مەنىڭ ۇنىمە قۇلاق ءتۇر ەلىم،
ءبارى-بارى دە سىناق بىلەمىن.
ءومىر جايىندا ويلانا قالسام، 
ەسسىز ادامداي جىلاپ-كۇلەمىن. 

ءجۇرمىز ولمەستەي ومىرگە كەلىپ،
جالعاننىڭ جايلى ءتورىن دە كورىپ.
باسىڭا جاۋعان باقىتتىڭ قارى،
تۇسەدى-اۋ، ءبىر كۇن كوڭىلدەن ەرىپ.

جالعان ەسىگى قاعىلمايدى قۇر،
قامشىنىڭ قىسقا سابىنداي عۇمىر.
بايلىعىڭمەنەن بايلاي الماسسىڭ،
اساۋ تاعدىرىڭ باعىنبايدى بۇل.

ماڭگىلىك ەمەس جالعان ءبارى دە،
ءبىز تاتقان قيال، ارمان ءدامى دە.
كارىلىك كەلەر قالعان ءومىرىڭ،
بايلانىپ ءجىپسىز قالعان دارىگە.

كەتەر اكەڭ دە، اناڭ دا كەتەر،
كەتكەنشە ساعان الاڭداپ وتەر. 
ءتىرى كەزىندە قۇرمەتتە ءبارىن،
وكپەلەگەنشە زامانعا بەكەر.

بەرمەس ەشكىمگە تىرشىلىك باعا،
تاتىماس بايلىق ءبىر شىبىققا دا.
اناۋ ومىرگە اپاراتىنىڭ،
قۇدايعا قىلعان قۇلشىلىق قانا.

"شىركىن" تاۋسىلسا " اتتەڭىڭ" عانا،
ولشەۋلى ءومىر ساتتەرىن قارا.
جالعاننان جالعىز الاتىن ەنشىڭ،
بىر-ەكى مەتر اق كەبىن عانا...

سىنالار ءومىر وتىندە كۇشىڭ، 
باي ادام مىقتى سەكىلدى ەل ءۇشىن.
جەر بەتىن ەشكىم جاۋلاي المايدى،
جەر جاۋلاپ الار بەتىندەگىسىن.

جەتەر اللادان ۇكىم الداعى،
پەندەنىڭ ولمەۋ بۇكىل ارمانى.
ايتىپ كەلمەيتىن اجال قۇرعىردان،
قورقىتتىڭ ءوزى قۇتىلا المادى.

كەشەگى وتكەن ءار كۇنىڭ ەلەس،
ءاربىر ادامنىڭ تاعدىرى بەلەس.
بارىنە ماڭگى ءومىر تىلەر ەم،
ومىردە ءبارى ماڭگىلىك ەمەس!

اۆتورى: سايات ابەنوۆ