بريتانيالىق عاشىق جۇپتار وزدەرىنىڭ ەرلى-زايىپتى بولعاندارىنا 80 جىل تولۋىن اتاپ ءوتۋ ءۇشىن قايتا قوسىلدى، دەپ جازادى قامشى اقپاراتتىق اگەنتتىگى.

102 جاستاعى كەن حارريس قارتتار ۇيىندە جاتقان 99 جاستاعى جارى مارگارەتپەن ۋەلستەگى للانگينيدير قالاسىندا ۇيلەنگەندەرىنە 80 جىل تولعان مەرەيتويىن اتاپ ءوتتى. بۇل جونىندە ءبي-بي-سيدىڭ ورىس قىزمەتى حابارلايدى.

بۇل ۋاقىتقا دەيىن قاريا بەلى سىنىپ اۋرۋحانادا جاتقان ەدى. ەكىنشى دۇنيەجۇزىلىك سوعىستان بەرى ايىرىلماي باقىتتى عۇمىر كەشكەن جارىن كورە الماي كەتەم بە دەگەن ۇرەي ونى ورنىنان قايتا تۇرعىزدى.

«ولاردىڭ ۇستاسقان قولدارى ءالى كۇنگە دەيىن اجىراماعان. ايىرىلعان كۇندەرىن ەسكە العان سايىن بىر-بىرىنە جاقىنداي تۇسەدى، قايدا بارسا دا، بىرگە جۇرەدى»، دەيدى ولاردىڭ 75 جاستاعى كەلىندەرى پەت حارريس.

ەكىنشى دۇنيەجۇزىلىك سوعىس قارساڭىندا كەن حارريس بيرماداعى قىزمەتكە جىبەرىلىپ، بريتاندىق 24ء-ى جاياۋ اسكەر پولكىنىڭ قاراتىندا بولدى.

«كەن سوعىسقا اتتانعاندا مارگارەت ۇيدە جالعىز قالدى. دارىگەردىڭ حاتشىسى بولىپ جۇمىس ىستەدى. كۇيەۋى ەكەۋىنىڭ توي سۋرەتتەرى ءاميانىنان بىرەلى تۇسپەگەن»، - دەدى پەت عاشىق جۇپتاردىڭ ماحاببات حيكايالارىن ەسكە الا وتىرىپ.

كەن سوعىستان امان-ەسەن قايتقان سوڭ ەكەۋى للانحيلەت قالاشىعىندا تۇردى، ەكى بالالارى بولدى: ۇلدارى – الان جانە قىزدارى – ەنن.

الايدا مارگارەتتەن دەمەنسيا، ياعني اقىلىنىڭ كەمدىگى بايقالعان سوڭ ونى قارتتار ۇيىنە جاتقىزادى. ال كەن جالعىز قالدى.

كەيىن بەلىن سىنىدىرىپ الىپ، ءوزى دە اۋرۋحاناعا تۇسەدى. اۋرۋحانادا جاتقان قاريا قاتتى قينالدى، سۇيىكتى جارىن ەشقاشان كورمەيتىندەي كۇي كەشەدى. سونى ويلاعان سايىن اۋرۋىن جەڭۋگە تىرىستى. اقىرى كوزدەگەنىنە جەتىپ، كەندى 1 ايدان سوڭ اۋرۋحانادان شىعارادى. مارگارەت جاتقان قارتتار ۇيىنەن كەن ءۇشىن دە بولمە تابىلادى.

«ەكەۋىنىڭ قايتا تابىسۋى ءۇشىن كوپ كۇش جۇمسادىق. كەننىڭ جارتى ءومىرى مەملەكەتكە قىزمەت ەتۋمەن ءوتتى، جارىنىڭ جانىندا بولىپ، الاڭسىز كوز جۇمۋعا لايىقتى دەپ ويلايمىن. ولار ءبىر-بىرىن شەكسىز سۇيەدى، عاشىق جۇپتاردىڭ 80 جىلدىق مەرەيتويىن تويلاپ جاتقانىن كورۋ – بىزگە ەرەكشە قۋانىش سىيلايدى»، دەپ ويىمەن ءبولىستى كەلىندەرى.

شولۋشى: گۇلىم جاقان