ءار اتا-انا ءۇشىن بالاسىنىڭ ءولىمى اۋىر سوققى ەكەنى ايدان انىق. پسيحولوگتاردىڭ ايتۋىنشا، بالاسىنان ايىرىلعاندار كوپ جاعدايدا وزدەرىن تىعىرىققا تىرەلگەندەي سەزىنىپ، ارى قاراي ءومىر ءسۇرۋ ءۇشىن كۇشتى قايدان الاتىنىن ويلاپ دال بولادى. ءبىرى وڭالسا، ەندى ءبىرى ءومىر بويى دەپرەسسيادا بولادى ەكەن.

سيندي مەتتيستىڭ 16 جاستاعى مەيسي ەسىمدى قىزى جول اپاتىندا كوز جۇمدى. الايدا بىرنەشە ۋاقىت وتكەننەن كەيىن اناسى قىزىنىڭ جازعان زاتىن تاۋىپ الادى.

مەيسي وتباسىندا تۇڭعىش بالا. ونى وتباسىنداعىلار قالجىنداپ «ەكىنشى انا» دەپ اتايتىن. ول ءۇش ىنىسىنە باس كوز بولىپ، ساباقتارىن قاداعالاپ، تاماقتارىن بەرىپ، قارايلاساتىن. دوستارى مەيسيدى مەيىرىمدى، شىعارماشىلىققا جاقىن ادام رەتىندە سۋرەتتەيدى. اناسى تۋعان كۇنىندە ءمايسيدىڭ وعان جازعان ءبىر بۋما حاتىن تاۋىپ الادى. 

ونىڭ ءارقايسىسىندا «حاتتى...» ارى قاراي - «...مەنى ساعىنعاندا»، «...قۋانعاندا»، «...جالعىزسىراعاندا»، «...ۇيىقتاي الماي جاتقاندا» دەپ ءبولىپ قويعان.

سول حاتتاردىڭ ءبىرى مىناۋ:

«جانىم، اناشىم!

ۇيىقتاي الماي جاتقانىڭ وكىنىشتى. بىردەڭەگە قاپالانعاننان، ۋايىمنان نەمەسە جامان ويلاردىڭ سالدارىنان  ەمەس دەپ ۇمىتتەنەمىن. مەن سەنى جاقسى كورەتىنىمدى بىلگەنىڭدى قالايمىن. بالكىم، ساعان مۇنى ءجيى ايتپاعان شىعارمىن. سول ءۇشىن ءقازىر ماعان رەنجىپ وتىرعان بولارسىڭ. ءبىراق ەسىڭنەن شىعارما، سەن مەنىڭ ومىرىمدەگى ەڭ قىمبات، ەڭ جاقىن جانە ەڭ سۇيىكتى جاندارىمنىڭ ءبىرىسىڭ. سەنىڭ جاعدايىڭ جاقسى ەكەنىنە سەنگىم كەلەدى. مەن ەشقاشان سەنىڭ ويىڭدى وقي الماعانمىن. مەنىڭ بار قالايتىنىم سەنىڭ باقىتتى بولۋىڭ. مەن سەنى جاقسى كورەمىن. ۇيىقتاي عوي، جانىم. ءتاتتى تۇستەر كور» دەپ اياقتايدى حاتىن مەيسي.

«بۇل حاتتاردىڭ ماعان قالاي كومەكتەسكەنىن مەسي بىلسە عوي» دەپ كوزىنە جاس الدى اناسى.

«...مەنى ساعىنعاندا» دەگەن تاقىرىپپەن تۇرعان حاتتا بىلاي دەپ جازىلعان:

«ساعىندىرىپ جاتقانىما كەشىرىم سۇرايمىن. قايدا بولساڭ دا، نە ىستەسەڭ دە جاعدايىڭ جاقسى دەپ ۇمىتتەنەمىن. ەگەر ءقازىر قيىن ساتتەردى باستان وتكەرىپ جاتساڭ نەمەسە بويىڭدى كۇدىك پەن قورقىنىش بيلەسە سەنى جاقسى كورەتىنىمدى جانە ءومىر بويى جاقسى كورىپ وتەتىنىمدى ءبىل» دەپ جازدى قىزى.

شولۋشى: سابينا رامازان