساندى بۇيرەك پەن وكپەگە قوستى. بىرنەشە مارتە جۇرەگى دە توقتاپ قالدى. دارىگەرلەر ونى ولەدى دەپ ويلادى. الايدا پولدىڭ اعزاسى مۇنداي سىناققا توتەپ بەرە الدى.

دارىگەرلەر ونىڭ جاسۋشالارى ءولىپ قالعان  اياق پەن قولىنىڭ ساۋساقتارىن كەسىپ تاستادى.

پول وبانىڭ ءۇش كەزەڭىن دە جەڭىپ شىعا العان از ادامداردىڭ ءبىرى. ەر ادام ءبىر عاجايىپپەن ءتىرى قالعانىن ايتادى. 21ء-شى عاسىردا مەديسينا قارىشتى قاداممەن العا جىلجىپ، دامىعانىمەن بۇل اۋرۋ ءالى كۇنگە دەيىن ۇلكەن ءقاۋىپ ءتوندىرىپ وتىر.

مۇگەدەكتىگىنە بايلانىستى زەينەتكە شىققان دانەكەرلەۋشى ءتىرى قالعانىنا قۋانىشتى ەكەنىن ايتادى. ول كوپ ۋاقىتىن وتباسىمەن، دوستارىمەن وتكىزەدى. ءقازىر ءۇي جانۋارىن ۇستامايدى. كەشكىسىن گاراجىندا پىشاق دايىنداۋمەن اينالىسادى. قولىنداعى ساۋساقتارىنىڭ جوقتىعى ونىڭ ەڭبەك ەتىپ ءوز ءناپاقاسىن تابۋىنا كەدەرگى كەلتىرىپ جاتقان جوق.

اتالمىش اۋرۋدى كوبىنە كەمىرگىشتەر تاراتادى.

دايىنداعان: اسەم المۇحانبەت