ءبىر ادامنىڭ بالاسىنداي قازاق-فرانسۋز بوپ ءبىر ۇيدە تۇرىپ جاتقانىمىزعا تۋرا توعىز اي سوعىپتى. ماسكەۋدەگى ماگيستراتۋرالىق ءبىرجىلدىعىمنىڭ بوياۋىنا قانىق ءتۇس بەرىپ، رەڭىن ادەمىرەك ەتىسكەن ەرەن ازامات - وسكار دەگەن جىگىت وسى. ءبىز ءۇشىن اسقار. ءوزى فرانسيانىڭ بوردو قالاسىنان. پاريجدىكتەردى مويىندامايدى. ەموسياعا جۇرداي، ىلىمگە باي. مەن ەكى ەزۋىم ەكى قۇلاعىما جەتىپ كۇلىپ جاتسام، بۇل ەرنىن ەكى ميلليمەترگە عانا سوزىپ، سالقىن ساراڭدىعىنا سالادى. كۇلكىدەن ءبىر مارتە بولسىن دىبىس شىعارعانى ەسىمدە جوق. ⠀

⠀⠀⠀ ⠀⠀⠀⠀ ⠀⠀ ⠀⠀⠀⠀ ⠀⠀⠀ ⠀⠀⠀⠀⠀⠀⠀
وسىنداعى جۇرتپەن قۇرعان ساعات-ساعات توعىز ايلىق سۇحباتتارىمنىڭ ۇشتارىن بايلاپ، ءبىر ءجىپتىڭ بويىمەن سوزىپ كورسەم، ىشىندەگى ەڭ ساپالى كەندىرسىز مينۋتتارى اسەكەڭمەن وتكەن ەكەن. قۇداي ءوزى پەندەلەرىندەگى كەمشىلىكتەردى قاسىنداعىلارىنا قاراپ جاماپ السىن دەي مە، ايتەۋىر مەندەگى ءجونى ءتۇزۋ قاسيەت مۇنىڭ مۇقتاجدىعىنا جاراسا، اسقاردىڭ اسىل تۇستارىن مەنىڭ بولمىسىم اۋاداي قاجەتسىنىپ تۇرادى. ەگەر اسپانداعى اراسى التى سەكۋندتىق مەتەوريتتەردىڭ قانشا جاقىنداسسا دا، جاناسپاستان بىر-بىرىمەن ەش سوقتىعىسپاي، تەك قۇدايدىڭ عانا سالىپ بەرگەن ءدال باعىتىمەن ۇشاتىنىن ەسكەرسەك، مىنا جىگىتتىڭ مەن تۇسكەن جاتاقحاناعا ات باسىن بايلاپ، جولىنىڭ قاي-قايداعى كۋبالىق سالۆادورمەن ەمەس، تارازدىق ايدارمەن تۇيىسكەنى اجەپتەۋىر قۇبىلىس بولسا كەرەك. تانىسقان ساعاتتا-اق بىلگەنىم - بۇل قۇدايعا سەنبەيتىن بولىپ شىقتى. ءبىراق قۇراندى فرانسۋزشادان وقيدى. پايعامبارى - نيسشە، ءبىراق مۇحاممەدتىڭ(س.ع.س.) ءومىربايانىن مەدرەسە تاۋىسقان تالاپتى تالىپتەن كوپ بىلەدى. دىنى-دالەلدى عىلىم ەكەن. مىنانى ەستىگەن كەزدە، ءالى ەسىمدە: ''ەەە'' دەپ قالعام، كوسە يەگىمدى اسىقپاي سيپاپ. كەيىن باقسام، ءجۇرىسى مەن تۇرىسىنىڭ ءبارى ناعىز سۇننەتپەن سومدالعانداي كورىندى. سۇننەت دەگەندە قالاي: حاديس ءىلىمىن جاقسىلاپ زەرتتەپ، پايدالى تۇستارىنىڭ بارلىعىن كۇندەلىكتى قارەكەتتەرىنە قولدانىپ ءجۇر دا. سويتسەم، مۇنىڭ پايىمىنشا، پايعامباردان اقىلدى ادام بولماعان. قالاي ءجۇرىپ، قالاي سويلەپ، قالاي ۇيىقتاۋ كەرەك؟ - جاۋاپتارى حاديستەرىندە الدەقاشان جازىلىپ قويعان. سول اقىلدىلىعىنا بولا ەرۋشىلەرى كوپ بولعان. دەگەنمەن، قۇداي بار، جانە ونىڭ ارنايى جۇرتقا جىبەرگەن ەلشىسىنە ءافيسيالنا يمام ەتپەيمىن،-دەيدى. تەك تاريحي قايتالانباس گەنيلىگىنە عانا ساجدە ەتەم دەپ، كىشكەنە جىبىتىڭكىرەپ كەلتىردى، مۇسىلماندى رەنجىتپەيىن دەدى مەە، مۇمكىن. ''ەەەە...''- دەپ، باياعىسىنشا يەگىمدى تاعى ءبىر سيپادىم.⠀⠀⠀⠀⠀⠀⠀⠀⠀ ⠀⠀⠀⠀⠀⠀⠀⠀⠀⠀⠀ ⠀⠀⠀⠀⠀⠀⠀⠀⠀⠀⠀
⠀⠀⠀⠀

