قۇرلىق اسكەرلەرى اسكەري ينستيتۋتىندا ءبولىم كومانديرى بولىپ جۇرگەن بورانبايەۆ ايەلىنە تۇرمىستىق زورلىق-زومبىلىق كورسەتكەنى ءۇشىن ءبىر جىلعا شارتتى تۇردە باس بوستاندىعىنان ايىرىلعان-دى. جۋىردا جابىرلەنۋشىنىڭ اناسى بوتاگوز چيدەرينوۆا بۇل جازامەن مۇلدەم كەلىسپەيتىندىگىن ايتىپ، قورعاۋشىلاردان كومەك سۇرادى. سەبەبى، باس سۇيەگى سوققىدان شىتىناپ، قىزىنا سوڭعى رەت ءۇش جەرىنەن وتا جاسالعان ەكەن، دەپ حابارلايدى قامشى اقپاراتتىق اگەنتتىگى Stan.kz سايتىنا سىلتەمە جاساپ.
ب ا ق وكىلدەرىمەن كەزدەسۋ كونفەرەنسياسىنا دينارا چيدەرينوۆانىڭ ءوزى دە، اناسى دا كەلدى. الايدا كەلىنشەك دالىزدە تالىپ قالىپ، ونى جەدەل جاردەممەن اۋرۋحاناعا الىپ كەتتى. سول سەبەپتى، بار وقيعانى اناسى بايانداپ بەردى.
2016 جىلدىڭ قىركۇيەك ايىندا دينارا چيدەرينوۆا جاتاقحاناداعى ءبىر بولمەلى پاتەرىن جيناپ جۇرەدى. بۇيرەگى قاتتى اۋىرىپ، جەكسەنبى كۇنى مونشاعا بىرگە بارۋعا كۇيەۋىنە ءوتىنىش بىلدىرەدى. وسىلايشا ەكەۋى كەشكە جاقىن مونشاعا بارۋعا كەلىسىپ، ارتىنشا كۇيەۋى ۇيدەن شىعىپ كەتەدى. ساعات 4-5 شاماسىندا دينارا چيدەرينوۆا كۇيەۋىنىڭ مونشاعا تۇسۋگە كەلمەيتىنىن ءتۇسىنىپ، ول ىشىمدىك ءىشىپ كەلەتىن شىعار دەگەن بولجام جاسايدى. سول كۇنى دەنە قىزۋى كوتەرىلىپ، اياعىن جىلى سۋعا سالىپ وتىرعان كەزدە كۇيەۋى كىرىپ كەلەدى. ارتىنشا دالىزگە شىعىپ كەتىپ، 20-30 مينۋت شىلىم شەگىپ جۇرەدى. وسىدان كەيىن ۇيگە كىرە سالىسىمەن ايەلىنە باس سالىپ، باسىنان جۇدىرىقپەن ۇرا باستايدى.
“كۇيەۋ بالام قىزىمدى ۇرىپ جاتقان ساتتە بولمەدە 4 جاستاعى نەمەرەم ويانباي ۇيىقتاپ جاتقان. ياعني ول تاماعىنان باسىپ تۇرىپ ۇرعان. ارتىنشا كەرەگەگە قاراي قاتتى يتەرىپ جىبەرگەن. قىزىم ەسىن جيا سالىسىمەن دالىزگە قاراي قاشقان. وسى ساتتە كۇيەۋ بالام پىشاققا جۇگىرىپ ونى قورقىتقان. قۋانىشىنا وراي، دينارانى كورشىلەر كورىپ قالىپ، ەكەۋىنە اراشا تۇسكەن ەكەن. قىزىمنىڭ باس سۇيەگى اۋىرماق تۇگىلى، شىتىناپ كەتكەن ەكەن. مۇندايدىڭ ءبىرىنشى رەت بولىپ تۇرماعانىن وزدەرىڭىز دە ءتۇسىنىپ تۇرعان شىعارسىزدار؟!” – دەيدى بوتاگوز چيدەرينوۆا.
جۋىردا اتالعان ىسكە قاتىستى سوت وتىرىسى اياقتالعان بولاتىن. سۋديا بورانبايەۆتى شارتتى تۇردە ءبىر جىلعا باس بوستاندىعىنان ايىرعان ەكەن. ول سوتتا ايەلىن ءبىر رەت بەتىنەن شاپالاقپەن، ءبىر رەت جۇدىرىقپەن ۇرعانىن ايتىپ اقتالعان. مۇنىمەن قاتار، دينارانىڭ اناسى كۇيەۋ بالاسى دارىگەرلەرمەن كەلىسىپ، ونى ۇيگە ەرتەرەك شىعارتقىزعانىن ايتىپ وتىر. ادەتتە جابىرلەنۋشى 21 كۇنگە دەيىن اۋرۋحانادا جاتاتىن بولسا، ونىڭ جاراقاتى جەڭىل بولىپ ەسەپتەلىپ، ايىپتالۋشىنىڭ جازاسى جەڭىلدەتىلەدى. ال دينارانى دارىگەرلەر باس سۇيەگىنىڭ شىتىناپ كەتكەنىنە قاراماستان، 5 كۇننەن كەيىن تەگىن كومەك كورسەتە المايتىندارىن ايتىپ، شىعارىپ جىبەرگەن.
“قىزىمنىڭ ارتىق مىنەزى جوق. ءبىر شەتىنەن كۇيەۋ بالام كۇندە ىشىمدىك ىشەتىن دەپ تە ايتا المايمىن. ءبىراق، ونىڭ ارتىق كەتكەنى راس. قىزىمنىڭ بەتىندە ساۋ جەرى جوق. ءتىپتى، دارىگەرلەر ونىڭ باس سۇيەگىنىڭ سىنعانىن جاسىرىپ قالماق بولعان. ءبىز وتانى كەيىننەن عانا جاساتتىق. باستاپقىدا دارىگەرلەردىڭ سوزىنە سەنىپ، جاراقاتى وزدىگىنەن جازىلاتىن شىعار دەپ ويلاپ جۇرگەن ەدىك. قىزىم وسى كۇنگە دەيىن تۇرمىستا كورگەن زورلىق-زومبىلىعىن بىزدەن جاسىردى”، – دەيدى بوتاگوز چيدەرينوۆا.
قورعاۋشى ايمان وماروۆا اتالعان ءىستىڭ قايتا قارالىپ، بورانبايەۆتىڭ وزىنە تيەسىلى جازانى الۋى ءۇشىن بارىن سالاتىنىن ايتىپ جاتىر.
