بالامەن وتكىزگەن ءار سەكۋند – باعالى

ۋدز-دياگنوزشى اياق استىنان ءۇنسىز قالدى، دەرەۋ كومەك شاقىردى. بالاعا ءبىر جاعداي بولعانى انىق.

يۋولمەگە دارىگەر كىرىپ، قايتا سكانەرلەۋدى ورىندادى دا، ۋاقىت جوعالتپاي ەببي جانە روبەرت احەرنگە ءبارىن ءتۇسىندىردى.

«مەنىڭ ايتپاعىم سىزدەرگە اۋىر ءتيۋى مۇمكىن، سونداىقتان كوپ سوزبايىن. قىزدارىڭىز انەنسەفالياعا شالدىققان»، - دەدى دارىگەر.

«ءسابيىمىزدىڭ ميىنا زاقىم كەلگەن ەكەن. دارىگەر باس ميىنا زاقىم كەلگەن ادام ءومىر سۇرە المايتىنىن ايتتى. ءتىپتى بالا دۇنيەگە كەلسە دە، بىرنەشە ساعاتتان سوڭ قايتىس بولادى»، دەپ باياندادى ەببي احەرن وقيعاسىن.

ءبىراق احەرندەر وتباسى دارىگەردىڭ «ءومىر سۇرە المايدى» دەگەن سوزىنە ءمان بەرگەن جوق. ولار بالامەن وتكىزگەن ءار سەكۋندتى باعالى دەپ سانادى.

اكەسى قىزىن انني رەيچەل دەپ اتادى. جانە امان-ەسەن بوسانۋى ءۇشىن قولدارىنان كەلگەنىنىنڭ ءبارىن ىستەدى.

دارىگەرلەر كەش بولماي تۇرعاندا انادان بالانى الدىرىپ تاستاۋىن وتىنگەن. ءبىراق اتا-انا ءۇشىن بۇل تىعىرىقتان شىعاتىن جول ەمەس ەدى.

ەببي بالانى دۇنيەگە اكەلۋگە شەشتى. ءتىپتى جاقىن ادامدارى ەكەۋىنىڭ شەشىمىنە تۇبەگەيلى قارسى بولعان، الايدا ولار ءوز دەگەنىنەن قايتپادى.

26 ماۋسىم كۇنى وپەراسيا ارقىلى انني دۇنيە ەسىگىن اشتى دا، نەبارى 15 ااعات ءومىر ءسۇردى. ءبىراق احەرنەدەر وتباسى تۇگەلدەي ءسابيدىڭ جانىندا بولىپ، ونى قۇشاقتاپ، ەركەلەتىپ، ءتىپتى سۋرەتكە ءتۇسىپ تە ۇلگەردى.  

شامام كەلگەنشە، ونى قاتتى جاقسى كورەتىنىمدى ايتا بەردىم...

ءوز جازباسىندا ەببي ءاننيدىڭ سوڭعى مينۋتتارىن بىلاي كەلتىردى:

«ساعات تۇنگى 11-لەر شاماسى بولعان. روبەرت توسەك ۇستىندە ءاننيدى ۇستاپ وتىردى، ال مەن ءبىر جۇتىم سۋ ءۇشۋ ءۇشىن تۇرىپ كەتكەنمىن. بىردە ءاننيدىڭ دەم شىعارعانىن قۇلاعىم شالدى، دەرەۋ باسىمدى بۇردىم. ول قايتادان دەمىن شىعاردى. ءسابيىمدى روبەرتتىڭ قولىنان جۇلىپ الدىم دەسە دە بولادى، ونىڭ كوزدەرىنە قاراپ ءبارىن ءتۇسىندىم. وسىمەن ءبىتتى. بولمەگە دارىگەرلەر كىردى، اۋرۋحاناعا جاقىندارىمىزدى شاقىردى.

