ءوزىڭ تۋرالى ءجيى ويلايمىن. كەيدە ءوزىمنىڭ شەشىمدەرىم مەن ارەكەتتەرىمە اقىل-كەڭەس قاجەت بولعاندا ەندى ەشقاشان كەڭەس بەرە المايتىن ادامنان ونى كۇتەتىنىم اقىماقتىق بولىپ كورىنەدى. باسىمداعى قالعان ەستەلىكتەر مەن داۋىسىڭنىڭ دىبىسى، ەسكە تۇسكەن سوزدەرىڭ مەن اقىلدارىڭ مەنىڭ ارەكەتتەرىمنىڭ دۇرىستىعىنا كۇدىك كەلتىرەتىنى دە اقىماقتىق سياقتى.
قايدا ەكەنسىڭ دەپ بولجام جاسايمىن. مۇمكىن جوعارىدا كەزدەسكەن ادامدارمەن سويلەسىپ جۇزىڭدەگى نۇرلى كۇلكىڭدى بارشاعا شاشىپ جۇرگەن شىعارسىڭ.
تاعى بولجايمىن. ماعان قارايلاسىپ ءجۇرسىڭ بە؟ اقىماقتىق جاساعاندا، كۇلگەندە، عاشىق بولعاندا ماعان قاراپ باس شايقاپ وتىراسىڭ با؟ ويلانامىن. مەن تۋرالى باسقا پەرىشتەلەرگە ايتىپ بەرىپ ءجۇرسىڭ بە؟ قانداي كىشكەنتاي قىز بولعانىمدى ەندى قالاي ەرەسەك ايەلگە اينالىپ بارا جاتقانىمدى باسقالارعا ايتىپ بەردىڭ بە؟
ويلانامىن. ەگەر ءتىرى بولعانىڭدا مەنىمەن ماقتاناتىن با ەدىڭ...
سەنسىز بۇل جول ماعان تىم اۋىر. سەنىڭ قازاڭ تەك مەنى عانا قىنجىلتقان جوق، بىلەمىن. تولقىندارعا قاراپ وتىرىپ ەگەر سەن ءقازىر قاسىمدا بولساڭ نە دەپ ايتار ەدىڭ، سونى ويلايمىن.
مۇمكىن سەن ماعان جازۋدى جالعاستىر دەيتىن با ەدىڭ. جازۋىڭدى جالعاستىر، ءۇمىت ولسە دە ءسوزىڭ ولمەسىن دەيتىن با ەدىڭ. مۇمكىن ءوز تۇلعاڭدى جوعالتپا، ماحاببات ءۇشىن قاتتى قاپالانبا دەيتىن با ەدىڭ. نەمەسە مەنى قولىمنان سالىپ جىبەرىپ، قۇدايمەن كوبىرەك تىلدەس دەپ ايتار ما ەدىڭ.
ويلايمىن. مەن دۇعا ەتكەندە مەنى ەستيمىسىڭ، مەن شارشاعاندا قادامدارىمدى باقىلايمىسىڭ، مەنى العا جۇرۋگە يتەرمەلەيمىسىڭ؟
ءتۇن ورتاسىندا جاۋىننىڭ تەرەزەگە تيگەن دىبىستارىنان ويانعاندا تاعى ويلايمىن- مۇمكىن مەنىڭ قاسىمدا ەكەنىڭدى، مەنى جاقسى كورەتىنىڭدى ايتقىڭ كەلىپ سونى وسىلاي تۇسىندىرەتىن شىعارسىڭ.
مەن سەن تۋرالى جاڭبىرلى كەشتەردە كوپ ويلايمىن. كۇن باتىس جاق قىزىل ارايلانىپ اسپان الەمى ۇيقىعا كەتۋگە ىڭعايلانعاندا سەن ويىمداسىڭ.
ءارقاشان سالماقتى، بايىپتى بولعانىڭ ەسىمە تۇسەدى. ءتىپتى سوڭعى ساتتەردە دە...
كەيدە مەنى قاتتى اشۋلاندىرعان كەزدەرىڭ ەسىمە تۇسەدى، بولماشى دۇنيەلەردى قاتتى ساعىنادى ەكەنسىڭ.
كەيدە سەن مەن تۋرالى نە ويلاپ جاتىر ەكەن دەپ سونى بولجايمىن. مەنىڭ ءبىر بولمەلىك پاتەرىم جايىندا، جينالماعان توسەگىم، شاشىلىپ جاتقان قاعازدارىم تۋرالى، مەن عاشىق بولعان ەر ادامدار تۋرالى، قارىم-قاتىناستارىم تۋرالى، جازىپ جۇرگەن سوزدەرىم تۋرالى ويلايتىن بولارسىڭ.
ەگەر ءتىرى بولعانىڭدا مەن شىعارعان ولەڭ شۋماقتارىن وقيتىن با ەدىڭ ؟ سەنى ءتىرى كەزىڭدە ءقازىر جاقسى كورگەندەي جاقسى كورە الماعانىم ءۇشىن مەنى كەشىرە الاسىڭ با، سول تۋرالى ويلايمىن.
سەنى قانشالىقتى جاقسى كورەتىنىمدى ءقازىر تۇسىنگەن شىعارسىڭ. سولاي دەپ ۇمىتتەنەمىن. ءتىرى بولماساڭ دا، قاسىمدا بولماساڭ دا، مەنىمەن ماقتانا الاتىن شىعارسىڭ دەگەن ءۇمىتىم ەشقاشان وشپەك ەمەس...
اۋدارعان: نازەركە مۇسا
