قىتايدا تۇراتىن قازاقتاردىڭ تاريحي وتانىنا كەلۋىنە ءتۇرلى كەدەرگىلەر جاسالۋدا. ال ەلگە ورالىپ، ىقتيارحات العانداردى سول جاققا بارعان بويدا قۇجاتتارىن تارتىپ الىپ، كەرى جىبەرمەۋدە ەكەن. الماتىدا باسپا ءسوز ءماسليحاتىن وتكىزگەن ءبىر توپ زيالى قاۋىم وكىلدەرى مەن قانداستارىمىز وسىلاي دەپ بازىنا ايتتى. ولار پرەزيدەنتكە اشىق حات جولداپ، وسى ماۋسىم ايىندا وتەتىن دۇنيەجۇزى قازاقتارىنىڭ قۇرىلتايىندا وسى وزەكتى ماسەلەنى شەشىپ بەرۋدى سۇراۋدا. 

قازاقستانعا كوشىپ كەلىپ، ىقتيارحات العان نەمەسە كوشىپ كەلگىسى كەلىپ جۇرگەندەر جۇڭگو ۇكىمەتىنە جاقپاۋدا. وتكەن جىلدان بەرى شىعىستاعى كورشىمىز تۋعان وتانىنا كەتكىسى كەلەتىندەرگە تالاپتى كۇشەيتىپ، ءتىپتى ءتۇرلى كەدەرگىلەر ويلاپ تاپقان كورىنەدى. سونىڭ سالدارىنان مىڭداعان قانداسىمىز اتا-بابالارىنىڭ جەرىنە ورالا الماۋدا ەكەن.

«جۇڭگو حالىق رەسپۋبليكاسىندا 30-40 جىل جۇمىس ىستەپ، زەينەتكە شىققان ازاماتتار بالا-شاعاسىن ەرتىپ، قازاقستانعا كوشىپ كەلگەن. سول قىتايداعى ۇيلەرىنىڭ بارلىعىن ساتىپ، قازاقستاننان ءۇي الىپ، وسىندا قونىستانىپ وتىرعان ازاماتتارىمىزدى قىتايعا قايتادان شاقىرىپ الىپ، ولاردى وتباسىنان ايىرىپ، ولاردىڭ زەينەتاقىلارىن توقتاتىپ، ءتولقۇجاتتارىنىڭ كۇشىن جويىپ جاتىر» - كاسىپكەر، ازاماتتىق بەلسەندى ءقىدىرالى وراز ۇلى.

جالپى 25 جىلدىڭ ىشىندە ەلىمىزگە شەتەلدەن ءبىر ميلليون قانداسىمىز كوشىپ كەلگەن. ولاردىڭ 63 پايىزى وزبەكستاننان، 11 پايىزى قىتايدان، 7 پايىزى مونعوليادان ورالعان.. قازىرگى قىتايدا تۇراتىن قانداستارىمىزدىڭ ماسەلەسىنە بەي-جاي قاراي المايتىن زيالى قاۋىم وكىلدەرى ەلباسىنا اتىنا اشىق حات جازىپ، اراشا ءتۇسۋدى سۇراۋدا.

«ءبىزدىڭ شەتتە جۇرگەن قازاقتارىمىزدى قازاقستانعا الىپ كەلۋ جايلى ماسەلە كوپتەن بەرى كوتەرىلۋدە. ءبىراق سول ماسەلە ايتىلعان جەردە قالادى. اسىرەسە، سوڭعى كەزدە ونى قيىنداتىپ تا جىبەردى» - جازۋشى دۋلات يسابەكوۆ.

«بارىس-كەلىستى تىيعان. قازاقتاردى قازاقستانمەن ارالداستىرماۋدا.  ۆيزا بەرمەۋ، بۇل جاققا وتكىزبەۋ، وتكىزگەن ادامداردى تەرگەۋ. نەگە باردىڭ، نەگە قويدىڭ وسى بىلتىردان بەرى باستالىپتى.  سوسىن تىيىم سالىنعان 26 مەملەكەتتىڭ تىزىمىنە قوسىپتى قازاقستاندى» - جازۋشى قابدەش ءجۇمادىلوۆ.

بىرەر كۇننەن كەيىن استانادا دۇنيەجۇزى قازاقتارىنىڭ بەسىنشى قۇرىلتايى باستالادى.  ۇلت جاناشىرلارى وسى وزەكتى ماسەلەنى قۇرىلتايدا كوتەرۋدى كوزدەپ وتىر. 

دەرەككوز: ەۋرازيا ارناسى