اۋداندىق ءبىلىم باسقارماسى اسىلحاندى كامەلەت جاسقا تولماعاندارعا ارنالعان ۋاقىتشا بەيىمدەلۋ ورتالىعىنا جىبەرەتىنىن حابارلادى. ول وندا سوت شەشىمى شىققانعا دەيىن بولادى. ءوز بالاسىن اياۋسىز سوققىعا جىعىپ، مۇگەدەك ەتكەن ايەلگە قاتىستى قىلمىستىق ءىس قوزعالدى دەپ جازادى قامشى اقپاراتتىق اگەنتتىگى tvk-uko.kz-كە سىلتەمە جاساپ.

 اناسىنىڭ مۇنداي قاتىگەز ارەكەتكە نەلىكتەن بارعانى بەلگىسىز. ول ءقازىر ءبىر جاسار بالاسىن تاربيەلەپ جاتىر. ونىڭ ءۇشىنشى بالاسى دا بار. الايدا بالانىڭ قايدا ەكەنى بەلگىسىز. اسىلحاننىڭ تۋىستارى ونىڭ ءومىرى تۋرالى ايتىپ بەردى.

 «اسىل كىشكەنتاي كەزىندە تۋىستارىنىڭ ۇيىندە تاربيەلەندى. مەكتەپكە باراتىن ۋاقىت جەتكەندە ونى اناسىنا قايتارىپ بەردى. ول ۋاقىتتا اناسى كوممۋنيزم اۋىلىندا اپكەسىنىڭ ۇيىندە تۇرىپ جاتقان. اناسى اسىلدى تۇركىستانداعى ينتەرناتقا جىبەرمەك بولعان. نەلىكتەن ەكەنى بەلگىسىز، ول ويىنان اينىپ قالدى. بالا دارەتحاناعا بارۋ دەگەندى بىلمەيتىن. دۇرىس سويلەي المايدى جانە جۇرە المايتىن. ورتانشى بالاسى باسقا جاقتا تاربيەلەنىپ جاتىر. ناقتى كىمگە بەرگەنى بەلگىسىز. كىشى قىزى وزىمەن بولۋ كەرەك. سەبەبى ول ءۇشىن جاردەماقى الادى» دەدى تۋىسى ساندۋعاش جولداسبەكوۆا.

 بالالاردىڭ اكەلەرى كىم ەكەنى بەلگىسىز. 31 جاستاعى ايەل اۋرۋحاناعا كەلىپ تۇرعان. اسىلحاننىڭ دەنساۋلىعى تۇزەلىپ كەلەدى.

 «ونىڭ جاعدايى وتە اۋىر ەدى. بۇرىنعى جاراسى دا، قازىرگى جاراقاتتارى دا وتە اۋىر بولدى. ءقازىر ەم-دومىن الىپ جاتىر. ەكى اپتادان كەيىن ونى اۋرۋحانادان شىعارامىز» دەيدى بالالار اۋرۋحاناسىنىڭ نەيروحيرۋرگى مۇحتار ءابدىقادىروۆ.

 شولۋشى: اسەم المۇحانبەت