ءسويتىپ جۇرگەندە ءبىر اي بويى اۋىز بەكىتتى. قىزىق، ءا. قاتىپ قالعان اتەيستىڭ ونىسى نەس؟-دەرسىز. قاراشادا، دەي تۇرعانمەن. ول كورشىمنىڭ ويىنشا، باستىسى پايعامبار (س.ع.س.) جاساعان ريتۋال ورىندالسا بولدى، پايداسى بار. دەمەك، ءاربىر اقىلى بار ادام امال ەتۋگە ۇمىتىلۋى ءتيىس ەكەن. سول ىجداحاتتىلىقتىڭ ىرقىمەن تاڭعى جەتىلەردە تۇرىپ، سارەسىن قامدايدى دا، تىڭقيىپ الىپ قىلۋەتىنە كىرىپ كەتەدى. ساعات ءتىلى كەشكى تۋرا توعىزعا تىرەلگەندە عانا كەرىلىپ بولمەسىنەن شىعادى. كۇنى بويى اس ۇيگە اياق باسپاي، قىلۋەتىندە قامالىپ اپ وقىعان كىتابىن جەڭىن ءتۇرىپ تۇرىپ ايتىپ بەرۋگە كىرىسەدى. سولاي قاراشانى جيىرما كىتاپپەن تاۋىستى. ۋنيۆەرگە ءجوندى دە بارمادى. كەيىنىرەك ءۇيىپ تاپسىرا سالدى-اۋ، شاماسى. ايتايىن دەگەنىم جىلىنا ءبىر مارتە وسىلاي اۋىز بەكىتىپ تۇرۋدى قاپەرىنەن تاستامايدى.⠀⠀⠀⠀⠀ ⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀

ءقازىر تايم-مەنەدجمەنتىن حاديستەردىڭ نەگىزىندە تۋرالاپ ءجۇر. قايتەدى؟ بىلاي: كۇن باتىسىمەن تاماقتانىپ الىپ، تورت-بەس ساعات تىنىعادى. ءتۇننىڭ العاشقى ەكى بولىگىن ۇيقىمەن وتكىزىپ، ۇشىنشىسىندە ءۇي جۇمىسىن جاساۋعا تۇرادى. كۇن قۇلانيەكتەي كوتەرىلىسىمەن (ساعات 11:00-دە) تاس توبەدەن اسقانشا بىر-ەكى ساعات تاعى مىزعىپ الادى. ەگەر بۇل ۋاقىتتى ۇيقىعا يگەرە الماي قالسا، بەسىن نامازىنىڭ كىرەر كەزىنەن باستاپ 40 مينۋت كوز ىلەدى. نامازدىڭ ۋاقىتتارىن وسى ءۇشىن ازداپ مەڭگەرىپ العان. نەگە قىرىق قانا مينۋت، سەن تۇندە تورت-بەس ساعاتتاي-اق دەمالدىڭ ەمەس پە؟-دەسەڭ، ''مۇحاممەد(س.ع.س) دەگەن اقىلمان بۇل ۋاقىتتا ''ودان ارتىق ۇيىقتاعاننىڭ ميعا زيانى شاش ەتەكتەن'' ەكەندىگىن ەسكەرتكەن،-دەپ شالا مۇسىلماندىعىڭنان ءبىر قويادى. سوسىن، الدىنداعى يەگىڭدى سيپاعان قولىڭمەن باسىڭدى قاسىپ قالاسىڭ. ودان بولەك قىرعىن حاديستەرى بار تۇراقتى عادەتىنە اينالدىرىپ جۇرگەن. ءتىزىپ جازا بەرۋگە بولادى، ونى وقىپ، قىزىعىپ جاتقان كىم بار، ءبىراق. ءوز باسىم، سەنىمىن جاقتىرماسام دا، ساۋلەلى ءسوزىن، سوسىن كوپكە ۇقسامايتىن ءوزىن قاتتى جاراتىپ كەلدىم. مۇسىلمان بولسا، مىقتى مۇسىلمان بولار ما ەد؟ ⠀⠀⠀⠀ ⠀ ⠀⠀⠀⠀⠀ ⠀⠀⠀⠀⠀ ⠀⠀ ⠀⠀⠀⠀⠀⠀⠀
⠀⠀⠀⠀

بۇگىن اسقاردى كورمەگەنىە ەكى كۇن بولدى. تۋعان جەرىنە قايتىپ كەتكەن. ەستەرينيزدە مە؟ بالا كەزىمىزدە ۇيگە الىستان جاقىن تۋىستارىمىز، يا دوستارىمىز كەلىپ، بىرنەشە كۇن بويى بالا كوڭىلمەن ۇزاق ويناپ، ال ويىننىڭ قىزىعىنا باتقاندا كوڭىلدى قۇلازىتىپ، قايتا ۇيلەرىنە قايتىپ كەتۋشى ەدى عوي. سول ساتتە ىشىڭدەگى كوڭىلدىڭ كەڭىستىگى قاڭىراپ قالاتىن. بىرگە ويناعان ويىنشىقتار شاشىلعان بويى قوزعالىسسىز قالادى. ولار جوق. ال، سەن باسىڭ سالبىراپ، جالعىز ءوزىىڭ ءبىرتۇرلى كۇيدە قالعان-قۇتقان ويىنشىقتاردى جيناستىرىپ جۇرەسىڭ ۇيدە. سول سياقتى، كەشەدەن بەرى كورشىمدى ۇيدەن كورمەدىم. بولمەسى تىپ-تىنىش. ءوزى جوق. قۇلازىپ وتىرمىن. جالپى جامان ەكەن جاتاقحانادا جالعىز قالۋ دەگەن. ەرتەرەك ەلىمە جەتىپ السام جارار ەدى.

ايدار مىرزابەك

فەيسبۋكتەگى جەكە پاراقشاسىنان الىنعان