روبەرت ەكەۋمىز قىزدارىمىز ءۇشىن دۇعا ەتۋمەن بولدىق. انني دا كۇرەستى، ول دا بىزبەن كوبىرەك ۋاقىت وتكىزگىسى كەلدى، ءبىراق شارشادى. قۇداي بىزگە ءبىز ويلاعاننان دا كوپ ۋاقىت بەردى، العىسىمىز شەكسىز ەدى. بۇل كۇن – ومىرىمدەگى ەڭ باقىتتى كۇن. بۇل جولى قىزىمدى «ءوز ۇيىنە» ەش قينالماي جىبەردىم.

پالاتاعا تۋىستارىمىز كىردى، ءبىزدى قورشاپ تۇر... مەن اننيعا ءومىرىمدى وزگەرتكەنى ءۇشىن العىسىمدى ايتتىم. ءسويتىپ ءسابيىم مەنىڭ كوز الدىمدا كەتىپ قالدى.

انني تۇنگى 11:34-تە كوز جۇمدى. دۇنيەگە كەلگەن كۇنى كوز جۇمدى.

14 ساعات 58 مينۋت... بۇل ۋاقىت ومىرىمىزدەگى ەڭ باقىتتى، ەڭ عاجاپ ساتتەردىڭ ءبىرى بولدى. ءبىز ەندى بۇرىنعى قالپىمىزعا قايتا تۇسپەيمىز.

ءسابيىمنىڭ اعزاسىن دونورلىق ماقساتتا پايدالانۋ ءۇشىن دارىگەرلەر كەرەك-جاراقتى دايىنداپ جۇرگەندە، ول مەنىڭ قۇشاعىمدا بولدى. روبەرت تە جانىمىزدا بولدى. قۇداي دا بىزبەن بىرگە ەدى. سول ۋاقىتتاعى جانىمىزدىڭ راحات كۇيگە بولەنگەنىن سوزبەن ايتىپ جەتكىزۋ مۇمكىن ەمەس. قۇداي ءبىزدىڭ ءار دۇعامىزدى قابىل ەتتى. بىزگە كۇش بەردى، قۋانىش سىيلادى، ۋاقىت سىيلادى. ءسابيىمنىڭ جانىمىزدا بولۋىنا مۇمكىندىك بەردى دە، وزىنە قايتارىپ الدى.

ءبىز ونى قاتتى جاقسى كوردىك. سول ءۇشىن دە ومىرگە كەلۋىنە، جارىق دۇنيەنى كورۋىنە مۇمكىندىك جاسادىق. ول ءبىر كۇن دە ءومىر سۇرگەن جوق، ءبىراق سول ۋاقىتتىڭ ىشششىندە ءبىز عاجاپ ساتتەردى باسىمىزدان وتكەردىك.

ول مەنىڭ ءومىرىمدى وزگەرتتى. سول ۋاقىتقا دەيىن مەن قۇدايعا سەنبەۋششى ەدىم. انني مەنى دۇرىس جولعا سالدى، قانداي جاعداي بولماسىن قۇداي ءبىزدىڭ جانىمىزدا ەكەنىن ەسكەرتتى. بىزدە ءبارى بولعان، اقشا، ءۇي، كولىك، وتباسى، ءبىراق قۇدايعا دەگەن سەنىم بولعان جوق. ال ءقازىر كەز-كەلگەن قينىدىقتا دا، قۋانىشتا دا ءبىز جالعىز ەمەسپىز، سونى ۇقتىم.

مەن وزگەردىم... بۇرىنعى ەببي جوق. «جاڭا ەببي» ءتۇرلى ادامدارمەن، قيىندىقتى باستارىنان وتكەرگەن ايەلدەرمەن، قينالىپ جۇرگەن قىزدارمەن تانىستى. كومەككە مۇقتاج جاندارعا قول ۇشىن سوزدى. بويىندا وزىنە دەگەن سەنىم پايدا بولدى».

ءاننيدىڭ وقيعاسى – ۇمىتكە جەتەلەيتىن وقيعا. ونى وقىعان ءار ادام ءومىردىڭ ءار ءساتىن باعالاۋى ءتيىس. ءدال وسى ماقساتتا ەببي باسىنان وتكەرگەنىن بۇكىل الەممەن ءبولىسۋدى ءجون كورگەن. 

شولۋشى: گۇلىم جاقان