تانىمال پروديۋسەر بايان ەسەنتايەۆا ءوزىنىڭ العاشقى كىتابىن جارىققا شىعارۋعا دايىندالىپ جاتقانى قازاق جۇرتشىلىعىنا ءمالىم. ول تىرناقالدى تۋىندىسىندا بۇرىنعى كۇيەۋىمەن وتاسقان 22 جىلدا باسىنان وتكەرگەنىن جايىپ سالماقشى. الايدا اياق استىنان قولىنا قالام العان ماقساتقىزىنا اقىن-جازۋشىلاردىڭ ايتارى بار، دەپ جازادى قامشى اقپاراتتىق اگەنتتىگى.

 «ەۋرازيا» ارناسىنا بەرگەن سۇحباتىندا جازۋشى امانحان ءالىم ۇلى وپاسىزدىقتى ەلگە جاريا ەتكەن ەسەنتايەۆانى سىناپ تاستادى. «قالتاسىندا قارجىسى بارلار كىتاپ جازا باستادى. ال شىن مانىندەگى اقىن-جازۋشىلار ەكىنشى پلانعا ىسىرىلدى. مىسالى، مەن بىرەۋدەن كورگەن وپاسىزدىعىمدى، جاماندىعىمدى، بولماسا ماحابباتتان جولىم بولماعاندىعىن، ساتسىزدىككە ۇرىنعانىمدى كوز جاسىمدى كولدەتىپ جازىپ، سونى جامانداپ، جامان ەتىپ كورسەتىپ جازسام، ول ەشقانداي مورالعا سىيمايدى»، – دەيدى «اقيقات» جۋرنالىنىڭ باس رەداكتورى، جازۋشى امانحان ءالىم ۇلى.

ال تانىمال اقىن مىرزان كەنجەباي كىتاپ شىعارعان ماقسات قىزىنىڭ ارەكەتىنە «بارىپ تۇرعان قىلمىس» دەپ باعا بەردى. «بايان ەسەنتايەۆانىڭ كىتابىنان مەنىڭ ۇلدارىم، مەنىڭ قىزدارىم قانداي ونەگە الادى؟ بايان ەسەنتايەۆا ادام بالاسىنا ۇلگى كورسەتەتىن ادام با؟ مورالدىق جاعىنان ونىڭ قۇقى جوق. باسىنان وتكەنىن جازىپ، ونى كوپ دانامەن شىعارىپ، ونى جۇرتقا ناسيحاتتاۋ دەگەن بارىپ تۇرعان قىلمىس»، – دەيدى ول.

ايتا كەتەيىك، بۇعان دەيىن بايان ماقسات قىزى بلوگەرگە بەرگەن سۇحباتىندا ءوزىن جازۋشى رەتىندە سانامايتىنىن، ماقساتى - اۆتوبيوگرافيالىق كىتاپ شىعارۋ ەكەنىن ايتقان بولاتىن. ونىڭ ۇستىنە، كىتاپ پروديۋسەردىڭ ومىرىنە قىزىعۋشىلىق تانىتىپ، بىلگىسى كەلەتىن جاندارعا ارنالعان ەكەنىن دە ايتىپ ءوتتى.

شولۋشى: گۇلىم جاقان